حمله الاستغناء عن الخادمات يالله منو منكن بتشارك في هالحمله

[حبيبي دقايق من وقتك سلف]

بسم الله الرحمن الرحيم
اشحالكن خواتي ملكات منتدى بلقيس مبروك عليكن الشهر وكل عام وانتن بخير وصحه وسلامه
على كثر ماسمعت وقريت قررت استغني طول العمر عن الخادمه
وأسأل الله الثبات على قراري هذا وان يقويني ويسهل عليه في اني اقوم بواجباتي على اكمل وجه في أقصر وقت ممكن ...آمين
والله ياخواتي الفاضلات من دخلن الخادمات بيوتنا ونحن سلمناهن الخيط والمخيط
واتنازلنا عن واجباتنا مايانا الخير
اتعودنا على الكسل
الحين الخادمه هي ترتب السرير تكوي الثياب ترتب الكبت تغسل الملابس حتى ملابسنا الداخليه والي المفروض محد يلمسها غيرج استوت الخدامه تغسلهن واتعرف انج اليوم كنتي لابسه شو ؟؟
وكرمتن بعض من البنات وبعض من المتزوجات مايهتمن اذا خلوا الخدامه تشوف الوصاخه من الافرازات أو دم الدورة على الملابس الداخليه !!!
ليش نسلم الخادمه بيتنا ونعطيها الاحقيه في هذ الشيء ؟؟؟؟؟
الحين الطفل ابو خمس سنوات اذا عطش طلب من الخادمه تحضرله الماء
بدال لانعود عيالنا انهم يخدمون نفسهم بنفسهم يالسين نعلمهم الاتكاليه والكسل بدون ماانحس !!!
سبحان الله حتى نحن معتمدات عالخادمات اعتماد كلي شوفيها لو أنا كويت عباتي وشيلتي وكويت ثياب ريلي وعيالي وخميت غرفتي والصاله وغرف العيال وليش ماخلي
اعيالي اولاد وبنات ايرتبون شباريهم وايحطون ثيابهم في سلة الملابس وعلميتهم على النظام بلعكس بهاطريقة بنولد فيهم روح التعاون والمشاركة بين الاخوان ..
بتكلم عن نفسي وبكل صراحه أنا وحده في بيت أهلي كل شي اباه الخدامه تسويه لي لاعمري كويت ولاغسلت ثيابي ولااعرف اشغل الغساله ولاارتب فراشي ولااخم حجرتي ولااغسل حمامي ولاشي يمكن كنت اللهم اعرف ادخن واعطر الحجره بسسس
حتى اذا طبخت بعد مااخلص الخدامه هي الي اتغسل الجدور والمواعين
بعد ماتزوجت بديت استوعبت انه هالشيء غلط اول شيء قمت اول مااصبح ارتب الشبريه بعد مااتسبح ارشش الحمام وانظف مقابض المغسله والرشاش قبل لاالخدامه تنظف وملابسي الداخليه انا اغسلها مع انها نظيفه لاني دايما استخدم الفوط الصحيه اليوميه من يوم كنت بنت مع هذا مستحيل اسمح للخادمه تشوف ملابس الداخليه وتتخيل انا شوكنت لابسه هذي امور خاصه فيني ومحد له الاحقيه في انه يطلع عليها غير صاحب الشأن
وقمصان النوم نفس الشي ماخليها اتشوفهن
معدى البجايم ولبس النوم العاديه مالت البيت والبدل والعبي
بعد ماسمعت عن الخادمات قمت الاحظ الخادمه عينها دوم على لبسي واغراضي
واذا عطيتها ظهري تراقبني واتبحلق في ايدي ونعالي الي البسه حتى زوجي من تشوفه ماتنزل عينها الوقحه ... استخرت ربي وسفرتهاااااا والله راحه مابعدها راحه
مابقولكن مامريت بصعوبات لكن شوي شوي اتعودت قمت احس الدم يمشي في عروقي من الحركه مب كله يالسه ولا طايحه صدق انه فالحركه بركه اللهم لك الحمد
بديت اطبخ واتعلم اكلات واحس اني انثى وراعيه بيت مثل مالريايل عندهم هوايات وطلعات ويالشباب شغل البيت والطبخ والتنظيف يلهينا ويشغلنا قمت ماحس بالملل بلعكس احس اني يالسه اسوي شيء في حياتي وهو دوري الاساسي كا زوجه وربة بيت واحتسب الاجر عند الله
مابقولكن اني سوبر ومن لااااا انا وحده نقطة ضعفي الكواي مااحب اكوي وايد
بس جبرت عمري ويالسه احبب عمري فالكواي :nosweat: ولا احب اغسل الصحون والجدور :thumbdown: بس شو بقول اغسل الجدور ولا ايبلي خدامه تسرق راحة بالي:icon30:
طبعا انا فتحت الموضوع عشان نشجع بعض ونتناقش ونحط حلول واقتراحات في التخلي عن الخادمه :showoff:
يالله كل وحده ماعندها خدامه تقولنا تجربتها والي ناويه تذلف خدامتها بنوقف وياها
واي وحده تعارض كلامي سجلي رايج وحيااااااااااكن الله

