زوجي وعقدت الجمعية

[منار]

مرحبا بنات شخباركم بصراحه انا زوجي عنده مشكلة من الجمعية او السوق يعني اذا قلت ابي اروح الجمعية يتضايق ويقول اكتبي الاغراض وانا اجيبها وانا اقولة انت ماتعرفهم في اغراض خاصة يعصب ويقول لا الحين اشلون اقنعه ان يوديني الجمعية وشلون اشيل العقده من راسه ياليت تساعدوني



مع تحياتي

 

[غير^الناس]

عزيزتي منار ،

زوجج فيه غيره عليج بس مبينها بطريقه مو صحيحه ،

هو ما يبيج تروحين للجمعيه او السوق لان ما يبي احد يلتفت لج

كل شي بالهدوء والتفاهم يتم

لما تطلبين منه الشي تعاليله باسلوب طيب مو تقولين له والله ناقص البيت جذي وجذي ، قوليله ودي اروح الجمعيه أقضي حاجات البيت وليتك تكون معي


والله يسهل امرج

 

[*بلقيس*]

انا مثل حالتج و مادري ليش ؟؟ اشمعنه الجمعية و اذا قلت له بروح السوق عادي ( طبعا للضروره) بس الجمعية على قولتج اكتبله الاغراض و اهوا اييبهم !!!


بس في اغراض خاصة ما يعرفلهم !!!



مادري شنو الحل؟؟

 

[امل الحياة]

اختي انا نفس الشي لما اقول له خلنا نروح الجمعية ناقصتنا اغراض يقول لي اكتبيها وانا بروح لوحدي اجيب
واحيانا اصر اروح معاه يقول لي روحي بروحج مع السايق
مادري شساااالفة

 

[الوجدان]

هلا وغلا
انا تقريبا نفس الشي .. بصراحه انا احب ادور في الجمعيه في كل قسم يمكناكون محتاجه شي وانا مو منتبهه له ...واشوف شنو جديد .. من الادوات المنزليه .. والالكلات .. واخذ وقت طويل .. علشان يكره يوديني الجمعيه ... مايعرف انه مزاج لست البيت .. تدور في الجمعيه .ز

ويهو قال لي مره اكتب يلي.. الي تبينه وبجيب .. ويوم جاب اقول مو هاي .. وليش جبت ذي النوع ... ووي نسيت هاذي ..صار يخلي اخوه الصغير .. يوديني .. ويتهرب من روحة هالجمعيه .. فصرت اخليه ينزلني . وادور فيها على كيفي .. وبعدين يجي ياخذني انا واغراضي ...

يمكن تكون الحاله غيره .. مثل ماقالت اختي السابقه .. ويمكن يكون .. انه مايبي يلف السوق وايد ... ووايد رجاجيل يكرهون روحت السوق .. ودوارة المجمعات غيرنا

 

[نسيم الربيع]

حبيباتي أنا صارلي 8 سنوات متزوجة ما طبيت الجمعية غير ثلاث مرات !!!!!!!!!!

خلاص تعودت عليه هو كذا مايحب يوديني عشان الزحمة أول ما تزوجت صار فيه مشاكل كثير عشان هذا الموضوع وما كنت أسكت وكنت أطلب منه إني أروح أجيب أغراضي بنفس لين ما الله رزقني أولاد صار يقول والأولاد وين نخليهم ؟؟!!
طبعا أنا أسكت وأقول حجته قويه وأنا عارفة أنه حجة تافه شو فيها لو خذنا معنا لعيال للنزهة؟؟!
الحين العيا كبروا صاروا يروحوا مدارس أقول له ودني الصبح على الجمعيه ويطلع ألف حجة يقول وهذولا الصغار ناخذهم الجمعيه معنا ؟؟؟! مافي أمل منه خلاص هم كذا لازم نتقبل الوضع والله يعينا عليهم ويهديهم

 

[إم أند إمز]

بصراحه نحن الحريم يوم نسير الجمعية نآخذ فترة طويلة في التسوووق ونتاخر
نقعد ساعه عند كل رف ونآخذ اللي نباه واللي ما نباه:no:

عكس الريال يآخذ اللي في اللسته ويحاسب ع طوول​

 

[الـعـهـد]

السلام عليكم ورحمة الله وبركاته أخواتي الأميرات والملكات

لفت نظري كثرة تكرار هذا الأمر عند أكثر من زوج

يمكن واحد غيرة كما قالت إحدى الاخوات

ويمكن خوف أو انحراج من حد من الربع .. يعني مثلا ما يحب أو يخاف يطلع الجميعة من زوجته ويشوف هناك حد من اصدقاءه وربعه اتوقع بعضهم يفكر بهالطريقة:icon31:


