بنتي تعاند دائما وتصارخ !! تبغي تسوي كل شي بنفسها

[عروسـة]

السلام عليكم بنات​

عندي بنتي عمرها سنتين وسبع شهور دائما تصارخ وتبكي ,, يعني مثلا لما ابدل لبسها تصرخ "انا اخلع لبسي" وتجلس نصف ساعة تلعب ترفع يد وتنزل يد ولما اكون مستعجلة والبسها بنفسي تجلس تبكي وتصارخ وتضربني وتضرب اخوها الصغير, ترمي الاشياء وتخلع ملابسها, تسكب الماء والعصير على ملابسها وهكذا .. ونفس الحالة عند الاكل و عند الحمام -اكرمكم الله- لما اغسل كوبها او رضاعة الحليب , لما ارتب السفرة او اسوي اي شي .. انا ماعاد اتحملها صرت اعند عليها واسوي شغلي مااسمع لها وطبعا تقعد طوال اليوم تبكي وتصارخ ودايما نفسيتها شينة .. انا خايفة عليها ياثر على شخصيتها تكون عصبية او تهتز شخصيتها ,, احيانا اعاملها بقوة ممكن تعورها .. بعدين صرت اخلي ابوها يساعدني يلبسها مثلا او ياكلها في البداية كانت اوكي وتمشي امورنا بسرعة بس بعد وقت صارت تعند حتى مع ابوها .. فصار ابوها يعاملها بقوة ويهددها بعصا مثلا او نسوي نفسنا نطلع ونخليها لما تسمع صوت الباب وهي تصارخ بعدين نرجع لها تكون تبغي تلبس عشان تطلع .. ماادري كيف اتعامل معاها لان عندي ولد 10 شهور وماعندي خدامة .. فما عندي وقت ابدا اضيعه معاها .. بعدين قريب راح نرجع الدوامات ماادري كيف اسوي معاها اذا جيت اجهزها الصباح وزي كذا ..
اخاف اتهور واضربها ​

ياليت اللي عندها خبرة في الاطفال تفيدني والله تكسب فيني اجر ...​

 

[نمله فوشيه]

والله وكنك تتكلمي عن بنتي بس اختي قالت لي السبب هو اني كنت عنيفه بحملي

يعني كنت كثيري انفعل وتاثرت فيني

والله اعلم بس بالمره عصبيه وماتبيني امسك يدها اذا صرت في سوق والا مشوار واذا مسكت يدها غصب تقوم ترمي

نفسها بالارض وتصيح بقووووووه

والله الله يصلحها مفشلتني بكل مكان حتى اني صرت ماخذها معاي لاي مكان من بيتي لاهلي لاهل ابوها وبس


وكل ماشكيت لزوجي هالشي يقولي بكرى تكبر وتقعل

بس اشوف ولد اختي هادي مره ومطيع
وهو ولد وانقهر من بنتي انها كذا​

 

[كل الغــــلا]

الله يعيننك

بنتي عمرها سسنه وكل شي تبغى تسوويه من نفسهاا

تقلقني قسسمن بالله

اهي بسم الله عليها تفهم كبيره

قولي مثلا يلا شووفي اخوك لبببس بسرعه الشاطر يستاهل حلاو

وخلي عندك حلاو او بوالين او اي شي تحبه


وبس تسمع كلامك اعطيها وسوي تصفيييق وهيصي علشان تفرررح

الله المستعااان​

 

[شمس بلقيس 2010]

حاولي لما تسوي شي .........زين تمدحينها .........وتعطينها هدية مثل حلاوة عصير .......وهكذا .........امدحيها اذا خلاتك تلابسينها ..........قوليلها شاطرة .......ممتازة حبيني شاطرة تسمع الكلام ............وراح اعطيها هدية .......واعطيها حلاوة وعصير لان العصبية معاها ماراح تنفع ولا الضرب ........بالعكس راح تزيد ............

