حابين تستفيدون حيااكم تفضلوو " عنايتني ببشرتي وجسمي "

[غلا m روحه]

صبــااكم / مســـآآكم ورد يا حلواات :39:

بناءً على طلب الاخت احاسيس بخصوص الخلطات اللي استخدمها للوجهي وجسمي ..
حبيت ان الكل يستفيد منها وما ابغى منكم الا دعوه في ظهر الغيب ولو كان في سركم ..
تجربتي الشخصية لعنايتي بوجهي وجسمي يعني الخلطات اللي بكتبها لكم انا جربتها شخصياً ..
اول شيء نبدأ بخلطات الوجه ::
اول شيء قبل ما استخدم اي خلطة رحت لدكتورة بشره وكشفت على بشرتي مع انه ماكان فيها شيء بس دلع رحت لها واخذت على راسي اعطتني غسول وكريمين بس لوجهي قيمتها 1200:35: وربي وقالت استخدميهم لمده 3 شهور وتبين النتيجة واعطتني المهم مالكم بالطويله استخدمتها من اول استخدام طلعت لي حبوب في وجهي حمرا وتعوور مرره وقلت يالله يمكن لان بشرتني دهنية وحساسة المهم استمريت عليها 10 وراجعتها قلت لها الحبوب كل مالها تزيد ردت عليه ان بشرتي دهنيه وتطلع الدهون اللي تحت الجلد وقالت ان النتيجة ما تبين الا بعد 3 شهور حسبي الله ونعم الوكيل بس المهم استخدمتها شهر وما زالت الحبوب في ازدياد :4: وقفتها قبل عيد الفطر باسبوع عشان العيد وابو الشباب بيجي يعيد وانا وجهي معدووووم بمجرد ما وقفتها خفت الحبوب الحمدلله وكنت مستمره على الزبادي رجعت للكريمات بعد العيد ونفس الشيء رجعت الحبوب استمريت عليها شهرين تقريبا ولكن كل ماله وجهي ينعدم من هالحبوب وقفتهااا وحلفت ما ارجع لها واستمر على الخلطات الطبيعيه وفعلاً ماندمت ..
نصحتني في ذي الخلطة اختي سلوو ربي يعطيها العافيه وييسر لها امورها اللي هي :
1- خلطة السدر ==>> 2 ملعقة حليب بودرة + 3 ملاعق بوده سدر تلاقينها عند العطار + نص كوب مويا دافيه .. تخلطيها مع بعض وتحطيها على وجهك مدة 20 دقيقه الين تجف بعدين افركي وجهك بطريقه دائريه بعدها غسلي وجهك بمويا باردة وبس هذي اللي اسويها .
فوائدها : نعومه + تفتيح + ازالت لي الحبوب وقشورها وآثارها ...
2- الخلطة الثانية خلطة الرز والشوفان مرره حلووه وهي :
ملعقة كبيره رز مطحون + ملعقة كبيره شوفان مطحون + زبادي تقريبا ملعقتين كبيره ..
اخلطيها وحطيها على وجهك الين تنشف وافركيها بحركه دائرية برفق انتبهي مو من الحماس تجرحين وجهك شويه شويه وبعدين غسليها ::
فوائدها : نظارة للوجه + تقشير + تفتيح .
3 - منقوع المره اتعب وانا اقول تجننننن يابناات بس انا ما قدرت اتحمل ريحتها اغصب نفسي استخدمها الين خلص المنقوع وماعاد سويت عشان ريحتها بس استخدموها لو اتحملتو الريحه استمرو عليها والله حلوه ..
خذي ملعقة مره وحطيها بعلبة مويا او مويا ورد ورجي العلبه وخليها تنقع مدة 24 ساعة وبعدين غمسي القطنة وامسحي فيها وجهك وخليه ينشف بعدين غسليه ..
فوائدها: تشد البشره وتشيل الحبوب هذا اللي لاحظتة فيها لاني ما استمريت عليها ..
4- خلطة الزبادي :
علبه زبادي تكون معفنه خليها يومين برا مو في الثلاجه << ههه معليش تحملو عشان نتايجها الحلوه + ملعقة خميره فوريه .. اخطليها مع بعض وحطيها على وجهك ماعدا ( انفك) عشان ما تنتفخ وركزي على الخدود ..
فوائدها : وااااااو يا بنات تجنن والله تنفخ الخدود وتوردها هذي الخلطة من مرة خالي الله يعطيها العافيه ..
هذي هي الخلطات اللي جربتها وفادتني وطبيعيه وحلوه واتنمى انكم تجربوها وتفيدكم وتدعو لي ..
وآخر نصيحة اقدمها للوجه موية الورد قبل ما تنامين تمسحين وجهك بقطنة مغمسة بموية ورد وانتي احكمي على النتائج بنفسك اتمنى انكم تجربوها وتقولولي كيف النتائج ..
وان شاء الله قريب اكمل الموضوع واكتب لكم تجربتي مع خلطات الجسم ومنطقة البكيني والمنطقة الحساسة وبتكون مطووووله ومفيده ان شاء الله اعذروني تعبت الحين وبروح اذاكر عندي اختبار يوم السبت دعواتكم يا امورات ..:32:

