بنات ريلي يجذب ومب عارفة شو الحل

[نــــونــــي]

السلام عليكم بنات بلقيس
شحالكم؟؟

بنات طلبتكم : من فترة ريلي دايما يقولي عنده شغل في قطر وتقريبا كل اسبوع في الويكند يروح ولان كان يخلي جوازه في السيارة ماكنت اقدر اشووف اذا صدق او لا بس انا كنت واثقة فيه

بس من فترة لان تعامله اختلف معاي وتصرفاته مالها معنى طلبت الجواز على اساس الجامعه تبيه بس اكتشفت ان مافي في جوازه اي ختم مال 2010

والحين متردده اكلمه بالموضوع واقوله ان عندي خبر بس باسلوب حلو او اني اطنش ولا كأني عرفت شي؟؟

بنات بليييز ردوا عليي انا ابي حد ينصحني ويقولي كيف ابده معاه ... مابي اضارب معاه او اني احسسه اني شاكه فيه بس ابي اعرف ليش ها كله وانا مامنعته ان يروح ويسافر​

 

[نــــونــــي]

بنات بليييز ساعدوني اتريا ردكم

 

[antelope]

الله يكون في عونج

للأسف ماقدر أقولج طنشيه وتمين مقهوره، ولا اقدر اقولج كلميه، وتستوي مشاكل من بينكم

لأنه كل زوج يختلف عن غيره، كيف يتقبل وإلا لا !

 

[بنت عبد اللطيف]

الله يساعدك كل شيءولا الكذب

 

[ice creeem]

الحين يسافرون بالبطاقه المدنيه يعني مو بالجواز كل دول التعاون ماراح تعرفين الصج الا لما تطلعين برنت من الجوازات

 

[لانا]

بالبطاقة المدنية يسافرون بدون ختم على الجواز ...

 

[لمعةالماس]

الله يكون بعونك ياررررب

 

[جوري التركي]

موشرط الحين يسافرون من غير جوزات اذا بطاقة الاحوال معه
يقدر يطلع ..
ونصيحة هدي ماتسوى عليك نصيحة لاتنبشين خلي الوضع
عادي بس غيري من نفسك وانشاالله يرجع لك

 

[*..الحلوة..*]

طيب اني حاولي بذكاء تسالينه ها شخبارها قطر شو سويتوا خليه يقولج شو صار معاكم هناك وشوفي بتعرفين من جوابه ولا تواجهينه لانج ما بتربحين اي شي غير عوار الراس حاولي تغيرين من اسلوبج معاه بدون ولا كلمة وسويله الاشياء اللي يحبها ومفاجات وهدايا وحسسيه انج وايد تحبينه وانج مشتاقتله وانج متعلقة فيه وتفتقدينه يوم يسافر وايد

 

[نــــونــــي]

كلامكم عالعين وعالراس مشكورين حبايبي

الله يعلم بحالي ..
مافي شي تتوقعونه ما سويته بس مايعجبه
تخيلو قبل كان يسأل عني وصلت الجامعه او لا والحين لما اقوله حياتي انا توني واصله يقولي اوك
مرة كنت مسويتله مفاجئة قام وخربها عليي معني ماعطته خبر ان يتأخر عليي شوي
ومرة قلت بفاجئة بالحنا دام يحبها ومن فترة ماتحنيت تخيلو لما وصلت البيت كان حالف اني لو تأخرت شوي بيطلقني ولما شافني متحنية ومتعدله وقلتله ان هالشي عشانه قالي خليه لج
ولما اييبله هدايا او افاجئه بأشيا ثانية تعرفون ان مايفتح الهدية الا لما يمر عليها شهر

شنو تبون تعرفون ولا شنو ؟؟
احسه يتهرب مني مايبيني معني والحمدلله مب مقصره معاه بشي وفي نفس الوقت جميله واتعدله واسوي اي شي هو يحبه بس

قلت بغير لوكي وغيرته وغيرت شخصيتي بس تميت بطيبتي ومافي فايده
كلامي معاه كله اوك عمري ما ناديته باسمه لان على لساني كلام الحب وبس

سوري لأني اشكيلكم بس ماعندي حد اقوله أو استفيد منه غيركم

الله يعطيكم العافية حبيباتي والله يوفقكم **

 

[antelope]

كل وحده منا من خلال الرد بتحط احتمالات

يعني مب مقصره في شي وياه وفي نفس الوقت يتجاهل اللي تسوينه عشانه !

أكيد شي صعب

بس يمكن تعود على كلمات الحب والغزل والكلام الحلو منج دوم، فما مالقى شي يديد

ولو إنج غيرتي في اللوك :2:

جربتي تهتمين في شكلج بس ماتناقشينه ، اهتمي في شي ثاني، مثلا تقرين كتاب

معين، يعني مايكون هو شاغل بالج .. :11:

بس مب لدرجة الاهمال

 

[وجدالمشاعر]

الله يكون في عونك حبيبتي طيب حاااولي تبعدين عنه اشوي حتى يشتااااق لك ولا غيرو جو سواء الله يساعدك

 

[اليزابيث111]

يابعد جبدي والله


اوووووووول شي كم صار لج متزوجه حبيبتي ؟ انتظر جوابج يالغاليه وكل شي له حل وربج كبير

 

[حين ميسرة]

حبيبتي شوفي شو نمط زوجك واتعاملي معه على هل اساس
الله يعينك يا قلبي ويهدي بالك

 

[نــــونــــي]

مشكورين عالردود


صارلي مزوجة تقريبا 10 شهور ...