 

[نبضات زهرة]

يا عزيزتي انا تخصص رياض اطفال و درست فيه اشياء كثير و حلوة و مفيدة جدا

من ضمنها العناد عند الأطفال يبدأ من سن سنتين و نصف و يتأجج في الثلاث سنوات

و الأم لما تفهم خاصية المرحلة اللي يمر فيها طفلها و مميزاتها بتراعي و تحاول تتصرف لأن الطفل بالعناد هنا يقول ( انا موجووووووووووود )

يعني مستحيل تغيرين ها الصفة الا بأشياء أهمها :

عدم الصراخ على الطفل بتاتا لأنه بهذا الوضع راح يزيد و أكيد انتي القدوة
فمثلا طفلك يبكي و كان زوجك نايم انتي تقولين بصوت عالي خلالالالالالالالالالالاص الزوج بيصحى من نومه معصب و يصرخ أيضا و ينقلب البيت حلبة مصارعة
بالعكس هالله هالله بالمدح على اي شيء و تشوفين نتائج مبهرة باذن الله
يعني لا تمدحينه وجهك لوجهة لا بالعكس امدحيه امام شخص اخر يعني لما بتخرجين قولي لزوجك او حتى لولدك الصغير الحين اختك هي عاقلة و كبيرة و مؤدبة تلبس ملابسها بسرعة و كذا في الأكل و كل شيء
ايضا ما يمنع انها تلبس لأن هذا يعزز شخصيتها و يجعلها تثق بنفسها أكثر
لكن فهميها البيجامة و لبس البيت هي تلبسها لكن لبس الخروج انتي تساعديها فيه قوليلها لأني أنا كبيرة و أعرف الاحلى
و بليييييييييز بليييييييييز لا تكثرون من الهدايا و الأشياء العينية حتى لو كانت حلاوة لأنن هذا يخلي الطفل مادي و ما يمشي الا بمقابل و اتذكري ان طفلك راح يكبر و ما عاد يعجبة الشيء البسيط
يعني انتي الحين تقدرين على حلاوة في كل مرة لكن لو كبر بيرهقك بمطالبه
فهميها ان هذا الشيء لنفسه ليس لك
للعلم انا عندي طفلين يعني ليس كلام من فراغ الله يقدرنا على تربيتهم​

 

[ريفان2020]

انا بنتي بسم الله عليها نفس المشكله ولقيت احسن شئ انك تسوين نفسك مو ملاحظتها وبنفس الوقت وانتي تلبسينها كلميها باسلوووب هادي مثلا شفتي القطوه اللي بالشارع يعني سوالف تنزل لمستواها المهم تشغلينها باي شئ بطريقه هاديه دعواتك لي ولزوجي واولادي ان الله يلم شملنا جميعا

 

[عروسـة]

نمله فوشيه
طيب انا ماكنت عنيفة ايام حملي ؟ يمكن عشان كنت ابكي كثير ودايم مشاكل مع زوجي ؟
سبحان الله الاولاد اهدا من البنات حتى عندنا اشوف كذا !! حتى طفشت من وضعي دايم اتشكى عند الناس تحسين مافي اي شي ثاني اقدر احكي فيه عنها غير النكد !!!

كل الغلا
جربت بس ماقدرت اصبر بسرعة اعصب .. احس مايمشي معها اسلوب التشجيع ابدا .. الله يعين بس

شمس بلقيس
مو على كل حال تمشي عليها هي الله يصلحها عنيدة وعادي اذا لبستها ومدحتها ترجع تشيل ملابسها وتقول انا بالبسها بس احيانا لما اكون مستعجلة اقرصها على يدها والبسها تلبس معي بسرعة لانها تصير تبكي من جد مو دلع .. انا عارفة انه غلط اقرصها بس اذا صرت مستعجلة مااقدر اصبر عليها !!

نبضات زهرة
اسعدني تعليقك جدا .. واضح ويبين الاساسيات استفدت منه والله
بس احيانا اول ماتصحى من النوم تجلس في سريرها وتصارخ تناديني ولما اروح لها كل شي تقول لا .. يعني اجلس تقول لا اروح تقول لا تبين فطور تقول لا تبين حليب تقول لا .. وعند النوم بعد نفس الشي تصارخ لاتلحفيني ولا تشيلين اللحاف سوي لي حليب ولاتسوين
وبعد تزعجني عند اخوها لما تشوفه نايم تجي تصارخ عليه وترمي عليه الالعاب

ياليت تفيدينا في النفسية العجيبة !!

ريفان
لما احاكيها بهدوء تمشي معي عادي بس اول ماتحس اني مثلا دخلت يدها مع الكم او سكرت الازرار تجلس تصارخ وتبكي تخيلي وضعي لسه ملبستها ومضبطة شعرها تقعد تحوس كل شي وتصارخ غير الدموع والاشياء الثانية اللي تملى وجهها تخيلي وضعي ابدا فيها بعدين اذا خلصت لبسي ولبس ولدي ارجع لها اضبطها من جديد !!
ولو مالبستها قبلنا ماتخلينا في حالنا تصيح وتصارخ باروح معكم ليش ماتلبسوني وهالحركات



​

 

[um elyas]

الله يعيينك انا عندي اثنين الولد عمره اربع سنوات والبنت تقريبا بشهر تسعه تكمل السنتين

وكل واااحد اعند من الثاني

مدري شتصرف معاهم

الله يكون بالعون بس

ان شاء الله يكبروا ويعقلو بس راح يكون من عمرنا اكيد

موفقه

 

[عروسـة]

ام الياس ..

