حالتي انا ويا زوجي .. ســاعدوني ..

[كلي حنو]

بناات شوفوو حالتي انا ويا زوجي .. مضايقتني بالمرره ..

انا ويا زوجي اقل شيء سويتها مشكله انا بنفسي مو عارفه السبب

مع انه والله مو مقصر ويااي ولا بحاجه انا اللي مقصره ويااه بأشيااء

كثيره والله .. ودائما اذا زعلت جااء هو وراضاني حتى لو اصلا

هو ماسوى شيء انا كذا ازعل ولا ارضى الا لما هوو يجي ويراضيني

ولا ارضى والله ع طوول ليين ما يسووي حركه ويخليني اضحك والا والله

نادر ما ارضى ع طوول زهقت انا من هالحاله شقتي والله صرت اكرهاا

والسبب الهواش اللي بينا صار احسه كل يتهرب من الشقه ياطالع او داخل

او انه يقولي نروح بيت اخته كرهت بيت اخته والسبب من كثر مايقولي

قومي نروح وقومي نرووح صرت عصبيه والله ذي الاياام بزياده عن اللزوم

قبل وربي مو كذا ما اقولكم قبل اي احد يغلط علي ارد عليه لكن الحين

احس اني والله زايده مو عارفه لييه .. زهقت من الوضع اللي انا فييه ..

وكل ما اقول بغير من وضعي وربي ما اتغير ولا شيء لدرجه اني صرت

الشقه اذا جااء ودي يجي الجمعه عشاان اجي بيت اهلي من الزهق اللي هنااك

وعشان يروح مكان دوامه ولا يرجع الا الربوع ودي هالاياام ماتجي بسرعه

بس عشاان مايجي والله لاني ازهق بالحييل هناك من كثر ما ازعل انا واجلس بروحي

وهو بروحه او انه ياطالع ياداخل زهق والله حييل مدري الا متى راح اتعدل انا

واصير حرمه عدله .. مع ان توني من تزوجت 5 شهور .. وجلست ويااه سنه كامله وشهرين

خطوبه .. لكن الله يعيين والله ..

مو عارفه شنو السبب اللي يخليني اسوي كذا .. يعني رجال طيب

وحنون ويااي اعامله هالمعامله .. وكل ماصاار مشكله قلت له هذا انت

بيت اختك وبيت اختك كل اجيب طاريهاا بالموضووع والله صرت احقد عليهاا

بشكل مو طبيعي .. مو عارفه شنو السبب يمكن لانه هو كل يروح هناك

واوقات يروح ويقول لها شيء عني وعنه ويقهرني والله مدري

صرت اضايق لما يرووح هناك او كل ماطلع دقيت عليه قلت له وين انت

قبل ماكنت كذا بس من جااب اخته من المطار يووم ترووح الحج وانا

خلني بيت اهلي وراح لها يمكن انا انقهرت حييل لييه سواء كذا

مع اني انا زوجته واولي منها وهي عندها زوجها وياا عيالها كباار

ويسوقوو .. وحتىي يووم جت من سفره ثانييه والله رحت انا ويااه هو بعد قالي

الا المطاار وبس وصلت هنااك وانا قلبي يغلي ومضايقه حييل ولا ودي اشوفها

وزهقت وانا واقفه هناك حتى هو شك قالي وش فيك

تبينا نمشي قلت له لا وهو كل شوي يسالني وش فيك وش سوسوس عليك

الشيطان وانا ولا اجاوبه لاني كنت منقهره قالي اذا تبي نرجع عادي

قلت له ماله داعي بعد جاي هنا وتسرع وتمشي ..مو لازم وانا والله اغلي داخلي

بس بعدين يوم شافني كذا مشيناا وهم اصلا ماجوو الا 5 قريب المغرب ..

