خريف العمر

[نفرتاري]

ما اعرفه ويعرفه الكثيرون غيري .. ان في بداية الحياة الزوجية .. تحدث الكثير من المصادمات بين الزوجين .. والخلافات اللي مالها معنى .. لعدة اسباب .. منها
اختلاف طباعهم .. اختلاف البيئة اللي تربوا فيها .. كل واحد منهم يبغي يفرض سيطرته
تفكير مختلف .. توجهات مختلفه .. فينشأ خلاف .. او صدام
بس الامور تمر بسلام .. أذا كان في صبر .. وتنازل من كل طرف عشان المركب تمشي .. او ينشأ بينهم نوع من التفاهم بعد كم سنة​

بس لما هالأمور تحدث بين زوجين .. بعد 22 سنة زواج .. هنيه المشكله​

لما ينقلب حال زوج .. بعد هالعمر .. ويصير مراهق .. تستوي المشكله​

لما يترك زوج تجارته واعماله .. ويتفرغ للعب يهال ومراهقين .. هنيه المشكله​

لما يشوف ان ( I phon ) الموبايل يقضي فيه وقت فراغه .. هذي متعه .. هنيه المشكله​

لما يضيع وقته .. مع اليوتيوب .. هنيه المشكله​

لما يكون عنده الرياضة .. والرحلات هوس .. هنيه المشكله​

لما يهتم بقعدات المجالس .. اللي كان في السابق يعيب على روادها ... هنيه المشكله​

لما يجي بعد هالسنين .. وقول اللي ماتطبخ في بيتها .. هي مش راعية بيت .. هنيه المشكله​

وينسى ان هالزوجه شاله البيت والعيال وكل المسؤوليات .. ماجات على الطباخ هو الشي الوحيد اللي مخليته في يد الخدامه​

لما يقول .. ابغي طباخ امي .. يا حلونا بعد هالعمر .. نقول امي​

لما يبتدي يهتم في صبغ شعره بشكل يومي .. مع اني كنت اطلب منه زمان يصبغ .. ويرد علي بالأغنية .. عيرتني بالشيب وهو وقار​

لما يبتدي يفرض على الزوجه .. ما تشاهد في التلفزيون .. ومالاتشاهد .. هنيه المشكله​

لما يفرض على زوجته اتغطى .. مع انه ماكان يهتم قبل .. هنيه المشكله​

نقول غيره .. ممكن .. بس شوفوا التعليق اللي يقوله بعد ما يقولها تغطي وتسمع الكلام
مساكين .. عبالهم انتي حلوه
ارد عليه .. الحمدالله انا حلوة مو محتاجه شهاده أو تقييم من حد​

لما تكتشف في يوم .. انه واقف ينتظرها عند مدخل شغلها ..
على قولته جاي بس عشان يسلم عليها ويروح
حركته مريبة .. ​

كل اللي فوق يهون و اتحمله في موضوع التغيير اللي صاير في حياة زوجي​

إلا مسألة انه ... اول يوم تجيني الدورة الشهرية يفتعل مشكله .. عشان بس ما يكلمني ( يحاربني )
وأول يوم أغسل فيه من الدوره .. يسوي المستحيل عشان يراضيني
صار لها خمس شهور على هالعادة​

يظن اني لوح جدامه .. المهم الفراش وبس
مايدري اني انسانه لها مشاعر وأحاسيس .. محتاجه حتى في ايام عذري الشرعي للإهتمام​

استاذه ناعمه قالت لنا مرة .. الزوج ما يصالح بالكلام وبالأسف .. يصالح في الفراش​

استاذه انا راضية بهالكلام .. بس انا مو لوح .. مو لهاي الدرجة
معلش غضيت النظر .. اول شهر .. وتسامحت مع الموضوع ثاني شهر .. وماكبرتها ثالث شهر .. وصديت رابع شهر
وبعدين؟!!!!! لين متى؟؟!!!​

 

[*روعه*]

هذه اكيد مراهقه متاخره .. والرجال مايتغير من الهوا .. اكيد فيه شئ او احد غير نظرته للامور ..
ما اقصد خيانه .. لك اقصد اصحاب السوء يتكلموا عشان يخرربوا على بعض ..
ومن ناحيه انه يتقرف من الدوره فهذه مشكله اغلب الرجال ولاتسمحي له انه يحسسك بهذا الشئ ..
قوليله انك حلوه في وقت الدورة وغيرها ..

 

[ريماس البدو]

الله يعينج

اعرفي ورا تغير كل رجل((أمـــــــــــــــــــــــرأه))

ادعي انها نزوه مو قلب على اخر العمــــــــــــــــــــــر

عليج بسورة البقره

 

[قطـــــريه]

اختي انتي على قولتج كبيرة في السن وريلج بعد وريلج يمر بالمراهقة المتأخره .. وانتي عارفه هالشي .. والحمد لله انه على أشياء عادية مثل قعدات مجالس ويوتيوب مو نسوان وخيانات وبنات .. طيب انتي بعد اهتمي بنفسج وروحي صالونات وقصي شعرج وين العيب ؟؟ ليش لين كبرنا لازم ننتظر الموت ؟؟ مايصير اختي حرم نفسه واهمل نفسه فتره شبابه خليه الحين وين الغلط .. لا تكبرين الموضوع .. وايد شياب نشوفهم نفس الشي يسوون يتشببون هي فتره وبتمر .. وموضوع الدورة كل الرياييل كذا لا تلومينه هو اصلا مب عارف شفيه ونفسيته صارت زفت ومب عارف ومايبي يعترف انه كبر في السن في ناس هاي طريقتهم لرفض الشيخوخة .. اصبري عليه شوي بيرجع ..