مشكورة ع مرورك حبيبتي .. وربي يعطيكي الصبر على اولادك من جد الواحد مايقدر يعيش حياته بدون تضحيه بنصف العمر لعياله ...!​

 

[زوجة ولد بلقيس]

انا بنتي عمرها اقل من سنه

وهي الوحيده عندي وبتجنني

الله يعينكم

 

[بداري5]

اغلب الاطفال زي بنتك خاصه الي في هسن
بس اهم شي وسعي صدرك واضغطي على نفسك
علشان نفسيت بنتك في المستقبل واحذري كل الحذر انك تخوفينه تسوين
نفسك طلعتي عنها والله يجيها خوف تندمين طول عمرك
00اختي بنتها عمره سنه ونص
وامه تشتكي منها عكس اخته الكبيره 00وانا جربت الصبر مع ولدي الصغير
والحمدالله طلع هادي عكس اخوانه اخوانه كنت امشي رايي عليهه واصارخ
ولا اخذ منهم الا العناد ووجع الراس والله اني لتذكرت معاملتي لهم اندم

 

[عروسـة]

زوجة ولد
الله يعينك لسى ماشفتي الدنيا >> تخوفك
​

 

[عروسـة]

بداري

شكرا على مشاركتنا تجربتك ..

بنات باقول لكم شي ,,
هاليومين عندي خدامة مؤقتة تقوم عني باغلب الشغل الغسيل والكوي والمواعين فصرت الاقي وقت اطول لبنتي .. قلت لحالي هذا احسن وقت اقدر اطبق نصايحكم .. سبحان الله كيف تغيرت خف صراخها كثير عن اول بس لسى موجود ,, اكثر شي صرت اتجاهل ازعاجها بما اني مروقة واعصابي مو مشدودة اخليها تاخذ راحتها تلعب بالموية في الحمام وانتم بكرامة مااشيل همها في الخدامة تكون منظفة الملابس ومكويتها انا ماعلي الا اشيل الملابس المبلولة واطلع من الدولاب لبس نظيف ولما ينسكب العصير ع الموكيت اخلي الخدامة تنظفه وزي كذا .. وبعد صرت اسوي اشغالي اللي متاجلة مادامت الخدامة تساعدني ف خف احساسي بتانيب الضمير .. الشي اللي لسه مضايقني لبسها صارت تخلع وماتلبس ولما ادور وراها تقعد تصارخ وتنرفزني .. ولما قرصتها راحت تعلم ابوها تخيلو شكلي قدامه :$
اهم شي لبسها بيجامتها وراحت تنام ...

ربي يعين بس ..!​

 

[دمعةشوق]

.

الله يصلح النيه والذريه ......​

.

 

[توتو الحبوبه]

اختي نصيحه مني لك

اولا: طوووولي بالك عليهاا

والشي الثاني: تجاهليلها لان الاطفال اذا احد تجاهلهم يمشون عدل

والله يعينك عليها ويصبرك ويهديهاااا

 

[عال العال]

الله يعينك عليها
سويزي ماقالو الاخوات خليك هاديه معاها وشجعيها بالكلام اكثر من الهدايا وانزلي لمستوى عقلها بالقصص والمديح

 

[عروسـة]

دمعة شوق
امين يارب

توتو الحبوبة
جالسة احاول الله يرزقنا الصبر بس
ومشكورة ع الدعوة الحلوة

عال العال
مشكورة ع مرورك حبيبتي

​

 

[Honey blqees]

الله يعينا اختي نفس حاله بنتي

 

[المتفائله_]

يعطيكم العافيه استفدت من الموضوع

 

[مشكلتي قمر]

نفس حركات بنتي عمرها 3 سنين وثمانية شهور مرررة مزعجة كل شي تكسرة بالبيت واذا طلعنا لمطعم اوسوق تزعجناا ونطلع بسرعة وابوها كرة الطلعة بسبتها واذا جلس ابوها بالبيت تزعجة بصوتها اللة يعينا عليهم وانا من النوع العصبي مررة اصارخ علية اذا غلطت بس ماتخاف مني احسة عادي عندها