صرت بالمره اضايق من وجودهاا اكره الروحه هناك اذا صارت هي موجوده

بعكس لو صارت اختها الثانيه ويا بنتها هناك عاتي كنت كل اروح لهم

ومن جت بطلت اروح لان مالي خلق لهاا صراحه .. وصرت اتهاوش ويا زوجي

وكل اجيب طاريهاا بالموضووع ..تعبت والله مو عارفه شنو سبب هالشيء

وشنو سبب هواشي ويا زوجي لاتقولوو مسحوره لا مستحييل تسوي فيني كذا

اصلا عمرها ماضرتني ودائما تسال عني واذا رحت تقول حق اللي هناك

يجيبو لي الشيء اللي احبه يعني ماتقصر بس مدري لييه اضايق منها ..

آآآآآه يبناات انا تعبانه والله بالحييل مو عارفه شنو السبب ..

تكفوون ساعدوني طلبتكم لاتردوني ..​

 

[كلي حنو]

شدعوه ولا وحده ردت علي ..

 

[حايل بعد حيي]

انتبهي حبيبتي زوجك طيب وحنون معك لاتطيريه من يدك ويمكن انتي
تغارين عشان يزور اخته كثير ويوديها عادي هذي اخته الكبيرة لكن صدقيني
مع الوقت راح تتغيري وتتعودي انا زوجي علاقته مرة قويه مع خواته ويكلمهم بكثرة
في بداية زواجي كنت اغار لانة داخلة حياة جديدة وتبين تتملكين زوجك لوحدك واحيانا
ياخذ اخته ويدخلون غرفتي ويتناقشون في مواضيع ويتشاورون وكنت انقهر
بس الحين الحمد لله كل شي تغير وصار عادي بالنسبه لي
اتمنى اني افدتك

 

[أرجواان]

الله يهديك بس امسكي زوجك لايزهق منك

ترى هم يكرهوون النكد ربي يسعدك سوي يوم حلو رومانسي

غيري روتينك سوي قهوه عصريه

اطلعي بغداء في منتزه اوحديقه

 

[كلي حنو]

مدري والله انا بالحيل هالموضووع مزهقني ..

ع طوول اخته واخته احنا قلنا متغرب عن اهله امه ويا ابووه

ويجي مع اختها لكن بحدود الواحد .. مو ع طوول وش قال يوم قلت

له انا ارووح عشاان هالطفله اللي ادق عليي وكل مره تبيني اروح لها

قلت له اجل هذي بنت اختك لو تقولك نام هناك بتناام اجل وبتخليني

قالي شوفي كيف تفكيرك انتي قلت له ماقلت شيء

بس تقول تروح عشان هالورعه والله بامكنك انت تكلمها وتقول لها

انك قبل عزابي اروح لكم واجيكم بس الحين انت متزوج والا خل امها

تفهمها مو تقولوو ع طوول هي تفهم انا هالوضع مو عاجبني خلاص احد منكم يكلمهاا

يعني حتى بنت اخته هذي قاهرتني الورعه الكبيره افضل منها بكثثير

وارتاح لها اكثر من هذي ويا امهاا .. ​

 

[محبة مكة]

الله يهديكي
خلي على راحته
مادامه يحبك وشاريكي لا تخلي يمل منك
لان الرجل يستحمل ويستحمل ولكن يتغير فجاة
فحاولي تهدي شوية

 

[غدا نلقى الآحبة]

اختي الغالية هذا كله من الفراغ اشغلي وقتك بقراءة القران وخاصة سورة البقرة فانها تحفظ بيتك من دخول الشياطين باذن الله ..

اقرأي كتب واسمعي لمحاضرات تثقفي وتفقهي امور دينك ودنياك وسجلي بالتحفيظ او بالنادي ومارسي رياضة المشي ..

اصبري واحتسبي الاجر زوجك لاتدققي عليه وتخنقيه بيطفش منك وبيمل اطبخي اكلات يحبها وتفنني بعمل الحلويات خليه يلاقي بالبيت راحة وملاذ أمن ..