​

 

[الليل الساكن]

غلاـــــ ابدأ بالبكيني ^_^

 

[آح ـآسيس]

الله يسسسسسسسسسسسسسسسسسسعدك ياغلا وينجحك ياررب



اهم ششششي الباقي > البكيني والجسم هع


حتى الوجه والله وببدا بخلطاتك وبدعي لي الله يسعدك

مشكووره تعبتك معي &_&

 

[بنت قلبي]

مشكورة

كملي حبيبتي

 

[أميره عصرها]

مشكوووره حياتي كملي

 

[ام ذهب]

يعطيك العافية على هذي الوصفات

 

[غلا m روحه]

ربي يسعدكم حبيباتي حمستووني و دامكم تبغون منطقة البكيني ابشرو بكتبها لكم الحين وااجل المذاكره لبعد الفجر ..

منطقة البكيني هي اللي مأزمتنا في حياتنا لانها تعتبر بجســم المرأه من اكثــر المناطق عرضــه للســواد ويرجع هذا لحساسية هذه المنطقه واذا ما عتنيتي فيها
بشكل صحيح يؤدي ذلك الى نمو البكتيريا وبالتالي ظهور افرازات وروائــح كريهـه وبالتـالي الســواد ..
1- اول واهم شيء نظافة المنطقة ازلة الشعر منها انا بصراحه متوخفه من الليزر وزوجي محلفني ما اسويه مع انه اريح احس فاضطريت اني استخدم الحلاوه بصراحه انا مو مره عجبتني وكله كوم والالم كوم ثاني تعوووور مرره بس حاولت اعود نفسي عليها على القيله اول اشهر الزواج لان الموس يفشل يطلع بسرعه الشعر وسمعت انها ترهل المنطقة وهذا الشيء ينفر زوجك منك عشان كذا انتبهي واللي يقهر في الحلاوة كمان انها تطلع حبوب في المنطقه بس لقيت لكم الحل يالله نبدا بعد ما ازلتي الشعر بالحلاوة جيبي موية ورد ونشاء واخلطيها وحطيها على المنطقة تبردها وتخفف الاحمرار وتمنع ظهور الحبوب او امواس فينوس هذي النوعيه افضل الانواع وانصحكم فيها بعدين حطي موية ورد ونشاء عليها وانتبهو التنظيف من الامام للخلف عشان ماتنتقل البكتريا والفطريات ..
بالنسبه لي صرفت لي الدكتورة كريم للمنطقة الحساسه هذي صورتة وقيمتة 245 ريال

حلوو وفتح لي المنطقة ومرره كنت مبسوطه وماني مصدقة ان النتيجة كانت سريعه بس للأسف بعد ما وقفته بدا يرجع السمار وهذا اللي ما ابغاااه لحقت على نفسي وصرت اسوي خلطات مهي صعبه ولا مكلفه بس تحتاج منك اهتمام واستمرار ..
1 - صنفره للجلد الميت مكوناتها ::
زيت زيتون او زيت اللوز المر + ملعقة بيكربونات الصيديوم + ملعقة سكر أو ملح خشن .. تخلطينها سوا وتفركين بطريقة دائريه المؤخره وبين الفخوذ والاشفار المنطقة بالكامل وحتى استخدمها لاكواعي وركبي وقدمي ومفاصل يدي وشوفي كيف الجلد الميت يطلع بيدك وربي تستغربين ان هذا طالع منك بس الله يعين اصابعكم من قوة الفرك وبعدها حطي جلسرين او زين اللوز المر هذا ثالث يوم انا مستمره عليها حتى استخدمتها لمفاصل يدي واااااااااااااااااااااااو تجنننننننن وربي يا بنات ما تندمون ان شاء الله جربوها وقولوي كيف التائج هذي الطريقة كتبتها بموضوع من موضوعها بدانا .. طبعا الصنفره ذي استخدمها يوم بعد يوم ..
2- خلطة تفتيح بس نتيجتها تطول شوي يعني يبغى لها صبر مكوناتها :
علبه متوسطة جلسرين + علبه متوسطة جولسليد + نص كوب مويا ورد + عصير 3 ليمونات ..
اخلطيها وحطيها في علبه محكمة الغلق وحطيها الله يكرمك في الحمام عشان ماتنسين تدهنين منها ادهني منها المنطقة كامله مع الارداف مرتين يومياً ..
فوائدها : تفتح المنطقة بس زي ماقلت يحتاج لها صبر + تخلي المنطقة نااعمة ..
3- امسحي المنطقة باسكنول الليون من برا يومياً بس انتبهي لا يجي على البظر ..
4- كريم اليكتا ام يفتح المنطقة بس ما استمريت عليه لاني خفت لمى اتركه يرجع السمار عشان كذا فضلت الطبيعي وبس ..
بكره اكمل لكم الباقي انشاء الله :17:

 

[آح ـآسيس]

فديتك غلاا



خذي راحتك ببننتظرك

 

[نوآرهـ]

حلوو ربيي يوفقك
ابي خلطات الجسم اذا عندك شي استفدتي منه

 

[تفــآصيلـ]

يختي اللي يرفع ضغطج شي واحد فققققط
ألا وهــو
الويـــــه
=\

عععلني.. ما خليت ششششي .. مالت عليه و على راعيته

 

[ياامنيه تحققي]

جزااااك الله خير

 

[غلا m روحه]

تفاصيل اعصباك يا عسل وش فيه وجهك ؟؟
ان شاء الله نلاقي لك الحل ..
يا امنية تحققي ويجزاكي يااموره ..

 

[ريناد الورد]

الله يجزاك خيير
الله يستر من هالعيادات عاد انا ناويه اروح للدكتوره

 

[غلا m روحه]

يالله يا عسولات نرجع نكمل الموضوع ..:6:
نصيحة بالنسبة للمنطقة الحساسة خليها على طول تتهوا دامك في البيت لا تلبسين كلوتات واقات الدورة البسي كلوتات قطنية 100 % تلاقينها في لاسنزا , واشكلها حلوة ..

نجي الحين لخطات الجسم :
1- هذي خلطة امي الله يخلها لي يارب خلطة الدقيق ==>
مكوناتها : 3 ملاعق كبيره دقيق + ملعقتين صيرة ملح خشن أو بيكربونات الصيوديوم + ملعقة كبيرة مويا والأفضل موية ورد +زيت سمسم أو زيت اللوز أو زيت زيتون ينفع اي زيت بس الأفضل زيت السمسم ..وتخلطيها مع بعض الين تصير مثل العجينة وتفركين فيها جسمك كامل من تحت لفوق بطريقه دائرية من اصابع قديمك ولفوق وركزي على المناطق الداكنة والرقبة وبعدها اتروشي عادي والافضل تتروشي بصابونة الغار تجننن وفوائدها كثير يابنات أو صابونة الببايا 5 في 1 بس ترطبين بعدها بجلسرين ..
فوائدها : تقشير وتفتيح ممتااااز وتبين النتيجة مع الاستمرار طبعا هذي الخلطة مره في الاسبوع تسوينها ..

2- خلطة السدر نفس الطريقة اللي كتبتها للوجه بس تضاعفين الكمية وتخليها تنشف على جسمك وتفركيها بطريقه دائريه وتروشي عادي بعدها هذي الخلطة انا اسويها 3 مرات في الاسبوع ..
فوئدها : تفتح وتقشر وتنعم جسمك رووعه والله ..

3- خلطة بياض الثلج روووووووووووووووووووووووووووعه يابنات انا استمريت عليها اسبوع وشفت الفرق اذهلني بصراحه بس وقفتها لان اخواتي يتقرفون مني وماعاد يجلسون معايه يخلوني لحالي :4:فتركتها بس نااوية ارجع لها ان شاء الله اكييد ..
مكوناتها : صابونة غار وافضل صابونة هي اللي مكتوب عليها قزاز + موية ورد+ علبه فكس صغيره اللي لونها ازرق مو فكس العجايز اللي يصك بالراس +كريم جليسوليد علبه كبيره +كريم جلسرين علبه صغيره + فنجان شاي زيت اللوز المر وزيت الزيتون عصير 3 ليمونات .. الصبونه تبشريها وتنقعيها الليل كله بماء الورد حوالي كوب وتتركيها لليوم الثاني اليوم الثاني تضيفي باقي المقادير مع الصابونه في زبيدة واضربيها بالمضرب الكهربائي انا خفت احطها في الخلاط ماتروح ريحتها بعدين تحطيها في علبه وحطيها بالثلاجه يوم كامل وتبدئ بالخلطه اليوم اللي بعده وتتركيها على الجسم حوالي ساعتين وانا كنت انام فيها لنتائج افضل بس البسي ملابس قديمة لان الريحة ماتروح من ملابسك بعد كذا تتروشي وتستخدمي صابونه الببايا وتفركي جسمك كويس وبعد الحمام استمتعي النعووووووووووووومة والبياض ..
فوائدها : اهم شيء ترطيب ونعوووووووووومة ماتتخلينها + تفتح المناطق الداكنة برجع عليها ان شاء الله ..
4- خلطة الشوفان موكناتها : 3 ملاعق كبيرة شوفان + ملعقتين كبريه نشا +عصير ليمونتين + موية ورد للعجن ..
وزعيها زين على جسمك وخليها تنشف وبعدها افركي بطريقة دائرية وتروشي بصابونة الغار بعدين جيبي مرش وعبيه موية ورد ورشي جسمك بالكامل اترككم انتو تحكمو عليها ..
فوائدها : تقشير الجلد الميت وتفتيج + ريحة تجنن ونعومه ..
5- الصنفرة اللي كتبتها لكم بس تضاعفو كميتها مكوناتها ::
زيت زيتون او زيت اللوز المر + ملعقة بيكربونات الصيديوم + ملعقة سكر أو ملح خشن .. تخلطينها سوا وتفركين بطريقة دائريه شوفي الجلد الميت يطلع في يدك بس الله يعين اصابعكم تحتاج مجهود ركزي على الاكواع والركب ومفاصل اليدين .. وبس ياحلواات يالله شدو الهمة ربي ييسر لكم اموركم ويتمم لكم على خير ياارب واي استفسار انا حاضرة ..:39:

 

[آح ـآسيس]

الله يسسسسسسسسسسسسسسسسسعدك ياشيخه


غلاووي الشووفان ووشوو

وكمان بيكربونات الصوديوم


اقول للصيدلي الاسم ويعطيني اياها طيب ماعرف شكلها اخاف يكون غبي وابلش بشي غلط

 

[آح ـآسيس]

غلاوووي استخدمي افالون ..كثيررررررر اسمع عنه .. وش تنصحيني فيه


شوفي من الحين افكر بخلطه بياض الثلج هالشهر وكل ششهر بستخدم خلطه معينه وع هالحال لين وقت الزواج

وكمان بستخدم الاقنعه كل اسبوع . ع حسب المزاااج

بس انا مضايقني المنطقه الي بين الارداف احسها سمررا حتى سمار الافخاذ مو ذاك الزود هاني كثرها وكمان المارداف مكان الجلووس فيه سمار واسفل الظهررر ومحبب احسس

ودي افتك من هالششي وارتاح


وكمان سويتي ليزر او لا ؟؟

ماشاء الله عليكي ياقلبي قريت لك اشياء مرره صعبه مثل ملح البحر مدري وشش

>> افيدنا بتجاربك بسس وقت الفضوه مانبي نششغلك

الله يوفقك وووييسر لك

 

[غلا m روحه]

احاسيس حبيبتي مو من عند الصيدلي تلاقينها في السوبر ماركت الشوفان هي شوربة كويكر وبيكربونات الصوديوم زي البكنج بودر تلاقينة محل البهارات ..

قبل شوي طلعت خلطتي المفضله اللي فادتني في تفتيح ركبي واكواعي بعد ما انغشيت بخلطة خلتها سوداا ورجعت اشتغل عليها من جديد وتذكرتكم لازم اعطيكم هي مكوناتها ::
30 نواة تمر محروووقه تطحينيها + 2 ملعقة عسل + 2 ملعقة زيت زيتون واخلطيها زين لين تصير كثيفه شويه وبعدين وزعيها على ركبك واكواعك وجيبي شراريب ما تحتاجينها وقصيها بحيث انك تقدرين تدخلين رجلك فيها وغطيها على ركبك ونفس الشيء اكواعك ونامي فيها وتقومين الصباح افركي ركبك واكواعك بنفس شرابها بحركة دائرية شوية شوية وغسليها زين بصابونه وبعدين رطبيها بلجلسرين وررربي هي اللي فتحت ركبي واكواعي بعد مانكبتها بذلك الخلطة كنت اشوف ركبي وابكي والله من القهر لكن الحمدلله قدرت افتحها بالخلطات اللي كتبتها لكم ..

 

[آح ـآسيس]

يااااافديتك

الله يسسعدك دنيا واخرره ويجعل ازييييييييييييييييييييييييييييييين عرووس بعين محروووسك ومايشوف غيررررك

وتعيشين كل العمر عسسل في عسسل



بجربها حقت الاكواااع والركب .. طيب الخلطه احفظها وين بعد اول استخدم .. وكل يوم او يوم عن يووم ؟؟



انتظرك لما تصحين تردين لي

 

[سموة الإحساس]

الله يسعدك والله تحمست اجربهم بس في خلطه

وصتني عليها وحده من البنات وهي ( ليمون + سكر أو ملح) اتعب واقول رهييييييييييييييييبه

للاكواع والركب واهم شي الترطيب بعدين

 

[سموة الإحساس]

الله يوفقك ويوفقني ويوفق كل اللي يدرسو والمقبلات ع الزواج


والله حوسه مع المذاكه تهملي الجسم شويه