زوجي,,,ووالدته,,

[ولدي انفاسي]

عندي مشكله اتمنى تساعدوني بحلها,,
انا زوجي حنون بشكل فضيع وعنيد بشكل افضع,,متزوج قبلي وهي على ذمته الى الان فهي ام اولاده,,الى هنا تمام,,المشكله زوجي غير بار بوالدته هي تسكن بشقه في منزل بيت اولاده ومع هذا يمر الشهر ولايسأل عنها يؤلمني هذا الشيء عملت المستحيل بعدها يذهب لوالدته ويزورها وبعدها يأخذ فتره طويله عنها سألت والدته هو لماذا لايزورها قالت زوجته الاولى ملائت قلبه علي طوال الخمسة عشر سنه الماضيه(امك قالت\امك جابت\امك امك....الخ)في كل مره يزورني بها تفتعل مشكله,,,,صحيح والدته تحب نقل الكلام الله يهديها بس هذي امه اخر مره تهاوشت معاه قلت كيف بجيب اولاد منك بكرى يسوون فيني نفس الشيء اللي تسويه فأمك؟؟
كيف تبي ربي يرزقك هذي امك حتى لوكانت سيئه تصرفاتها هي امك انا وزوجتك نزعل عليها ربي مايعاقبنا لكن انت ربي يعاقبك,,,
اخر مره قال غصب عني كل مره اتوجه لبيتها شي يكتم نفسي بالموت ازورها من شهر لشهر غصب عني لي سنتين يعني قبل اعرفك,,,
ارجوكم ساعدوني اجعل زوجي يبر والدته؟؟؟:icon26:

 

[مناكير وردي]

يالطيف
عزيزتي ان كان زوجك بكامل عقله ويسوي كذا لاتتوقعين بكره عيالك بيسوون نفس الشيئ فيك لا حبيبتي انتي مالك شغل
لكن تأكدي ان رضا الله من رضا الوالدين وان كانت والدته مجروحه منه ويألمها تصرفه هذا خليك على يقين يا اختي ان ربي مراح يسامحه وراح يذله وينتقم منه وانتي تشوفين
خذي الاجر لكي وحااااااااااااولي باللي تقدرين عليه بالاستغفار والدعاء له وحثي والدته بالدعاء له وارقي بيتك وزوجك بكل وقت ادعيله بالهداية والله والله لو انا منك واشوف اللي قاعد يصير مايغمضلي جفن من الحسرة تخيلي نفسك او والدتك انتي واحد اخوانك يسوي كذا والله قهررررررر

 

[شيخة النسوه]

هنيئا لك هذا الحرص وان شاء الله انك وفيتي لكن ((لن تهدي من احببت)) ومن تجربتي الرجال مايحب النصح والتكرار عليه خاصه انك اصغر منه سمعية شريط عن البر في السياره حاولي انه يسمعه لوحده وذكري امه دايم انه تعين على بر نفسه ((رحم الله امرء عان على بر نفسه))اعانك الله

 

[غير حياتك]

ديم قولي لة انا اليوم اتصلت علي امك ماعرف اتكلام بس تدعي لك وتقول اللةلايحرمني بعد فترةقولي امك تقول اللة يجعل يومي قبل ولدي اليي هو زوجك وانت قولي احس امك تحبك اكثر اخوانك وعمليلة غسيل مخ بلكلامة الطيبة عن امة

 

[كاتياباسل]

عزيــــــزتي
أهنئك على قلبك الطيب وحبك للخيروحرصك على بر زوجك بوالدته
لكن اللي مستغربه منه تصرف زوجك الله المستعان كيف يهجر أمه كذا
يعني الأسلام نهى عن هجر المسلم لأخيه المسلم فكيف بوالديه؟
*****************************************
المهم واصلي نصايحك لزوجك لعل الله يهديه وأنا ماودي أظلم زوجته الأولى وأحطها بذمتي لكن أحتمال يكون عمل والله أعلم هذا مجرد أحتمال
*****************************************
وبقولك شي ترى والله زوجي دائما أذكره بأمه وأقوله ماسلمت على خالتي ماجبت لها هديه وماأشتريت لها عصاير وفاكهة كل شوي لازم أذكره
هو والله للأمانه بار فيها ويموت عليها ويزورها دائما
بس تدرين بعض الأشياء تفوتهم وهي صحيح أشياء بسيطة بس تفرح أمهاتهم ويدعون لهم
وياحليلها يوم تتقبل القبلة وتقول ياااارب يخليك لي ويوفقك ويخلي لك عيالك
أيش نبي من هالدنيا غير هالدعوات!!!!!!
*****************************************

