حياتي فوضى .. تعبت تعبت

[P I N K]

السلام عليكم ورحمة الله وبركاته

بنات ابيكم تساعدوني تعبت من الفوضى حياتي كلها فوضى
ولدي عمره سنه والله يحفظه حركي وحوسه واي مكان ابي اروحه وراي وراي مايخليني اسوي ولا اي شي وفوق هذا نومه مقلوب وموراضي يتعدل ماينام الا الصباح ويجلس بالليل وانا معاه انام الصباح
ومظطره اصحى بدري عشان الصلاة والطبخ
حياتي كلها صارت طبخ وتنظيف كاني خادمه واربي ولدي وبس
حتى زوجي مانام معاه
اهملته
واهملت نفسي ماكاني وحده بالعشرين لااهتمام بشكل ولا لبس ولا اي شي
للعلم توني متخرجه وشهادتي معلقه زينه لاني لو بفكر بوظيفه ياانهم بيفصلوني من اول اسبوع ولا انا بيجيني انهيار من هالفوضى
ساعدوني ابي حل يفكني من هالفوضى اللي اعيشها
والله اكتب لكم وانا ابكي راسي مصدع وولدي يحن فوق راسي

 

[P I N K]

علما بان زوجي رافض فكرة الخادمه نهائيا

 

[تاغي]

حاولي تنظمي حياتك وتسترخي وتعودي ولدك على النوم بدري وبيتك حاولي تنظمي الوقت في الترتيب
يعني مو طول الوقت وانتي ترتبي حاولي الترتيب يكون غرفه غرفه وفي النهار بس
اما الليل خلي لكي واهتمامك بنفسك اعرف الموضوع صعب في البداية خصوصا مع طفللكن كله يعتمد
على التنظيم اتمنى البنات يفيدونك اكثر

 

[بنتي هي دنيتي]

حاولي ترتبين وقتك صح بتتعبين في البدايه بس بالنهايه بترتاحين وبعدين عندك وعندنا خير هذا جالسه أكتبلك وبنتي على حظني وتمعط شعري بس وش إنسوي هذي الحياة يبيلها كد وتعب بس إنتي لاتخلين تفكيرك كله باهالشي عشان ماتتعب نفسيتك بس إنتي نظمي وقتك وحاولي قد ماتقدرينن لأن هالشي يبيله وقت طويل إشوي والله يصلحهم إنشالله ويهدي سرهم ........

 

[ام النواعم]

عزيزتيP I N K ...
كثير من النساء في بداية حياتهن الزوجيه خاصه في وجود طفل لاتستطيع أن توفق بين البيت والزوج والطفل ..لكن نصيحه لك نظمي وقتك فقط ... فطفلك عوديه على النوم في الوقت المناسب فأذا نام في وقت سيجعله يسهر في الليل مثل وقت المغرب أتركيه ينام قليلاً يعني ربع ساعه وصحيه من النوم علشان ينام بسرعه في الليل ولاتخلينه يطول في نومة النهار وشوي شوي يتعود على نوم الليل...
وبعدين لاتتركي شغلك يتراكم على بعض خلصي كل شي أول بأول ...وحددي يوم معين للتنظيف الكلي وفي كل يوم بس مسح وكنس على السريع ..ويوم للغسيل وأطلبي من زوجك أن يساعدك مثلاً يجلس مع الطفل اذا كنتي مشغوله..وبعدين أنتم مازلتم عائله صغيره قادره بأذن الله السيطره عليها ....وشلي فكرة الشغاله من بالك لسه بدري على بلاويهم وأتكلي على الله وأسأليه دائماً بأن يعينك على قضاء حوائجك ولا تنسي أن تقولي سبحان الله 33 والحمدلله33 والله أكبر34 قبل النوم كل ليله..:icon30:

 

[*بشرى*]

حبيبتي اهتمى بنفسك ودلعى زوجك لايطير منك

 

[سيدة القصر 2]

جزاك الله خيرا (أم النواعم)على هذا الرد الرائع وأحب أن أزيد عليه كلها أيام وسوف يكبر طفلك وتزداد خبرتك في تنظيم حياتك بس لاتدعي اليأس والضيق يتسرب إلى نفسك ولاتكثري الشكوى لزوجك حتى لايحس بعدم قدرتك على تدبير حياتك المنزليه ,والله يعينك.​

