بنتي ما تسلم على الناس !!!!

[طير الليالي]

عزيزتي الاستاذه نجوى....

بنتي عمرها خمس سنوات , هاديه وخجوله, وشخصيتها فيها غرور شوي, يعني غير
عن اختها الكبيره عمرها (عشر سنوات) مشكلتها انها ما تسلم على أحد!!!!
سواء من اهلي او اهل زوجي , يعني لما نروح بيت جدتها تدخل وتوقف وراي وما
تسلم على جدتها او عمتها او اي احد غير حتى عمامها, شكلها وطريقه نظرتها حقهم
كأنها تستحي حتى لو اطلب منها هالشي ما ترضى تسويه!!!!
أهل زوجي وخصوصا عمامها ياخذون الموضوع بحساسيه وما يرضون انها ما تسلم
يعني يقولون حق ابوها لازم تكلمها او اتهاوشها وما تخليها على هالطبع لان بيكبر معاها
وبصير ما عندها احترام حق أحد!!!!
انا من وجهة نظري انها تستحي واقول حق ابوها انها توها صغيره فاصبر عليها وبتتغير
مع الوقت ...
مو عارفه اذا كلامي انا صح او فيه طريقه اتعامل معاها فيها علشان اغير اسلوبها او ما في خوف من
هالشي وكلها مسألة وقت؟


وتسلمين يالغاليه

 

[أ.نجوى ناجي]

المسألة مسألة وقت كما تقولين ولا يوجد اي مقياس لمقارنتها بأختها الكبيرة لأن كل طفل وله شخصيته المستقلة , لا تدفعوها للأمر بالإكراه ولكن اتركوها تفعل ماتريد وعليكِ بالقصص البسيطة عن ثواب من يسلم على الناس وعلى الأقارب وهكذا ومع الوقت ستفعله إن شاءالله