باله مشغول ودايما يسهر واحس ماأقدر استحمل!!!

[كتاب مغلق]

السلام عليكم ورحمة الله

يابنات ساعدوني دخيل الله

ماأعرف شسوي وماأعرف كيف اتصرف صح
احس عمري بموت من القهر والغصه والحقراان

زوجي يحبني ويمووووت فييه،، ماكان يستحمل يشوف دمعه ماكان يستحمل يشوفني مضايقه
ماكان يقدر يطلع اذا انا مضايقه او ايشي فييه،، كان اول شي يكلمني ويهديني ويضحكني بعدين يطلع
ماكان يتأخر
انا أحب زوجي وايد ومن كثر ماأحبه كنت اغار عليه بس ماأبين // بس الحين اغار عليه وايد وأبين له، يضحك ومرات يقول انتي من شو تغارين ومرات يحسسني بس " بدون مايقول" ان غيرتي تعتبر سخافه

مره اظاربنا وصحت وكنت بموت وصاح معايه ووعدني انه مايتأخر،،وعدني بدون ماأطلب منه،، وطلعني في نفس اليوم وتكشتنا وبعدين قال لي لين متى يقدر يتأخر
تخيلوا انا اغبيه قلت 3 الفجر ="(
مره وحده وفى بوعده والحين كللللللله يتأخر
وكل نهاية اسبوع يروح البر ويخليني والحين كملنا شهر واليوم الخميس واباكم تقولولي شسوي اذا قال لي بيرووح

بنات زوجي يغبي شي في اللابتوب دايما يغطي السكرين عنني
ومره احتلت وقلت له احتاج لابتوبك قام يعابل فيه قبل لا يعطيني اياه
وقلت له انته شسوي جان يقول شي خاص ومن حقي تكون عنده خصوصيه!! شفته بنظره وقلت خل لابتوبك لك على فكرهلابتوبه مايفتح غير ببصمه من اييده ومن القهر سرت وشمخت مكان البصمه واخترب بس يفتح الفايل العادي
تلفووونه دايما بقفل
والحين عنده بلاك بيري مع ان زوجي مايحب التلفونات الكبار المعقده

يسهر لين الساعه 4 برى البيت ويرجع يقعد على اللابتوب لين الساعه 5 ويوم يدخل اسأله الساعه كم يقوللي مايدري ويوم اشوف التلفون اقوله توك ياي يقول لا من الصبح في الصاله
اسأله ليش ماييتني يسكت ومايرد
عصبت مره وطلعت برى ارقد في الصاله وعادي عنده خلاني ورقد

البارحه وسوسلي الشيطان وقلت له افتح الماسنجر
قام وعصب وفتح وانا كنت اصيح من الخاطر وراواني كل الايميلات بس انا كنت مغطيه ويهي واصيح
وآخر شي قاللي بعصبيه " لوسمحتي ممكن ارقد الحين؟؟؟""
دخلت الحمام وتميت اصيييح ساعتين وغفت عيني في الحمام ورقدت ،، ونشيت وشفت عمري وتميت اصيح
دق الباب وفتحت ولويت عليه وانا قاعده وقلت له سامحني

بنات انا أمووووت على زوجي وأذبح عمري ولا انه يضايق
اتندم اني سويت معاه جيه مع ان قلبي يحترق من داااااخل

وفي شي خاص بعد
انا اتعدل له والتزين والحمدالله من جهتي ماأقصر
بس لما اييني هذاك الشي مايكمل،،، ينتصب عنده العضو بس لما يدخله على طووول يرقد
="( بمووووووووووووت يابناااات ماأعرف أكلم منووو

وعلى فكره انا حامل

 

[أطفالي دنيتي]