 

[شوشو@]

كلامك سليم امية بالامية
بس اختي انا حاولت استغني عنها لكن ماقدرت
اول ماروحتها الأمر بالنسبه لي عادي لكن مع مرور الوقت بديت اتعب وماأقدر
صارت نفسيتي أعوذ بالله زفت دايما معصبة على اولادي وزوجي حتىصرت ماأقدر امسك اعصابي أي شي ينرفزني ولا فية وقت أقعد على حيلي من يوم أصبح لحد مأنام وانا أدور في ذالبيت حتى صرت ماقدر اطلع وأغير جو لأني لو بطلع بينعفس البيت من الأستعداد للطلعة واذا رجعت اتوتر الكل يشدني من جهه هذا يبغى الحمام وهذي تبغى حليب وهذا يبغى أغير ملابسة مدري شسوي بحالي بعدها خلااااص ماقدرت أستحمل جبتها وأنا كارهه وجودها في البيت لكن وش اسوي اجبرتني العفسة اللي صارت معي وبعد كل هذا مازلت ودي استغني عنها​

 

[روعة روح]

ممكن بعد نجيب اللي بالساعات

انا اسوي كذا اجيبها تنظف الاشياء العميقه زي الدرايش والابواب يعني زي كذا

وان كنت مره مشغوله اجيبها تكوب بس ولا انا اغسل

 

[الوفا]

بصراحه صعبه نستغنى عنهم وخاصة البيت كبر والاطفال بسم الله عليهم كثرو لهم متطلبات وشغل مايخلص وزوج وطلباته الخاصه انا مؤمنه انه الله خلق الارزاق ووزعها فهذا رزق للمساكين اللي يحتاجونها وقال الله تعالى لاتجعلها مغلوله ولا تبسطها كل البسط يعني كل شي بمقدار عليك بالاعتدال بكل شئ بحياتك تلقينها سهله اما مسألة اسلمها الخيط والمخيط هذا غلط وصعبه واذا احد مسويها يستاهل مايجيه منهم واذا انتي اختي توك متزوجه وبيتك على قدك صدقيني راح تقدرين تستغنين عنها وبراحه وحتى لو عندك طفلين او ثلاثه لكن اذا البيت كبير والاطفال اكثر عدد صعبه جدا
اعطيك اقرب مثال ايام اول لما الاسره كلها مع بعض والكنات يتساعدون ويوزعون عمل البيت على بعض وكل وحده لها يوم وايضا البنات كانو مع امهم يد بيد يشتغلون لكن الحين وين اللي يساعد ويشتغل من العيال صعبه جدا ما احبط عزايمك ان شاء الله تلقين حل وموفقه

 

[الأسطـــــورة]

فعلا اصبحن الخادمات شر لابد منه
ياعزيزتي المرأه العامله تلزمها الظروف احضار خادمة بينما ارى ان ربة المنزل عندما تحضرها يدل على الدلع والكسل في هذه الحاله الاستغناء عن الخادمه افضل

 

[lovely1]

لخادمات شر علينا وعلى بيوتنا لابد من التخلص منهن ومن أذاهن

 

[لمسة لؤلؤ]

كلامكم سليم لكن كيف نقدر نوفق
بين شغل البيت واالبقاء على سنقة عشرة قدام الزوج وووو ...
الله يعين فعلا الخادمة شر لابد من التخلص منة

 

[مرسى]

حبيبة قلبي انتي
الله يعطيك الصحه والعافيه اللي إن شاء الله ماراح تحتاجين معها للشغاله
انا الحين عايشه عند اهل زوجي والعايله ماشاء الله كبيره وبحاجة شغاله بس بحول الله وقوته وتوفيقه اطلع عن قريب وبإذن واحد احد فرد صمد ماراح احط ببيتي ( دماره ) قصدي (شغاله )
أهنيك واتمنى لك كل خير وإن شاء المولى أصير مثلك

 

[عضو سابق]

السلام عليكم ورحمة الله وبركاته



عزيزاتي ..