ووووووووو سلامتكن

 

[نحلة الامارات]

انا اتمنى زوجي ياخذ لستة الاغراض ويروح الجمعيه بروحه على الاقل يفكني من المشوار والزحمه

 

[منار]

مشكورين خواتي على الردود بس انا اذا بروح الجمعية بروج اجيب اغراض خاصة لي مو للبيت لا ن اغراض البيت يكون جايبهم مدري شسوي ابي الحل وعموما زوجي مايحبني اطلع مكان عقدني ومدري شنو الحل معاه


مع تحياتي

 

[ضياء القمر]

الله ايكون بالعون

 

[nice ** heart]

انا من تزوجت اجيب الأغراض معاه حقت البيت لأنه الرجل مايعرف كل شي في اغراض البيت
خلاص زوجي تعود صار هو يقولي روحي معي
وانا افضل ذي رائ وحدة من الأخوات يوم زوجك يجيب الأغراض قوليله مو هذا إلا طلبته ,ليش جبت هذا النوع هذا
مو ممتاز وكذا يتعود بإذن الله

 

[&دره&]

انا اذا ما اخذت ساعه ساعه ونص بالجمعيه اكون غريبه :blush-anim-cl:

حتى لو كاتبه لسته اخذ اغراض زيااده :cupidarrow:

بس في اخر مره كان الوقت متأخر والاغراض اللي ابيها فعلا فعلا محدده :surrender:

زوجي استغرب قال ربع ساعه ترستي العربانه ؟؟!!؟؟:sly:

قتله قول ما شاء الله :blushing:

وبسرعه طلعنا من الجمعيه ولاول مره :clap:

لكن لو مقاضي البيت من ماجله وووو..جان ما خلصت الا بعد ساعه فوق الربع ساعه:crazy::blushing:

بس على مشكلتج قوليله بوقت ما يكون زحمة ووقت متأخر وحاولي تكونين سريعه:surrender:

واا عييى قوليله شغلات خاصه فيني ما تعرفها :blushing:

والله يسهل اموورج:cupidarrow:

 

[عطر الخزامى]

بصراحة زوجي ينحرج لما يشوفنا احد في الجمعية ؟؟؟؟ عادي خصوصا أخواني؟؟؟ سبحان الله واحد من اخواني متسلط علينا عسى ما اطلع انا وياه سوق اول جمعية نلقاه هناك وزوجي ينحرج مع ان زوجي مو صغير ((( فوق الأربعين))) ومره يقول لأخوي سبحان الله انا ما أخذ عطر الخزامي الا مرات معدودة ونشوفك فيها كلمته بالسيارة انت منحرج مني شالسالفه ؟؟؟؟؟

عالعموم هو عادي اهم ما يحبون تعليقات الأصدقاء على بعض

 

[منار]

اشكركم على الردود بس كل الطرق حاولت فيها ماكو فايدة



مع تحياتي

 

[تيماء]

جربي وانتوا راجعين من زياره ولا من مشوار قولي له مر الجمعيه ...وحاولي ماتطولين وتاخذين اللي تحتاجينه وبس

والمرات اللي بعدا عطيه اللسته وخليه يجيبها وكأن ماعندك مانع ...وشوي شوي بيلين وبيتعود

بس اذا قعدتي تحاججينه تكبرين السالفه في راسه ويصير عناد

 

[قلب ذاكر]

انا اقولج يمكن يغير عليج ما الومه اكيد انتى روعه لو بس في عينه
البسي قفازات وتغطي عدل عند الذهاب للجمعيه يمكن يحس براحه اكثر ؟؟ اتمنى فدتج او روحي مع احد من اهلج اذا بيوافق

 

[منار]

اشكرج اخت تيماء وايمان على الرد وانشاءالله بجرب


مع تحياتي

 

[ام النور4]

انا بقول لكم شالسالفة ....ههههههههه
وهذي جات على لسان زوجي يقول لي (اذا رحت الجمعيه بروحي احتاج ربع ساعة بس اذا خذتج معاي بتصير ساعة)لانالحريم الله يحفظهم طلباتهم وايدة وكل شوي يتذكرون طلبات زيادة والرجال يتملل والفاتورة اذا الرجال بروحة تطلع مثلا 500 واذا المدام معاه بالراحه تطلع 1000 حاولوا تتاقلمون مع الوضع مثلي في البداية كنت منزعجة بس بعدين تعودت وصرت اقضي حوايجي الخاصة بنفسي علشان اريحه وارتاح.

 

[منار]

اشكرج ام النور على المرور


مع تحياتي