 

[نفرتاري]

اللي اعرفه وواثقه منه .. انه مو قادر يجاريني
شكلاً وموضوعاً انا اصغر منه بوايد .. الحمدالله .. مهتمه بنفسي .. وبثقافتي وبشغلي
لاقي اللي يشغلني بعيد عنه .. ومو همي هو
اللي مضايقني .. انه مو عامل اعتبار لمشاعري
ومحتاره .. شنو التصرف الأمثل اللي اتصرفه معاه؟
هل اني اتغاضى عن تصرفاته؟ .. ومارده يرجع .. لأنها فتره وتعدي
او اني لازم انتبه لبعض الشغلات؟​

ساعات احسه وااااااااااااااايد يغير
وساعات احسه.. انه يلعب .. واني مو داحبه عينه​

ماادري​

 

[meme99]

اختي مالي الا الدعوة اليكي في ضهر الغيب
انو يفرج كربك وهمك ويسخر زوجك اليك
وترتاحي في دنيتك

 

[دنيا العالم]

مراهقه متاخره تمسك فتره وتروح من حالها

 

[ذكريات مره]

كان الله بعوونك ياارب
لازم تنتبهين له وتراجعين نفسك معه في بعض الامور يمكن انو في شي بحياته مغيره انا ما ادخل الشك بداخلك انو في حرمه او بنوته صغيره
الافضل لك طنشيه بس تكونين منتبهه له يعني طنشي وراقبيه وراح تفهمين وش فيه واذا استفزك بشي الافضل انك ما تردين عليه عاااامليه ببرود تكفي ناظريه بنظرات وبس
انا اقول هذي مرااااهقه متااخره
الافضل انك تروحين لمشغل وتغيرين لون شعرك وتغيرين ستايلك كاامل خليه يعرف انك حتى انتي مهتمه بعد مو بس اهوو
كان الله بعونك ياارب

 

[الوفية لزوجها]

حبيبتى والله تاثرت كثيرالك لاننا نتقارب في السن والموضوع هذا حساس جدا خاصة بعد هذا الارتباط الذي دام اكثر من عشرين سنة

اولا انت لازم تعرفي ان هذه المرحلةتكون خطيرة جدا والتى تقول انها فترةوتعدى اقول لها لا
لان الزوجة في هذا السن تكون في اشد الحاجة لزوجها بعد العيال ما كبروا وتزوجوا وبصراحة الدارسين لهذا الموضوع يقولون ان هذا هو السن المناسب لبداية حياة زوجية جديدة

طبعا عند الازواج بشكل عام

والخلل الذي يحدث للزوج هو مراهقة متاخرة

والشيء الخطير الذي يمكن ان يحدث ويكون صدمة للزوجة هو زواج الزوج باخرى لهذا

انت ما لازم تنامى وتقولى فترة وتعدى كافحى من اجلك ومن اجل البيت التى افنيت سنوات في خدمته اتخذي كل السبل لاستعادة زوجك سواء كان الاهتمام بنفسك او بيتك او...
الاهتمام به خاصة ومراقبته من بعيد مدح لباسه واهتمامه بنفسه عيشى معاه تغيره وتغيري انت كمان واياك والانتقاد ثم ايا ك


هل استرجعتى ذكرياتك مع اولادك اثناء مرورهم بهذه المرحلة انهم يحتاحون للحب للمسات للكلام العاطفي يحتاجون للمدح وووو...

جربي مع زوجك كل هذا
اخيرا اهتمى بالجانب الدينى كالصلاةوالذكر امامه والدعاء له اثناء حضوره
شاركيه هواياته وتناقشي معاه وباذن الله
راح يقوم من غفلته

 

[{نوتيلا}]

الله يعينك و يسخرلك زوجك
كلها كم سنه و اصير بنفس مرحلتك الله يستر بس

 

[نور1199]

هذي يسموها جهلة الخمسين لاتخافي شوي ويرجع زي ماكان

 

[قطرات ثلج]

الله يستر من كبر الرجال وهو يبدا يهتم ويشووف نفسه ويحب تمدحه اي امراءه عشاان يثق بنفسه

 

[@غلا@]

عادي حبيبتي زوجي عمره اربعين وبدت عليه هذي الحركات يبغون يبينون لنا إنهم لسا شباب في العشرين ويسون حركات ........طنشي واهتمي بنفسك ودلعيه عادي وامدحيه عادي وكأن موشي غريب
قوليله وين هالحركات من زمان ابغاها ياحلوك ومن هذا الكلام
وإذا ايام الدوره طنشي الهوشه ولا تعتبريلها اهتمام ومشي حياتك عادي وخليك واثقه في نفسك بس والله يعينك ويعينني