اختي اللي فهمته انك مالك الاشهر متزوجه يعني تو الناس على انك ماتستحملين الزواج موكل تماشي ووناسه ورومانسيه مثل ماكنا نتخيلها قبل مانرتبط لا الزواج مسئوليه وتكافئ وتحمل وصبر واخذ وعطى لنا ماقولك اسكتي لزوجك ولاتبينين انك زعلانه من تاخره لا بالعكس بس بينيله انك متضايقه من هالشي لانك تشتاقين له وودك يقضي اكثر وقت معك لان الشغل ياخذه منك وبعد في الليل اصحابه مومشكله يسهر مع اصحابه بس لو يجي بدري بدل الساعه 3يجي الساعه12او1ولازم تعرفين الرجال مايحب ان احديساله فين رحت ومنين جيت والساعه كم وسين وجيم.تعاليله بالسياسه وان هذا من زود الحب والشوق ترى حتى الواحد قبل لايتزوج مايحب احد لاامه ولاغيرها يحاسبه على روحاته وجياته .وصدقيني احيانا طلوعه برا البيت افضل وهذا بتحسين فيه لما يجي البيبي ان شاء الله بالسلامه وصدقيني بيتغير انا زوجي كان يسهر مثله الحين صار يجي 11ونص 12 ان طول واحده ونص ولما يجي اتمنى لوقعد شوي زياده هذا لاني الحمدلله اعرف وين يسهر ومع مين من فضل الله والله يوفقك ويسهل امرك

 

[العنـــا]

الله العالم بس يمكن لأنج حامل وتعانبه وهرموناتج مسويه فيج جيه

ويمكن اشياء صانيه الله العالم

بس لو تبين نصيحتي خلج من اسلوب المفتش كونان الصريح جيه قدامه يعني يله افتح وراويني وانا بكمشك بالجرم المشهود

خل اسلوبج غير وراقي حتى لو كشفتي عليه شي لا تفرينه منج

بالعكس الهدف انج تقريبن من زوجج مب تنفرينه منج وتبعدينه عنج

فكري بعقلج وخلي عواطفج الجياشه التي تخليج تستعجلين الأحكام عليه

تروي في اي كلمه بتقولينها واي تصرف بتسوينه

قولي مثلا انا لو قعدت افتش وراه وكشفني شو بيكون موقفي

اقري قصص ومقالات الدكتورة ناعمه وايد بتستفيدين منها
وبعدين سالفه انه ما يكمل

لاحظي يوم يكمل هل كميه الماي الي يجبه وايد ولا شوي

اذا شوي عيل ممكن لأنج حامل يمارس العاده السريه ويمكن على الاب حاط صور ومن هذي السوالف كل الريايل جيه هالزمن المتزوج والغير متزوج

وبعدين اغلب الريايل حتى اخوني ما يحبون احد يلعب في تلفوناتهم لأن بين الشباب مسجات وصور وملفات فيدوا يعني مب محترمه

اذا توج عروس اصبري شوي على ريلج لين ما تعرفينه زين

والله الله في عمرج لا تعبين نفسج وانتي حامل مب زين لا لج ولا لبيبي

 

[كتاب مغلق]

أطفالي دنيتي
فديتج اول شي ابا اشكرج على الرد على موضوعي
كنت اتظر اي رد بفارغ الصبر
انا الحين كملت سنه متزوجه
ماعليه انا فاهمه ربعه واصدقائه والسهر والحين هو بعده ماداوم ويقول كل ربعه يرقدون في النهار ومايقدر يقعد وياهم غير فالليل،، واي دايما تقول خليه قلبه متعلق بربعه ،، اسكت ولا اقول شي
بس كنت اسكت لأنهكان غير كان يتصل لي ويقول لي كلام حب ودايما يسأل عني
وكان مرات يزعل يوم ماأتصل ويقول ليش ماتتصلين وشو شاغلنجعني ويعاتبني " العتب الحلو"

بس الحين يوم اقوله حبيبي انت وين ؟ يرد بعصبيه " انا مشغوول! او يقول هنيه يعني وين بسير؟"
مع ان انا بس أسأل عنه مش من باب الفضول بس لأنه يزعل لما ماكنت اسأل

الله يصبرني انشالله والله يحل مابيننا من مشاكل وانشالله الله يهدييه دايما ادعيله
اشكرج فديتج على الرد

العنا
انا ندمت اصلا وخلاااص لا بحقق ولا بدور شي من وراه
ماأعرف اذا يمارس العاده السريه
لأن الحين انا بما اني حامل احس نفسي كله ابا هالشي ودايما جاهزه له ودايما اسوي حركات تبين له ان انا اباه،،
بس ماأدري ليش مانكمل هالشي
الله يهديهم والله لو فيه شي في اللابتوب او التلفووون صدقوووووني بمووووووووت بمووووووووت بموووووووووووووووووووووووووت ="(


