تعآآلو اقولكم سآآلفه صارت لي انا وتوأم روحي ..}

[miss.sara]

السلام عليكم ورحمة الله وبركاته

اليوم راح اقولكم سالفه صارت لي مستحيل انساها

يوم كنت اول ثانوي دخلت مدرسه اهليه وتعرفت على بنت قطريه بنت حبوبه تنحط على الجرح يبرى

كنا كل يوم نكلم بعض بالتلفون وهبال ونكمل بالمدرسه هبالنا

أي نسيت اقولكم البنت القطريه ساكنه عند خالها واهلها في قطر بتستغرون كيف اهلها حطوها عند خالها وراح

بتعرفون نهاية السالفه ليش….؟!

طبعا انا سألتها ليش تركتي الدراسه في قطر وجيتي تقول الدراسه هناك صعبه وهنا اسهل عندكم

بس انا ماصدقتها حسيت من كلامها انها تكذب بس مابغيت اقولها مابغى اخسرها عشان سبب تافه

لأن انا تعلقت فيها واعتبرها اكثر من اختي وحتى هي نفس الشي

كنت احس طول وانا معها انها تخبي شي عني لأن يبين في عيونها بس ماعرفت كيف اخليها تقولي

وحتى وهي تسولف عن خالها اللي ساكنه عنده تخيلو كل يوم له اسم مره خالد مره سعود مره علي:30:

بس في النهايه ثبتت على اسم علي انا كنت استغرب منها ماتسولف عن مرة خالها ابدا

سألتها مره زوجة خالك عايشه قالت أي عندها بنات قدي كل يوم اسهر معهم لاحظو كلمة( قدي)

وبعد اسبوع قالت بنات خالي توهم صغار اكبرهم في ثالث ابتدائي …سبحان الله كيف ؟!

المهم قررت المدرسه تودينا رحله لشاليهات

رحنا الشاليهات ونااااسه هذاك اليوم تخيلو رحنا م الساعه 7 الصباح الى الساعه 5 العصر:31:

وربي فله هذاك اليوم مستحييل انساه حتى التاريخ حافظته مثل اسمي 29/11/1429هـ

كان اخر يوم دوام في المدارس لعبا دبابات وسبحنا في البركه اذكر كانت البركه دافيه لأن كان ايام الشتاء

برررررررررررررد موت

افطرنا في الشاليهات وتغدينا بعدها رحنا بيوتنا

عطلنا وعيدنا عيد الاضحى ورجعنا للمدارس بس كان باقي اسبوعين على الاختبارات النهائيه


المهم جات ايام الاختبارات النهائيه الترم الاول كان اول يوم علينا رياضيات

قلت لها تعالي عندنا عشا نذاكر مع بعض

قالت اوكي بس اقول لخالي

وافق خالها وجات عندنا طبعا كان وناسه ذاك اليوم ماذاكرنا بس نلعب ونستهبل

انتهى الترم الاول
بدينا في الترم الثاني المهم مابي اطول السالفه وهي قصيره عطلنا العطله الصيفيه

وقلت صديقتي خلاص بتروح قطر ماعاد اقدر اشوفك وتخيلو كانت تبكي

وربي بكيت مستحييل اقدر افارقها المهم قلبناها مناحه هذهاك اليوم

المهم رحت قطر

وفي يوم من الايام كلمتني وقالت ساره بقولك شي قلت اوك الحين انا مشغووله بكره اكلمك

