انصحوني طلبت الطلاق وتحسفت وزوجي يقول انتي اللي ارجعي بدون شروط

[ندوش2010]

بسم الله الرحمن الرحيم

حبيباتي انصحوني وش اسوي كل مره تصير مشكله بيني وبين زوجي اقول له ودني لبيت اهلي طلقني ماابيك يمكن 4مرات قلتها واهلي بديره وانا بديره وجتني وظيفة تعاقد لمدة سنه ونص في ديرة زوجي وانا متحسفه على اللي قلته ووضعي في بيت اهلي مومريح وكلم زوجي ابوي وقاله انا بروح المحكمه خلاص بطلقها تعبت معها ولمى تناقش مع ابوي قال خلاص اذا تبي ترجع ترجع من غير شروط وانا ابي ارجع علشان الوظيفه مابيها تطير مني
زوجي عمره بالخمسين وانا بنص الثلاثين هو مطلق وعنده بنات كبار حاط المطلقه في فيلا لو تشوفونها وفخامتها وحاطلها شغاله وانا شقتي حتى البويه تقشرت وعيا يصلح بيتي وعيامن الشغاله
والعزايم مايحطها عندي يحطها عندها اوعند اخوه اهله مايجوني يقولي من حضرتك يجونك روحي انتي عندهم
انصحوني بأموت من القهر لاتقولون لاترجعين ترى هذا ثالث رجال اتزوجه والله موعيب فيني بس حظي من الله
فديتكم قولوا وش اسوي لازم ارجع علشان دوام السبت

اللهم اني مسني الضر وانت ارحم الراحمين ​

 

[زوجة منسية]

الاستخارة هنا هي أفضل حل .
ورأيي الشخصي ارجعي وإنشغلي بالوظيفة ، ، ،

 

[أم تميم2008]

استخيري والله يكتب لك الخير وعليك بالدعاء في الثلث الاخير من الليل بتلقين الراحه باذن الله
الله يساعدكي ويسعدك ويسخر لك الخير يارب

 

[m-r-m-r]

زوجك ياحبيبتي فيه فرق بالعمر بينك وبينه وانتي تعاملينه كنه صغير توه وعلى الطالعه والنازله طلقني هو له تجربه سابقه وخبره يبي الحرمه الرزينه الثقيله ويمكن متحسف أنه طلق زوجته يوم شاف تصرفاتك معه أرجعي وتعاملي معه بحكمه وانتي الكسبانه يصير على كيفك

 

[مشتاااقه]

يالغلا هذي طليقته يعني لاتفكرين فيها مو زوجته
واكيد عاشت معه عشرت عمر وصعبها يطلعها من بيتها ويبعدها عن بناتها
والطلاق مو لعبه كل مختلفتي قلتي طلقني
والمشكله تبين ترجعين عشان الوظيفه مو زوجك
انتي غيري من نفسك وان شاء الله يتغير​

 

[الغد المجهول..!]

تفكيرك غلط..اذا بترجعين ارجعي اذا كانه يناسب..واذا مو مناسب لاترجعين عشان وظيفه..هذي عشرة عمر مو تعاقد سنه!!

 

[ابتسامه مهجوره]

لا تعلللللللللللللللللليق

 

[الشتاء الدافئ]

تعوذي بالله من ابليس وارجعي لزوجك ...ومافيها اهانه لك بالعكس تفاهمي معه بهدوء وبيني سبب زعلك وقولي مادام طلعت لي وظيفه ماعاد ابي منك شي (دقيه بالحكي ) فلوسي بتنفعني ...واحمدي ربك على وظيفتك ومن فلوسك رممي شقتك ...اذا زوجك ملتزم بالدين والاخلاق لاتفرطين فيه عشان المظاهر ...داري على شمعتك تقيد...

 

[قطـــــريه]

يعني خايفه عالوظيفه ؟ وماتذكرتي ان بيت هلج مب مريح الا لمن جات الوظيفة ؟ ومطلقه مرتين وتكررين الطلاق كأنه لعبه عندج ؟ الله يهديج ولا تعليق على كلام الاخت ابتسامه مهجورة

 

[تلميذة مريم]

"أن الله لايغير مابي قوم حتى يغيروا مابأنفسهم " فحاولي تتغيرين للأفضل وتكتشفين مميزات المطلقةاللي خلتها تحصل على كل لاشيء وتقلدينها ..بالنسبةلطلب الطلاق أحذري تكررينه وتتساهلين فيه الطلاق حل للأمورالكبيرة مو الصغيرة فمثل هالمشكلة بنظر الكثير تافهه ولها حل