أهم ما بالامر.. هو كيف لصاحبة البيت ان تدبر أمرها حقا في بيتها وخادمتها..

فهذا بيتها وهي من تتحكم به وتتصرف به..


فمثلا انا لدي خادمه.. ولكن منذ قدومها للبيت افهمتهاجيدا قوانين البيت الذي ستسكن فيه..

أوله / النظافه .. نظافتها الشخصيه .. ونظافة البيت..

ثانيا / ان لا دخل لها باطفالي بتاتا.. فأنا أمهم وانا المتكلفه بهم..

ثالثا/ قلت لها اريدك ان تشتغلي من غير ان تتكلمي بامور غير ضروريه

.. فأنا لا احب الثرثره.. (( حتى تحزم أمرها معي )).. ولا تتكلم الا بامور تنقصها أو تحتاجها..


رابعا / الطبخ علي وليس عليها..


خامسا / وهو مجمل الموضوع .. أن يكون شغلها الشاغل فالبيت هو التنظيف

وغسل الملابس وكي الملابس فقط.. والامور الأخرى فأنا اتولاها وليست هي..

واهم ما فالامر / ان تكوني جديه عند التحدث اليها اي رسميه لا تدخلين المزح معها باي وقت

وان تختصري الكلام معها.. حتى تكوني غامضه فتخافك وتحترمك اكثر..

فهكذا مشت على ما اريده أنا.. وليس ما تريده هي..

ولله الحمد فهي مرتاحه كثيرا.. لدرجة انها تستحتي احيانا ان تتكلم معي..

احتراما لي.. لانها لم تجد معي سوى الاحترام والطيبه .. ولكن بحدود الكلام المختصر والمفيد..



حفظكم الرحمن

 

[مرسى]

إمرأه لاتنسى
احترم رأيك واسلوبك معها محل إعجابي ولكن سبحان الله وجودها نفسيا مايريحني لإن عايلتي صغيره إذا إستقليت ببيت بروحي
وإن شاء الله اكون قد كلمتي
تقبلي تقديري

 

[عضو سابق]

غاليتي/ مرسى..


هل تعلمين عزيزتي.. ان لكل بيت له ظروفه ربما تكون هناك بيوت فوق مقدرته وفوق طاقته..

فمن المتزوجات من يعملن.. ومنهن من يكون منزلها كبيرا جدا.. ومنهم يكون عدد الافراد فيه كبير..

مما يسبب في ارهاق وتحطم كاهل الزوجه.. فكم وكم ستتحمل .. فهي بالاخير انسانه وزوجه وام..

وتحتاج الى فترات راحه واستجام لنفسها.. فلما ترهق نفسها .. حتى تصل لنفسها والله كانه عجوز..

فلقد رأيت الكثير منهن هكذا.. بسبب اعمالهم الشاقه بالبيت..

همها الشغال فقط هو التظيف والتشطيف والابناء والزوج.. اما نفسها فلا يوجد لديها الوقت

لان هذه الامور التي ذكرتها ابدا لا يتوقف فالغسيل والتنظيف ومقابلة الابناء يوميا ..

فما المانع بالاستعانه بالخادمه.. ان كانت صاحبة البيت على وعي كبير بمخاطرها..

فتاخذ حيطها من كل النواحي.. ولا تدخلها بأمور لا تريدها.. الزوجه..

حيث تحدد لها ساعات معينه للتنظيف داخل المنزل..

فانا مثلا اعطيها ساعه ونصف الى ساعتين صباحا.. تقوم بتنظيف المنزل من الداخل..

ومن ثم تخرج الى غرفتها ..فلها غرفه خاصه بالخارج.... ولا تدخل الى الداخل الى بأذن مني..