 

[غدا نلقى الآحبة]

اصبري كلها فترة وتعدي لانك لسه عروس والروتين بيتعب ,, بكرا بيصير عندك اولاد ومسؤوليات وبتتمني وقت فراغ وراحة ..

 

[كلي حنو]

اصلا انا ويااه والله بس يوم واحد تقعد بالشقه والا طول الاسبوع هو بالريااض

وانا بيت اهلي يجي الربوع المغرب ونطلع من بيتنا ع 11 ع مايتعشى ونروح شووي

بس وناام الساعه 1 وبعدين الخميس معه والجمعه هذا احنا نجهز وكل شيء عشاان

الغدا بيتناا وبعدها يتغدا ويشرب شااي ويرووح بيت اخته الين المغرب ويمشي الريااض

زهقت انا حييل من هالعيشه عشاان كذا انا والله لو الود ودي هالاياام ماتمر بسرعه بالذاات

اياام الاسبوع لاني ما احس اني انسانه متزوجه احس كاني مخطوبه وانا بيت اهلي

يعني الا متى وانا بظل ع هالحال يعني مايقدر ياخذني وياه الريااض او هو مو حااب

خلاصص ينقل هنا انا مابقعد طوول حياتي بيت اهلي لان مافيه احد يتحمل احد بهالزمن

مع انه امه تقولي اسبوع بيتهم واسبوع بيتنا بس انا ازهق هنااك يعني حتى لو اعتبروني

بنتهم وربي ازهق احس كاني غريبه مهما كان الواحد مايرتاح الا بيت اهله وبس

وانا الحين بروحي بيت اهلي بعدين معااي عيال يعني الا متى ..زهقت والله وطفشت..

يعني يبي كل مسؤليه زوج وعيال وبيت كلها علي انا وهوو بس حده الخميس وش هالعيشه والله

اللي تجيب الهم والغم ..​

 

[كلي حنو]

حتى لو بجيب عيال بقعد لي ع طوول بيت اهلي اانا هالوضع مو عاجبني والله

يعني مثلا لو قدر الله عيالي تعبوو منو بوديهم مستشفى او صار عندهم موعد او شيء

لاقدر الله والزمن والله ما احد لحد صحيح اهلي ويااي بس الواحد مهما كان يمل والله

يعني ع طول ع طوول الله يصبر قلبي والله ..​

 

[لايمكن اصدق]

شوفي حبيبتي انتي حابه تستقري في بيتك وشغل زوجك ماخلاك تشوفيه الا يوم ويضيع هليوم في زعل ونكد لاحبيبتي لازم تكوني قويه ودوام الحال من المحال اناكنت مثلك وبعدين اخته توفت الله يرحمهاوتحسفت وكنت اقول ودي لو ترجع الايام الاوليه واحس انهااحسن انتي فهمي زوجك ان يوم الخميس يكون لك واليوم الثاني يروح لاخته وعتبري هالوقت تجربه الين تستقرين وهتمي بزوجك وراعيه قبل لايجيك طفل وتلهين عنه

 

[حناااان الكون]

أحس أنك عصبيه وتتوترين بسرعه هدي يالغلا وكبي عقلك حاولي تاخذين جلسات أسترخاء وتتنفسين الهوا بعمق في حال توترك عشان تملكين أعصابك وما تخسرين صحتك

ولا صار بينك وبين زوجك أي خلاف ماله داعي تجيبين سيرة أخته صدقيني راح يكرهك ويحبها أكثر من قبل لأن أنتي دايم تذمينها قدام زوجك وهي ما تذكرك إلا بالخير نصيحة من أخت لأختها لا تجيبين سيرة أخت زوجك وحاولي تحدين من زيارة زوجك لخواته أو طلعاته بالتجمل والتبعل له بحيث تجذبينه لك وتحببينه بالجلسه معك أستخدمي الكيد النسائي أجذبيه لك بأنوثتك ورقتك ودلعك وغنجك تفنني له بالبيت من لبس ودلع واكل ونظافة

