انا متزوجه قريب السبع سنين وللي متذكره قصتي انا مريت بكم مشكله مع وزوجي اساسها الضرب والشك والغيره وآخرها ضربني وحبسني في البيت واخذ بنتي مني فتره .. وانا اعتذر لكل من وقفت معايا وساعدتني و لو بدعوه في ظهر الغيب لأني انسحبت من المنتدى فتره .. قلت اعيد حساباتي وبعدها انشغلت بالبيت وقلت خليني ابعد عن النت حتى استعيد ثقته فيني
وبقولكم آخر المستجدات انا حاليا رجعت لزوجي من شهرين والأمور ماشيه بيننا تمام مع مسحة برود يعني كل واحد عامل لتصرفاته الف حساب
وبقولكم آخر المستجدات انا حاليا رجعت لزوجي من شهرين والأمور ماشيه بيننا تمام مع مسحة برود يعني كل واحد عامل لتصرفاته الف حساب
صارت امور كتير بيني وبين اهلي ومنها انهم كانوا رافضين اني اتطلق او اني اخلعه الا لما آخد حقي منه وبرأيهم ماراح آخذ حقي الا بالمواجهه بس انا كنت مجروحه وماني مستعده لأي قرار حتى اصفي ذهني وضليت ابكي واستخير لحد مافرجت وربي ما خيب دعائي
اول جسة نبض صارت .. نزلت امطار وسيول ناحية بيت اهلي واصغر اخواني بالثانوي كان بيختبر بالمدرسه واتصلت المدرسه على البيت وبلغتنا انهم ماراح يصرفوا الطلاب الا تحت مسؤولية اولياء الأمور لأنو المواصلات كانت معدومه مع الأمطار .. امي خافت وبالذات لأنها صارت كل ما تدق على واحد من اخواني تلاقيه في مقطعه وماهي عارفه ايش تسوي بأخويا اللي بالمدرسه وكيف ترجعه البيت .. وبعد كم ساعه اتصل زوجي وقال لأمي انه اخذ اخويا وقت ما اخذ اخوه من نفس المدرسه وبيوصله البيت اول ما المطر يوقف ويخف السيل .. وبعد العشا شرفوا ع البيت وامي يامقلب القلوب حلفت عليه ما يطلع من البيت الا لما السيل يخف .. اخوه دخل جفف نفسه وهو جالس بالدرج موراضي يدخل يقول براقب الوضع برا يمكن احد يحتاج شي .. وشويتين اثنين من اخواني وصلوا ودخلوه البيت وانا من يوم ما سمعت صوتهم نطيت على غرفتي بس امي استعجلتني اجهز الحمامات واطلع ملابس لأخواني وزوجي ولاشعوريا سويت حركه غبيه طلعت الاستشوار وحطيته عند باب الحمام اللي يتغسل فيه زوجي في العاده لازم يجفف شعره وجسمه بعد ما يستحم مافي ربع ساعه ارسل زوجي مسج الله يخليكي لي ياقلب قلبي ولا يحرمني من حنانك والله صنمت ماتخيلتها منه مو عادته يقول كلمه حلوه وبنفس الوقت حسيتا ني غلطت لأني بادرت بشي .. المهم اتعشوا الجماعه وسهروا عالبلايستيشن وبآخر الليل بدأت الحرب وسمعت اصواتهم ارتفعت انت وانت وقالت وعادت وبابا معصب وصوته طالع وشي يجيب الهم ماقدرت اتحمل طفيت النور وحاولت انام اقلب راسي تحت المخده وانا ماسكه دموعي .. مدري انا نمت ولا كنت سراحنه الوقت مشي والنور بدأ يطلع فجأه دخل علي زوجي الغرفه وقرب من السريروجلس يبوس كتفي وراسي وقالي انا والله احبك .. كنت معطيته ظهري وما رديت رجع قالي خلينا نعطي بعض فرصه اخيره وبعدها اللي تقريريه انا موافق عليه .. وبرضو ما رديت قالي السكوت علامة الرضا يعني اعتبرها موافقه .. انا اهنا انفجرت جلست على حيلي وصرت اصرخ موافقه على ايش على ايش ؟ اني اعيش معاك طول عمري مذلوله ولالي كلمه مايهمني الا رضاك ؟ ولا اوافق على الضرب والإهانه وعيشة البهايم ؟ انت ياحبيبي اذا ماراح عن بالك وقت ماكنت اشوف بستك عند اهلك واصرخ مرعووبه منها كنت تنزل علي شتايم وبهدله عشان خوفتها وهادا وهي حيوان خايف على مشاعرها وماتقبل احد يكدر مزاجها كيف انا مرتك وام بنتك اغلى شي بحياتك خليك فاكر لو مو الله ثم انا ما كان هالمخلوقه جات وبالنهايه هادي جزاتي وجزاة صبري عليك ضرب وشك واهانه .. انت بعد كل اللي سويته كلمة سامحيني او حتى آسف ما قلتها كالعاده مستحيل تتنازل وتعترف بخطأك .. ولو ما الله ثم المطر اللي جابك ما كان فكرت تجي وجاي بكل برود تقولي نعطي بعض فرصه ! لا ياحبيبي اذا احد فكر واتنازل يعطي فرصه فهو انا اما انت لا تتعشم انك تعطيني شي انا زي ما انا ماراح اتغير ولا تحلم انك تغيرني وتمشيني على كيفك عجبك ولا عنه لا عجبك وقتها انتبهت لنبرة صوتي وقلتله معليش ما ابغى اغلط في حق نفسي ممكن تطلع برا .. مدري هو خوف من اهلي ولا من ايش اول مره بحياته يمسك اعصابه ويحاول يهديني صار يضغط على ايدي بقوه ويقولي طيب انتي اهدي بس وكل اللي تبغيه يصير بس هدي اعصابك وصرت ابكي ابكي لحد ما ارتحت وهو يحضني ويقولي انا آسف والله غلطت بس ما كنت بوعيي معليش انا وانا .. ماعلقت على كلامه بس حسيت نفسي بدأت اضعف قلتله انا مصدعه وتعبانه وماني قادره افكر نتفاهم مع بعض بغير مره قالي لا معليش انا حاب اخلص من هذ ا الموضوع اليوم ماعاد فيني اتحمل قلتله اذا حاب نخلص من الموضوع انا بقولك قراري انت من طريق وانا من طريق طلقني .. ضحك و قالي ياكبرها عند الله نرفزني رده قلتله طلقني ولا بخلعك انت اختار الأفضل لكرامتك .. قالي هلا هلا نغمه جديده هاذي انتي بتخلعيني انا ؟ ساعتها اتندمت قد شعر راسي اني رضخت لأهلي وما اخذت تقرير طبي حسيت اني اغبى خلق ربنا لما شفته كيف مستهين فيني .. بس قلت برميها والله يغفرلي قلتله انا حبيت اشوف وجهك بعد ما اخلعك وانا بعطيك الخبر مو قبلها بس كل اللي يجي من ربنا حلو .. اول شي سويته بعد ما رجعت عند أهلي رحت المستشفى واخذت تقرير طبي مصور والا الله كانوا ببلغوا الشرطه لو مو اخويا الكبير اللي دايما في صفك رحمك واقنعني اني اتنازل كان مداك جالس تهوي في السجن بس اكتفيت بالتقرير لغرض الخلع مو اكثر وقف مصدوم وقالي بتريقه اذا عندك التقرير ومسويه بطله وبتخلعي ايش اللي مأخرك ؟ قلتله ما اخرني الا استخارتي لخير بنتي ولا لو علي ما جلست تحت ذمتك لحظه .. وقف مصدوم وقالي اجل نتفاهم مره ثانيه يكون احسن انسدحت واعطيته ظهري قال طيب بس انا بقولك انا احبك.. قلتله طفي النور معاك سكت وبعدين رضخ للأمر الواقع وطلع .. وثاني يوم جابلي بنتي عالبيت رشوه يعني