بعدها نسيت اكلمها

مر اسبوع كلمتني قالت ساره ابي اقولك شي

شوي الا ابوي جا من ادوام قلت يافلانه بعد شوي بكلمك

قالت اوك

نسيت اكلمها بعد

لأن انا من النوع اللي انسى

بعد اسبوعين بالظبط تذكرت وكلمتها

وقلت انتي كنتي تبين تقولين لي شي وش هو؟

قالت لاخلاص ولا شي

عاد انا سويت نفسي مو مهتمه لأني اعرفها اذا سويت كذا بتتكلم

وانا قاعد اسولف معها قالت ساره بقولك شي

بس بشرط ماتزعلين

قلت قولي وش عندك

قالت بس ماتزعلين

قلت وربي مازعل

وليتها ماقات لي تخيلو صديقتك تقعد معي وتسولف ونستهبل مع بعض

تخيلو اقرب صديقاتكم

تتوقعون وش قالت

تقول انا متزوجه انا انصدمت قلت يعني مخطوبه قالت لامتزوجه قلت

انتي متملكه بس قالت لا متزوجه وحامل بالشهر الاول

انا توقعت انها تستهبل

بس من نبرة صوتها انا صادقه

قلت من متى متزجه توقعت تقول من شهر

قالت من العام

يعني طول واحنا مع بعض كانت متزوجه وكانت ساكنه مع زوجها مو خالها

عشان كذا كل يوم لها كلام

طبعا انا مازعلت

بس ماتوقعت انها تخبي شي عني

قالت والله كل يوم ابي اقولك بس في شي يردني وكل مامر يوم

كل ماكان صعب علي اقولك

وقامت تبكي

قلت وربي انه مايسوى انك تبكين عشان سالفه عاديه

يمكن في خيره انك ماقلتي لي

وعدت السالفه عل خير بس جات في خاطري

عاد الحين عندها ولد زي القمر ماشاءالله عمره سنتين:7:

وحامل الحين ادعو ان ربي يرزقها بنت

مسكينه في خاطرها بنت

راحت مكه عشان تدعي ان يجيها بنت

الله يرزقها ان شاءالله يارب ويوفقها في حياتها ياااارب

طبعا انا كاتبه السالفه مجرد فضفه

وقلت لها اني بكتبها في النت قالت لي خذي راحتك لو تبين تسبيني سبيني << خبله هع:31:


عاد الحين انا وياها توأم بجسدين مايمر اسبوعين الا وهي عندي او انا عندها

وكل واحد يفضفض لثاني

احس اني طولت عليكم

ابي تعليقاتكم الحلوه عليها

استودعكم الله الذي لاتضيع ودائعه

 

[ملكة ببلقيس]

جميل بعض الأحيان ان يكتنف شخصياتنا بعض الغموض ..
و أؤمن أن حياة الشخص ملك له وحده , لا يسمح لأحد الإطلاع عليها
و لكن لا تصل إلا انك لا تدرين عن حياتها أهي متزوجة أو لأ
او ان تتقمص الكذب في سبيل الغموض ..
أدام الله صداقتكما ...

 

[ريهاااام]

:31::31::31:سااااااااالفتك غريبه وعجيبه وتونس بنفس الوقت
والاحلى ما شاء الله سردك لها رهيييب :31:
ونستن قسم
بس غريبه ليش تخبي زواجه ؟؟؟؟؟؟؟؟؟
شي غريب ؟؟
عموما الله يديم صدااقتكن ..واكيد لو ماحبتك كان مااعترفت

 

[زحمه مشاعر]

صرراااحه ماستغربت لانه مرت علي سوالف مثل كذا مو معاي شخصيا بس اسمع من صديقاتي

يعطيك العاافيه ع الموضوع وتسلمين ع الطرح الرائع

 

[مجبور اعيش]

والله من ما بيدت اقرا حست انها متزوووووووووجه
الله لا يفرقكم

 

[سميه أ]

الله يخليكم لبعض ولا يحرمكم ويجمعكم في الدنيا على خير وفي الاخره في الفردوس

 

[خليفة ناعمه]

مــــــا شاء الله ..:32:
هيـــــــك الصداقـــــــــــــه .. يا ناااااااااااااس ..
الله يجعل المحبـــــــــــة دائما دوم بينكـــــــــــــــم ,,:9:
يازيــــــــن الصديقـــــــــــة اللي ما تززززززن على صديقتهــــــــــــــا ...:31:

 

[الرمـش الخجـول]

طيب غريييبه ليش ماعلمتك انها متزوجه..!!!
الفضول ذابحني هع
​