 

[أم فهد 123]

انتي لسه في اول حياتك وهذا شي طبيعي لكن حاولي ترتبين وقتك اهم شي نوم طفللك لا تنيمينه في كل وقت رتبي نومه حتى ينام الليل وتتفرغين لبوالعيال ورتبي الشغل مثلا الغسيل يومين في الاسبوع الكوي وديه لخدامةاهللك وعطيها فلوس الطبخ جهزي ثلاثة ارباعة من الليل طبعا الكنس ما يحتاج كثير و مره في الاسبوع خذي ابنك عند جدته او خالاته يمسكونه لين خلصين الشغل او تروحين المطعم مع زوجك والله يوفقك

 

[UNIQUE BLUE]

السلام عليكم و رحمة الله و بركاته

و الله يا اختي انا بنتي كانت مثل ابنك و اكتشفت ان الموضوع يريد قوة قلب, يعني خليه ينام شوي العصر و خلليه يلعب طول اليوم عشان يتعب و بالليل خلليه يبكي و طنشيه لحد ما يتعب و ينام و الشغل لا تخليه ياخد من وقت زوجك... خللي ابنك ينام و تفرغي لنفسك و زوجك و لا تنسي قراءة القران انشالله الله بيهديه و بينتظم و زوجك لازم تهتمي فيه و الله المستعان انشالله

 

[P I N K]

تاغي شكرا لك واكيد الشغل بالنهار افضل لكن ولدي مو مخلي ليلي ليل ولا نهاري نهار عنيييييييد جدا

.....................

بنتي هي دنيتي الله يخلي لج بنتج وقلة النظام مع الاطفال تسوي الحياة كابوس

....................

ام النواعم مشكوره عزيزتي على نصائحك القيمه وانا الحين اطبق حبه حبه وبحذف الطبخ الاسبوع هذا عشان اتفرغ له واخليه مثل العالم
...................

بشرى المشكله هذا الازواج كل شي يبونه كامل واي نقصان على طول زوغان عيون وفلتان الله يعيينا عليهم

..................

سيدة القيصر شكرا لك والله كل يوووووووووم اقول متى يكبر يمكن يعقل ويفهم لكن المشكله بيجون اطفال غيره اهم شي تنظيم نومهم عشان الحياة تتنظم بس شسوي لصار الطفل عنيد مثل اللي عندي

..................

ام فهد
كلامك صح لازم من الجدول لتنظيم الوقت بس مدري ليه مزاجي يتعكر لما اكون مو نايمه كويس ومالي نفس اسوي اي شي
واخر اليوم اكون منهاره واهو لسى باديه السهره عنده

....................


UNIQUE BLUE

الله يسمع منك ويهديه وانا حاليا اعمل على النصائح
بجد تعبت الله يهديه يارب

 

[abc.abc]

الناس راح تقول عني مجرمه لكن مافيه حل اذا تلخبط نوم الطفل ممكن يجلس اشهر وهو ملخبط وملخبط حياتك انا اذا حاس في نومه اعطيه هستوب في الليل وينام مره وحده مايضر وينضبط نومه وتتعدل حياتك

 

[عزيز الروح]

حاولي ترتيب امورك في نموذج مرتب ومنظم حيث ان الطفل يحتاج الى النوم الكافي

اي اجعلي له اوقات نوم ورضاعة ..

اوقات للعب والمرح .. واجعلي ايضا اوقات الى نفسك ..

ولا تجعلي هذة الفوضى ثؤثر على مجرى حياتك

اجعلي نفسكٍ دائما مبتسمة لكي تشعري زوجك بذلك

لانة لو حصل العكس سوف تكون العواقب وخيمه ..