 

[ولدي انفاسي]

مرحبا خواتي,,
والله مايغمض لي جفن عارفين ليش اتخيل واحد من اخواني يسوي فأمي كذا والله اموت,,
بالنسبه لزوجته انا بعد مااحطها فذمتي بس اللي سمعته ان مشاكلها مع امه قايمه كل يوم قبل اجيهم,,
ودايم ربي يسامحني اكذب على زوجي اقول امك قسم تحبك اكثر اخوانك ودايم تبكي لودرت انك تعبان واكذب على خالتي اقول ولدك والله من كثر الديون وهموم الدنيا بس خلقه ضايق حتى علي انا زوجته,,
المشكله زوجي حنون بشكل فضيع اي شيء ينزل دمعته دايم اقوله لاتدخل لبيتك شيء قبل بيت امك,,
اليوم ارسلت له رساله لاتنتظر بكرى الحين قم من الاستراحه ورح شف امك وبوس راسها وهنيها بالشهر ورد علي برساله مالك شغل سكت شوي وجاني يقول ضايق صدري تكلمت له عن امه قال اسكتي سكت اخذت شوي يتصل علي من عند امه ويقول قلت لامي انك زهقتيني بس امك امك وضحكت حسيت اني بطير من الفرحه وارسلت له رساله دعاء بس انا عارفه هالمره ويغيب عنها فتره طويله انا ابغاه يصير عند رجولها عشان ربي يبارك لنا فحياتنا

 

[مسرعه بشويش]

زوجك حاط قلبه بالثلاجه ليش الحرمه الي هي زوجته تعبي راسه ع امه حتى لو كانت ام لهب هذي امه الله لايبلانا وانتي الله يوفقك وربي مابيضيع لك تعبك ولاتخافي مدامك حريصه حتى ع ام زوجك ربي بيفتحها عليكي واذا عند زياده طنشيهم ع قولتهم يصطفلوا خليك من بيتك ورجلك والله يعينك

 

[مشتاااقه]

مشكوره وجزاك الله الف خير على المشاعر الطيبه
بس يمكن امه كبيره وتبالغ لان الاكبار يبالغووون

وبعدين لو زوجته قست قلبه على كانت ترك زوجته وراح لمه
هو للحين مو رايح ولا بار في امه
مع انتي ولله الحمد فيك الخير نصحتيه ولا راح
انا قلت يمكن حس بزوجته ان ماتحب امه وتزوج ثانيه عشان تهتم في امه
بس ماهتم فيها
المساله مو في زوجته المساله فيه هو زوجك
يعني وبختصار الشديد
لاتحكمين على احد من الكلاااااام

والله يحفظك ويعطيك على نياتك الطيبه وان شاء الله عيالك يبرووون فيك:cupidarrow:

 

[سمتي الوفاء]

حبيبتي لو تكلمت عن شكري لك ما وفيتك حقك
وينقصنا الكثير مثلك في هذا الزمن لكن كثر الله من امثالك
طيب انتي ليش ما تروحين لحها في الاسبوع مرتين
بكذا تدخلين السرور على قلبها وولدها ينزل معك ويسلم على امه
ومع الايام يعتاد ويكون هو بنفسه يروح لها حتى لو ما رحتي
وكمان اشتري لها هديه بين فترة واخرى وخلي
زوجك يقدمها لامه ومع الايام ايضا هو من نفسه يجيب لها
انتي احتسبي الا جر من الخالق

 

[ولدي انفاسي]

الف شكر اخواتي على تفاعلكم معي..
ساعدوني بدعائكم ان ربي يساعدني ويسخره لامه واهله ولايحرمه برها,,,والف شكرا,,