يالله وقت اللي شفتها طاح كل اللي براسي .. لو ربي وقتها ماربط على قلبي ونزل علي الصبر كان اتصلت عليه واترجيته يرجعني البيت بس الحمدلله اللي برد قلبي و نامت بحضني .. وصار كل يومين يجيبها وانا قلبي كل ماراحت من بين يدي ينسحب .. بعد اسبوع كلمني بابا قالي انه زوجي طلبه يكلمني مره وحده بس نتفاهم فيها وبعدها بيجيب اهله وجلست اعابط شويتين لحد ما اقنعني .. واتصل علي بس كانت المحادثه فاشله كلها بكا ماطلعت بشي خخخخخخخخخخ .. فقلتله انا اتوتر من نبرة صوتك ومااقدر اعبر فاقترح نتفاهم عالنت وهذا كان احسن شي اقترحه .. بالبدايه كان الوضع غريب حسيت اني بتكلم مع انسان ثاني ماني خايفه لا من صوته ولا من مدة ايده ..و اول مررره اقدر اوصل كل اللي بخاطري واستوعب شي من وجهات نظره اللي ماني قادره افهمها المهم اننا اتناقشنا بكم شغله ومنها موضوع ولد خالتي ووعد انه ماعاد يفتح الموضوع وانه ماعاد يتدخل بخصوصياتي مثل النت والجوال .. وبالأخير وصلتله انه وضعنا غلط واننا محتاجين مساعده بدليل اننا ماعرفنا نتواصل الا عالنت هو ما عجبه الكلام .. بس انا اصريت اننا نراجع مستشار اجتماعي او أيا يكن على الأقل نطور طريقة تواصلنا لف يمين ويسار وفي النهايه قلتله هذا شرطي حتى ارجعلك .. وافق من ورا قلبه بس رفض اني اروح لأي استشاره لأنه على قولته اذا حس بأي تغيير من ناحيتي وان كان للأفضل بيفهمها انها تمثيل وماراح يستوعب طريقة تفكيري وبيحس انه ماهو متملك الوضع ماعجبتني وجهة نظره بس قلت بداية الغيث قطره
وفعلا جاب اهله واتفاهموا مع اهلي وبابا رفض اني ارجعله البيت حتى يجيب تقرير من استشاري انه منتظم معاه .. واتفاهموا على كم شغله .. وقبل لا ارجعله اقترح اننا نغير الصاله وغرفة النوم كبدايه جديده والحمدلله رجعتله بس احس العلاقه بيننا غريبه كلها مجاملات .. هو ما انكر انه متحسن بس ماني عارفه اذا ما زال يداوم عند استشاري كل مافتحت معاه السيره عصب ويقولي شايفتني عندك مجنون وماسك ساطور كل اللي تبغيه بسويه خلاص لحد يتدخل وقت ماروح اروح ! .. كيف اضمن حقي معاه
وفي شغله لاحظتها انا اصريت انه ما يتدخل بخصوصياتي يعني ماعاد يفتح ايميلي ولا يفتش بجوالي و يتركلي تربية بنتي بالطريقه اللي تناسبني .. بس اللي لاحظته انه صار يقفل جواله وحاط باس عاللاب مع انه مو من طبعه .. مدري ايش قصده وكيف افتح معاه الموضوع لأنه اكيد بيقولي هاذي خصوصيتي زي مالك خصوصيتك
واغلب الوقت ساكت مو من طبعه العاده بس يتفلسف ما انكر انه بيطلعنا ويمشينا ومو مقصر معانا بشي بس ماني حاسه انه زوجي وانا كمان خايفه من أي كلمه تطلع مني او تصرف يجرحه .. يعني باختصار احس الوضع غلط مع انه في الظاهر تمام
ادري طولت عليكم بس وربي خايفه وماني عارفه انا بتصرف صح ولا غلط ومالي وجه ارجع اشتكي لأهلي واطلب مشورتهم