خذيها قاعدة الرجل اذا صبر اليوم وتحمل بكره لا يطق له عرق ويجيب عاليها واطيها لا يغرك انه دفع مهر وانه مديون وان ظهره مكسور ماله حيله يفتح بيت ثاني بالساهل ممكن يسرح زوجته ويجلس عزوبي بيقول عزوبي اطلع وادخل ع راحتي ولا متزوج وعيشتي عيشة هم ونكد

أنظري إلى نسبة المطلقات والبنات بالبيوت وأنظري إلى نسبة الشباب اللي لسه ما تزوجوا أغلبهم بيسافرون برا وينجرفون للحرام بشتى طرقه سواء بالعلاقة وإلا بالنظر وإلا أيآ كان ومنهم للأسف متزوجين ... لازم الأنثى تحتوي الرجل بكل ما فيه وتحببه فيها مش تفرض شخصيتها عليه بعصبيتها وزعلها وتذمرها .. الرجل مثل الطفل اللعبة تلهيه اليوم بكره يطفش منها ويرميها ... كوني لعبته المفضلة

أتمنى تراجعين حساباتك وأجلسي مع نفسك جلست هدوء وأسترخاء ومعك ورقة وقلم وصارحي حالك أكتبي سلبياتك وإيجابياتك وأبتدي بتصحيح السلبيات وأكتبي هواياتك اللي تحبين تمارسينها ومتى أخر مره ما رستينها وهل زوجك يعرف عن هواياتك شي ؟

راجعي حساباتك يا غالية ولا تزعلين من كلامي ما قلته لك إلا لأنك عزيزة وغالية​

 

[فتاة الأمل]

اختي الغالية
تعوذي من ابليس وروقي..
هذا وضعك طبيعي في اول الزواج.. الوحدة تكون مو متعودة على حياة زوجها واهل زوجها وبيتها..
انا مثلا واانا مستقرة مع زوجي في شقة بنفس مدينة اهلي واهله.. بس جلست سنة كاملة لين حبيت بيتي وتعودت عيله.. ولاقبل وخاصة اول ست شهور من زواجي كنت ازن على زوجي يوديني كل شوي لبيت اهلي وكنت احب انام عندهم ومتعلقة بغرفة نومي اللي في بيت اهلي..
حتى اهل زوجي كنت امل من زيارتنا المتكررة لهم لاننا كنا ساكنين قريب من بيتهم.. وكنت رسمية واستحي منهم.. واحيانا اطفش ومااحس ان مندمجة معهم..
بس اللحين وبعد ثلاث سنوات زواج صرت مااحب بيتي ومااارتاح الا فيه.. حتى اهل زوجي صرت احسهم مثل اهلي.. وعادي لو ازورهم دائما..
وبالنسبة ظروف زوجك وعمله بعيد عنك.. يا اختي الحبيبة مادام زوجك انسان طيب ويخاف الله فيك ومو مقصر في حقوقك ويحبك فزوج مثل هذا يستاهل انك تصبرين عليه وتراعين ظروفه.. حااولي تحبين زوجك وتوقفين معاه بالرخاء والشدة.. واكيد ان وضعه الحالي مؤقت وماراح يستمر طول حياته.. ترى الزوج مثل الطفل يحتاج رحمه وحنان.. ااحتوي زوجك بعطفك وحنانك.. اذا كان بعيد عنك كلميه بالجوال وارسلي له مسجات حب ودعاء له الله يوفقه بعمله ويرجعه لك سالم.. واذا جاء عندك الاربعاء تزيني له وتعطري وامسحي على راسه بيدك واعطيه لمسات حانيه.. صدقني هاللمسات تخلي تعبه يروح وتخليه يحبك ويتعلق فيك اكثر..
وعلى حسب ماافهمت من كلامك انه يوم الخميس كامل مخصصه لك.. والجمعة يتغدى معك ويروح لاخته العصر.. فاذا الوضع كذاا انا ارى انه عادل معك بالنسبة لوضعه وظروفه.. ومعليش تحملي..
واكثري من الاستغفار والدعاء واحمدي ربك انتي مشكلتك بسيطة.. شوفي باقي مشاكل الاخوات بالمنتدى الله يفرجه لهم..