فآخذ راحتي ببيتي ومع ابنائي.. . وتكون هي مرتاحه ايضا حيث تكون غير مرهقه بالاعمال..

حيث اقسم الاعمال المنزل علي وعليها.. كما ذكرت سابقا..

صدقوني اخواتي .. ليس العيب فالخادمات كثر ما العيب في ادراة البيت لهم..

فكلما كانت ادرة المنزل جيده وحازمه ومنظمه كلما كانت الخادمات كذلك..

والعكس صحيح تماما..

حفظكم الرحمن

 

[مرسى]

حبيبتي إمرأه لاتنسى
انا ياغاليتي اتحدث من وجهة نظر شخصيه لاني كما ذكرت عائلتي صغيره واستطيع حاليا اقول حاليا السيطره على الوضع ربما قناعتي ستتغير مع اختلاف الظروف من يدري
يكفيني شرف تكرمك بالرد على رأيي
حفظك المولى واسعدك ياغاليه

 

[&الامل الخالد&]

اشكر اختي صاحبة الموضوع

فانا منذ ايام احاول اقناع زوجي بالاستغناء عن الخادمه

فانا لا اتحملها احب ان اكون حره داخل مملكتي ومع زوجي واولادي

احب ان اكون قريبه من اولادي اربيهم وادلعهم

اعرف كل صغيره وكبيره في البيت

ولكن احب التنويه

ان هذا يعتمد على امور كثيره

مثل هل الضيوف عندك كثير وبذلك لابد من الخادمه

او هل اولاد كثر واعمارهم متقاربه فتحتاجين للمساعده

او هل الزوج لا يراعي مشاغلك عندها لابد من الخادمه عشان اسكات الزوج

امور كثيره تقيسها المرأه على نفسها وبيتها وتدرسها

وبدون تهور وعاطفه حتى تحدد ما اذا كانت تستطيع الاستغناء عن الخادمه

انا عن نفسي بسبب ولادتي احضرتها والان احس بالكسل والطفش

واكتشفت ان الراحه النفسيه اهم من الراحه الجسديه

فطبيعتي احب النشاط والترتيب واشعر بالفخر بالاهتمام بالاولاد دون الحاجه لخادمه

ولكن عند وجودها يدب الكسل والاهمال وهذا شي لا يرضيني ابدا

عندها قررت الاستغناء حتى تعود لي السعاده والراحه النفسيه

ادعوا من كل قلبي ان ابو الشباب يوافق على الاستغناء عن الخادمه

 

[سمرلاند]

امرأة لا تنسى كلامج عين العقل
وهو يشبه تماما" رأيي في هذا الموضوع..:cupidarrow:

 

[بنت الرجااال]

السلام عليكم
انا معاكم في الحمله شغالتي مسافره وزوجي مارضى يقدم وجلست مع نفسي واقنعت نفسي اجرب فترة بدون خدامة واشوف النتيجة وان شاء الله خير لاني بجد مرتاحه نفسيا وفيه شغالات بالساعات ان كنت مضطرررررررررررره وربي يعيني ويعينكم

 

[سمرلاند]

حملتكم هاااذي بتنسيكم الراحة والدلال
اذا كنت اقدر اعيش سيدة مرتاحه مخدومه..ليش التعب والكرف..!! :thumbdown:

 

[بسكوتة]

والله اللي تقر تجلس بدون خادمة يابختها طلما هي مدللة نفسها

بشرط توفر كل التسهيلات عشان ماتهلك نفسها

غسالة صحون غسالة اتومتيك للملابس نشافة الفود برسسر بانواعه واهم شي لازم تلاحظ نفسها

لا تستهلك طاقتها لانه زوجها راح تطلع عينه لبرا

وكمان ماتترك المكان بدون ترتيب لانه يمتص الطاقة الايجابية

عن نفسي اتمنى لكن بصراحة ما اقدر انا مو متعودة في بيت اهلي ومدلعة كنت على الاخر والشي الثاني عندي اطفال صغار سنونهم متقاربة جدا فيقلبوا لي البيت فوق تحت

وان اتوفر لي مكان في بيتي للخدامة خارج البيت مثل امرأة لاتنسى فعندها ساستقدم حاليا انا تحضرني خادمة بالساعة رغم انها مرات تعتذر في اخر لحظة او تتعطل السيارة الا اني نفسيا مرتاحة والحمد لله