مشكوره يا العنا على الرد

 

[نجمة براقة]

حبييتي تو الناس على الهم والنكد

مثل مافهمت انج ببداية زواجج عيشي هالأيام الحلوة معاه بدون شك وسوالف تعور الراس ولاتخلينه ياخذ عنج فكرة انج وحدة نكدية ترى الريال مايحب المرة النكدية الي كله تصيح وتفاهمها مايكون الا بصياح ترى ماراح يأثر فيه بعدين صدقيني

حاولي تهتمين في نفسج هالفترة وتراج حامل يعني اهتمي في نفسج وخليه يعيش معاج هالفترة الحلوة خليه يشاركج وحاولي تركنين مشاكل هالفترة أو تتناقشين معاه بهدوء وبدون صياح بدون ماتوصل الأمور بينكم للصراخ والزعل وموفقة حبيبتي ولاتنسين ان فترة الحمل فرصة للوحدة تتدلع على زوجها وتطلب منه الي في خاطرها تراه بينفذ لأن الي في بطنج يهمه أمره بعد صدقيني بس نسييتي تذكرين هل هو فرح بخبر الحمل ؟؟؟لأن احتمال يكون هالشيء مأثر عليه خاصة انه يمكن خايف انه يأذيج أو يأذي البيبي لاسمح الله

والله يهدي بالكم ويسعدكم ان شاءالله

 

[كتاب مغلق]

نجمه براقه
انا الحين كملت سنه على الزواج،، هل اعتبر توني يديده في هالزواج مع اني ماأحس،، احس اني من زمان معرسه
والصياح هيه العقده اللي اعاني منها
ودي ودي ودي مرات ماأصييييح والله كرهت عمري
انشالله بهتم بعمري وبحاول اييب ريلي بالزين والأسلوب الحلو
والله مستعده اسوي اي شي عشان نعيش حياه حلوه بدون مشاكل
بس داااايما اييني الوسواااس والخوف من اللي يغبييه عنيه
مشكوره على الرد فديتج

 

[الماسه9]

حبيبتي كتاب مغلق باختصار لازم تنتبهين لعمرك ولاتكثرين الصياح والزعل ترى بعدين راح يمل منك ومن صياحك بعدين لاتكثرين من التدقيق بكل شي يعني اتحملي عشر مشكلات وكلميه بمشكله وحده لان لوكلمتيه بكل شي ماراح يصير لك كلمه عنده وش راح يقول هالمره صايحه صايحه مو راضيه موراضيه خليني اسوي الي ابي واطنشهاولاتنسين اختي الصلاة والدعاء والاستغفار

 

[كتاب مغلق]

الماسه 9
صح كلامج
انا وايد اخاف يطفر مني،، واحس من كثر الصياح استوت الدمعه ماتأثر فيه
انشالله بهدي عمري الحين وبحاول افكر صح
وانشالله بدعي اكثر وأكثر


مشكوره وايد على دخولج لموضوعي والرد عليه

 

[سندس نجد]

اختي زي ماقالوا لاتصيرين مثل المحقق كونان:sly: ولاتصيرين لزقه وراه وراه فكي شوي عنه
وخليك بعيد عن موبايله والاب توب حقه انتي زيني علاقتك فيه وبس واذا فيه شيء ربه فوقه يحاسبه موانتي وعزي نفسك خلي لك حياتك الخاصه واهتمامك ترى الرجال مايلاحق الا المره الي ماتفكر فيه وتشيله من راسها بس مو يعني تهملينه وتطنشينه بالمره لا قومي بواجبه دلعيه كل فتره وفتره ولاتلزقين فيه وبعض الرجال يصير عنهم امور خاصه مو بشرط تكون مو زينه بس مايحبون يطلعون حريمهم عليها مثلنا حنا في بعض الأمور نقولهم سوالف حريم مالك فيها:msn-wink:
ولاتنسين الدعاء وقيام الليل والله يريحك حبيبتي
يعطيك الصحه والعافيه ويسعدك دوم​