وحافظي على قراءة الاذكار على نفسك وعلى زوجك.. وافتحي سورة البقرة في بيتك..
وتعوذي من ابليس وحاولي اي فكره سلبية يحطها الشيطان في راسك ان تبدليها بفكرة ايجابية..
وخلك صابرة ومتفائلة وحبي زوجك وعشي حياتك..
واللحظات القليلة اللي تجمعك بزوجك اجعليها لحظات جميلة مع حبيبك..

سامحيني اذا طولت عليك بالكلام..
بس والله من غلاتك عندي وحاسة فيك وتنمى اني اكون افدتك وخففت عنك..
والله يسهل امورك ويوفقك ويسعدك بحياتك مع زوجك..

​

 

[فتاة الأمل]

عذرا اخطأت..
وبعد ثلاث سنوات زواج صرت أحب بيتي ومااارتاح الا فيه​

 

[كلي حنو]

لا عاتي ماطولتي علي

بس انا والله ازهق في شقتي لدرجه والله العظيم

اني ما ارتاح فيها مو عارفه لييه يعني ما احس

اني متزوجه ولا احس بالاستقراار بس لاتنسي اانا

وياه خطوبه سنه وشهريين والله والحين 5 شهور زواج

هو لابد من كل بيت مشاكل وانا عارفه ملح الحياه الزوجيه

هالمشاكل بس تكون بيني وبينه ويصير معي ع طوول

مو طول وقتي بيت اهلي ويجي بس هالخميس والجمعه

بيتنا يتغدا ويرووح بيت اخته وهذا وضعي انا

وربي زهقت من هالعيشه احس ماكاني متزوجه يعني لو

جالسه بدون زواج والله افضل من هالعيشه ان بس يجي

الربوع ياخذني ويرجعني الخميس انا ما احب هالوضع

لان خلاص احنا تعودنا ع امي ان الحرمه تتبع زوجها كل مكان

وتعيش وياه يعني الحين من بيتنا احنا ولا وحده من خواتي

المتزوجاات كذا حياتهم والله كلن عايش بيته وياه

زوجها الا انا وش ناقصني انا عشان يسوي لي كذا يعني

يقدر ياخذني وياه الرياض الحين ناس واجد كل اشغال

ازواجهم بالريااض لكن ماخذيين حريمهم وياهم وش معنى

هو يقولي شيلي فكره انك تسكني هناك بالريااض

ليش يعني او شنو قال بيبني لي غرفه بيتنا فووق

قلت له لو صار هالشيء تفكر راح تخف هالمشاكل وربي

احس بزييد ولا بتخف وقلت له لو حطيت لي غرفه فوق

حط في بالك ان اهلي مارااح يشوفوني وراح تزيد

حالتي النفسيه وربي شقتي اول ماتزوجنا عاتي وياه

لاني كنت معااه بس الحين صرت والله ما احب اروح لها

ولا احب انام فيها اصلا مايجيني نووم فيها اهلي يقولو

لي لاني مو متعوده قلت لهم هذا انا اوقات انام بيوتكم

مع اني مو متعوده انام بيوتكم الا بالسنه مره او اوقات بالشهريين

يعني ع حسب وهذني والله انام واعاتي وش معنى يعني

هناك بالشقه هذا يدل والله اني مو مرتاحه حييل

اي وحده ماتنام بشقتها اعرفي انها مو مرتاحه والله ..

زهقت من هالوضع انا بالمره .. تدري ان ودي لو هالاسبو

هو مايجي ويقعد حتى لو شهر مايجيني عاتي

لاني تعودت ع الوضع اني طول وقتي بيت اهلي يعني

جت ع بس الخميس اللي بسرعه يمر اليوم فييه ..