 

[راحةالقلوب2]

الله المستعان

 

[ملاذ الخواطر]

اذ زوجك طيب ويستحق تكملين معة ارجعي له وتوظفي وعيشي حياتك وانبسطي تراوانشغلي في وظيفتك الزمن هذا ماعد فية رجال شوفيني انا تزوجت للمراة الثانية على ضرتين ومارتحت معاه ابداااًوطلابه الطلاق وطلقني واسترجعني بدون علمي ونا لي سنة في بيت اهلي معلقة الله لايسامحة ..وعندي منة ولد وان توني في عز شبابي ......والزمي الدعاء والاستغفار والله يوفقك​

 

[الوردوالياسمن]

الله يهديك

 

[هذا رأيي]

السلام عليكم ورحمة الله وبركاته


أصلحك الله وهداك !!!!!!!


بترجعين لزوجك مو حرص ع حياتكم الزوجيه ولاحب فيه


لكن خوف على الوظيفه؟؟؟؟!!!!!!!


شي عجيب حقاً !!



ومطلقه مرتين وتكررين كلمة طلاق على زوجك..وتقولين مافيني عيوب؟؟!!



أختي غيري من نفسك ليتغير معك زوجك ..



وتذكري قول الرسول صلى الله عليه وسلم :-

(أيما امرأة طلبت الطلاق من زوجها في غير ما بأس فالجنة عليها حرام)



الطلاق مو لعبه,,وأنت موصغيره ..فكري بعقل قبل الفوات والندم

@ مروضة الشمااالي @

​

 

[جبل مايهزه ريح]

اين المشكله بيت اهلك مو عاجبك...


زوجك مو عاجبك...


ماذا تريدين ؟؟؟؟لا احد يستطيع مساعدتك الا شخص واحد وهو انت ممكن نقول روحي لاهلك وفكي نفسك

وزوجك قمة الروعه ونظلمك؟



وممكن نقول اصبري وزوجك سيء جدا ؟؟وايضا نظلمك


اجلسي مع نفسك وضعي الحل انتي ؟وفكري بعقل وكلمة راس((ماله داعي الدلع الرجال خمسيني ..وله تجربه بالزواج...وانتي لك تجربتين...فكري بالعقل مو بحماقة المراهقات.



سامحيني على قسوتي

 

[دلـــوعـــة]

اختي بقول لك شي
انتي تزوجتي ثلاث رجال .. والثلاثة طبعا مختلفين كل واحد منهم من بية وتربية مختلفة

وانتي الحلقة الوحيدة في الزواجات الثلاث اللي متشابهة

فلما الثلاث زواجات يفشلوا معناها الغلط من مين ؟؟؟

راجعي نفسك حبيبتي .. اسلوبك .. طريقة تعاملك .. كلامك ..

وماله داعي كل شوي طلقني طلقني

خاصة وانتي مو قد كلامك

يعني لما كنتي تهددي وتقولي طلقني كنتي ناسية انك هذيي ثالث مرة بتتطلقين وانك مابترتاحين عند اهلك

والحين لما صار الموضوع جد تذكرتي؟؟

فكري يا اختي بكلامك قبل لا تقوليه

وراجعي وضعك

واستخيري قبل كل خطوة

الله يوفقك

 

[اميره - بدنيتي]

ااقول تعوذي من ابليس وردي بيتك
الطلاق والله دماااار للنفسيه والرجااال كبير وناااضج بس الحياااااااه يبيلهاا صبرر ااصبري وعيشي حياااتك
وااعتبري هذاا مصيرك وااانسي شي ااسمه طلاق
ويااشين المراءه لاقااامت بالراايحه والجااايه تقول ((طلقني )) ااركدي والله يهديك

 

[ندوش2010]

اشكر جميع من مر على موضوعي وابدأرأيه ونصيحته
انا استخرت ورجعت له وانا أرد عليكم من شقتي الله يجزاكم الجنه فعلاً انكم خوات وهمتكم مصلحتي
اطلب الله العلي الحفيظ في الثلث الأخير من الليل الأن
ان يحفظكم من كل مكروه وان يفرج همي وهمكم وان يسخرلكم ازواجكم وان يرزقكم الذريه الصالحه وان يرزقكم برهم
وان يرزقكم الله من حيث لاتحتسبون وان يفرح قلوبكم بأجابة دعوتكم وتقبل صالح اعمالكم