وعن سالفة انشغل عنه انشغلت وايد خاصة اني ادرس وما اهتم باللي يسويه بس اكيد اذا طلب مني شي اقوم واسويله اياه
وعن سالفة الكشخه اووه عاد كل شي ولا الكشخه امووت عالتعدل بس مو دايما بس احب المكياج لو بحطه خفيف واللبس على حسب

ابتعدت عنه فترة اسبوع ولما رجعت كأنه عادي ولا كأني رحت عنه
واصلا يوميا ما اشووفه واخر الاسبوع يسافر ولما يرجع ويشوفني حته كلمه حلوة ما يقولي وحضن ما الاقي
ولا احصل منه اي شي

كل شي تتوقعونه سويته له ول شي يخطر في بالكم سويته
وحته تطنش طنشته وتجاهلته قلت يمكن يحس بس مافي فايده

قلت يمكن حد مسويله عمل او سحر بس الله اعلم "لو حد مسويله شي اهون علي بوايد من ان يعاملني هالمعاملة بنفسه"

الله ايسر اموري وايسر اموركم ان شاء الله

 

[نــــونــــي]

حبيبتي شو تقصدين بالضبط في نوعه؟؟

 

[نــــونــــي]

حبيبتي اليزابيث 111
انا مالجه قبل سنتين وشوي بس مزوجة صارلي 10 شهور بس
وفي السنة وشوي قبل العرس ريلي كان غير مو لأنه مالجين ويدلعني على هالاساس لا بس تعامله اسلوبه كل شي كان غير عن الحين
مو بس معاي حته مع اهلي واهله
بس عقب العرس الكل ملاحظ ان هو متغير يعني قبل ماكان يرضه ان حد يتكلم عني الحين عادي عنده يطنش ولا كأنه سمع شي واشيا وايده

 

[اليزابيث111]

نوني حبيبتي بعدك عروس جديده يعني

اسمعي ياقلبي هذي كلها وساوس شيطان لاتخربين بيتك بيدك طنشي اموضوع والزوجه الذكيه تحاول تغير زوجها على حسب طبعها حاوليتكونين طبيعيه ولاتوسوسين وايد لو مايحبك ماخذك ولا خلاك ام لعياله شيلي من راسك كل هالامور علشان ترتاحين وحاولي تسوين اي شي يشغلك كبري راسك نوني الزوج والزوجه يكونون مخلفين في امور كثير من بيئه وثقافه وطباع ان شاء لله ربي يرزقك منه بالذريه الصالحه وتكونين احلى ام لعياله ياااارب اكثري من الاستغفار والدعاء له انه يكون لج الزوج لصالح وانج تكونين له الزوجه الصالحه حبيبتي لاتخلين لشيطان اي منفذ في حياتج الزوجيه بارك الله لكم ياارب زواجكم هذا ورزقكم من الذريه الصالحه بنين وبنات اللهم امين يارب العالمين خليج ذكيه يانوني اهم شي الزوجه تكون ذكيه في حياتها لانها اساس البيت وكل شي كبير يصغر من المشكله اللي الهم ولاتظلمين دون ماتتاكدين من الموضوع ربي يوفقك يارب ​

 

[اليزابيث111]

نوني اسمعي ياقلبي

احسن شي طنشي واذا هوو شد ارخي حاولي تخلينه هو ليقول شوه صار مو انتي
خلي الكره في ملعبك واهم شي لاتدخلين حياتج ابدا لامن اهله ولا من اهلج حلي مشاكلج بعيد عنهم

خلج ذكيه ياانوني وخبريني اول بول عن حياتج وان شاء الله امورج بتكون بخير بفضل الله اللهم امين ربي يسعدج

 

[نــــونــــي]

حبيبتي اليزابيث ... انا شفت جوازه ومالقيت اي ختم
ولما اتصل فيه "على اساس هو مسافر على قطر" الرنه تكون داخليه مب خارجية
ولما اطرشله مسج ياخذ مني بس 18 فلس معنه لو كان برع الدوله لازم ياخذ اقل شي درهم عالمسج

واخر مرة قالي لاتتصلين فيني ولا اطرشين مسجات لما اسافر الا لو كانت وايد مهمة

وهالوايد مهمة عنده اذا خلاص حد من اهله صار في شي لا سمح الله يعني الشي حته مايخصني

وعن اليهال : قالي مايبي يهال واذا حب اني اييبله ياهل اكثر شي يبي واحد
واصلا علاقته معاي كأني اخته مو زوجته

مشكوورة حبيبتي ان شاء الله بسوي الي قلتي عليه بكثر منالاستغفار والدعاء وان شاء الله الله ايسر اموري ويرجعلي ريلي مثل ما كان واحسن