آآآآآآه ياقلبي والله تعبانه بالحييل ..​

 

[الماسة غير]

بالنسبة لحبه لبنت أخته فلا تعصبي ولاتهتمي لأنه مرده لك
أنا زوجي يمووووووووووت على ولد أخوه وكل شوي نادوا حمودي و وين حمودي والمشكلة الأعظم إن احنا جيران في البداية كنت مثلك أنزعج من اهتمامه يعني حتى لما نكون جالسين لوحدنا طلع جواله من جيبه وجلس يوريني صور ولد أخوه أو مقاطع فيديو له وكنت انقهرررررررررر
لكن بعدها صرت أسوي نفسي مهتمة بولد أخوه وإني أحبه وصرت أطنش مع إنه يجيبه عندي بالشقة وماشاء الله هو عنده نشاط زايد مايبقى شيء بمكانه........
المهم إنه بعد فترة هو اللي مل وصار يبتعد عن ولد أخوه بدون أي تأثير مني حتى إن ولد أخوه يجي يضرب الباب علينا يبغالنا نفتح له كالعادة فيقول لي زوجي طنشيه سوي نفسك ماتسمعيه والحمد لله ارتحت وعقبالك يا رب

لذلك نصيحتي لك :
- طنشي وسوي نفسك مو مهتمة ولاتبينين له إنك منزعجة لأن الرجل طفل كبير إذا قلتي له لاتسوي هذا راح يسويه وبالعكس بيكرهك وبيحبها

- حاولي إنك تروحي معه

- حبي زوجك واهتمي فيه واشبعي عواطفه لأنك نسيتيه واهتميتي بالسالفة أكثر

مع محبتي
الماسة غييييييييير

​

 

[الخط الفاصل]

الصراحه دلاله خرررررربك
صدق بعض الحريم ماينعطون وجه
الحين لو غير مامعملته وقسي عليك ينقلب الحال وتركضين أنت وراه ترضينه..
لا تجحدين نعمة الله صوني النعمة.

 

[كلي حنو]

والله لو انتي ماكاني كان وربي انقهرتي ..

يعني لو عطوول زوجك بيت شخص يحبه ويعزه

وهوو ع طوول هناك والله انك راح تنقهري وتقولي لييه

يسووي هالشيء له وانا زوجته مو مرره معااي وش معنى هوو بالذات

صدقيني لو جربتي هالشيء راح تحسي ان معااي حق بكل كلمه اقولهاا ..​

 

[دلوعة عمرو]

انا اقولك وش الي تحسين فيه بالعربي


هذي غيرة حريم لا تقولين لا

انا مريت بنفس الشي

اول ما تزوجت كنت اغار على زوجي من اخواته تخيلي <<<هبلاا

وكنت ما احب اروح عندهم واسوي مشكله عشان ما راوح وحسيت ان زوجي تضايق من تصرفاتي مع انهم طيبين ولا عمرهم ضروني او ضايقوني



بس بعدين انتبهت وفكرت في تصرفاتي حسيت نفسي غبيه هههه


هذولي اهل زوجي ولازم احبهم واحترمهم عشان زوجي يحبني واكبر في عينه ..

هي فتره ان شاء الله وتمرر


بس انتي تعوذي من ابليس وصلي واسغفري ترى هذي اخته مهما كان

حطي نفسك مكانه وشوفي وربي تضايقين اكيد ما ترضين زوجك يتضايق من اهلك او يحقد عليهم صح ولا

الله يعينك وانتبهي لزوجك تراه طيب مرره​

 

[زهور فرنسية]

الله يصلح يصلح بالك يارب
عزيزتي غيري من نفسك لانك لديكي زوج نادر هذه الايام
اعرف انك حاولتي بس من غير فائده
اقراي قران لانه فيه شفاء عظيم
الله يسعدك​