تحياتي

 

[تحيه للعلم]

بنك كلنا مرينا بهالمرحله بس شوي شوي وبالتدبير والتفكير السليم بتكون حياتج احسن اهم شي الحين

هو التنظيم وان شاءالله ماراح تتعبين الحياة حلوه وبيدج انتي اللي تخلينها حلوه بعينج او تعب بتعب

حاولي تقومين ابجر شوي وقعدي ولدج وسبحيه وعطيه اكله وخليه عند العابه او بالحباسه مع العابه حتى

لو يبجي ماعليج منه عشان انتي تخلصين شغلج وخليه يكون معاج بنفس المكان اللي بتنظفينه المهم

يكون يمج عشان ما ينام وطول وقت شغلج سولفي معاه عشان ماينام وبعد الغدا نامي معاه شوي قبل صلاة

العصر وصلي العصر وعقب قعديه وحاولي ماتخلينه ينام الا بالليل وبجذي ان شاءالله تتعدل الامور

ويصير لج وقت حق نفسج توج في بداية الزواج طفل واحد وتعباانه؟؟

لا انتي ان شاءالله قدها وشاطره وبعلمينا بكل جديد بحياتج وتشاركين معانا اكثر من كثر الوقت اللي

بيصير عندج بعد التنظيم باذن الله وعليج بالاستغفار والدعاء وكل شي بيصير تمام والله يوفقج:blush-anim-cl:​

 

[ثقتي عاليه]

هلا حبيبتي
اكيد الخوات ماقصرو بس في شي ابي اقوله اذا تميتي تهتمين في الطفل والبيت متى راح يكون اهتمامج في نفسج وفي زوجج اعرفي انج انتي اهم من كل شي اهم من اشغال البيت اللي ماتخلص المفروض تدلعين نفسج وخلي زوجج يجيب خدامه او جيبي خدامه بيت ابوج او بيت هله كل اسبوع او كل كم يوم عشان تساعدج وانتي جي راح تتفرغين للطفل ولنفسج ولزوجج اكثر

 

[شفيلد]

السلام عليكم
بقول شيء غريب ولكن احتمال ينفع
غيري اسمه

 

[تاج الاحزان]

اسعد اوقات حياتي لما كنت ربة بيت كنت انظم وقتي اعتني بطفلي وارتب البيت واقوم اطبخ ولما يجي زوجي يلقاني واقفه انتظره على الباب اه اه ذكرتيني بذيك الايام وما اتغيرت حياتي الا لما جاتني الوظيفه وهنا يا الغاليه انقلبت حياتي الى فوضى عزيزتي دام عندك ولد واحد نظمي وقتك بحيث اقومين بدري وتنظفين البيت وتطبخين للغالي وبعدين اتصحين طفلك وتهتمين فيه وبعدين اهتمي بنفسك وانتظري زوجك وواقول تحاملي علىنفسك اختي غيري الروتين الي انت فيه اهتمي بنفسك اولا ثم باقي الامور وترى صبر الزوج قليل بكره حبيبتي تندمين اذا اهملتيه بكره بنت حرام اطيح عليه وبسبب اهمالك حيضيع منك وانت توك اصغيره ان شاء الله تقدرين اذا كثرت من الدعاء والاستغفار اما الشغاله ليه اتيبين حق نفسك بلاء اخذي خدامه نظام تأجير او شغالة اهلك لمدة ساعتين اتساعدك لما يكون زوجك في الدوام والله يهون عليك

 

[loloasa]

الصراحة لازم شوية تنظيم عشان ترتاحين هي بداية الزواج متعبة شوي ولكن مع الوقت سيكبر وترتاحين بس عوديه على النظافة والترتيب وما يرمي اوساخ عزك الله على الأرض عشان يتعود على النظافة وانتي ترتاحين بعدها

 

[عطر الايام]

حبيبتي الله يعينك نفس حالتي مع أولادي

 

[قلبي رقيق]

خذيلك يوم بالاسبوع يروح ولدك عند اهلك او اهل زوجك وانتي شوفي نفسك بهالساعه.. اتفقي مع كوافيره تجي البيت تنظفك وتسويلك حواجبك ..الخ
طبعا لا تنسين المحبس او الحاجز حطي ولدك فيه عشان ما يحوسك وحطي معه العاب
انا احيانا اجيب المسبح حقه وهو فاضي مافيه مويه اجيبه في الصاله انا اشيل حلاوه وهو يلعب في المسبح مع العابه
اتمنى اني افدتك وقدرت اساعدك