انا بتحطم او بنهاروالله يرحمني برحمته...

[إنسانة مكسورة]

السلام عليكم ورحمة الله وبركاته


تكفون..يمكن الاقي عندكم الحل,, نفسيتي في الحضيض ...دمــــــــــار معنوي.. قاتل


مدري كيف انام وكيف آكل وكيف اتكلم.. صرت خلاص قريبة من الانهيار..بس لولا الصلاة كان صار فيني شي

والسبب اني حبيت.. انسان وهو حبني لدرجة
ماتتصور
درسنا سوا وتهاوشنا وزعلنا وبكينا وضحكنا

وكل شي..

انسان مستحيل ييتكرر في الوجود مافي مثلة



كان معي في كل تفاصيل حياتي وادقها... وانا بعد
يخاف علي واخاف علية حييييييل


احترمه ويحترمني كل شي بينا واضح

تعلقت فية..وعديته مثال,, يقتدى به وهو فعلآ قدوة في اخلاقة وذوقة وتعامله والتزامه المتزن البعيد عن التشدد

زاد كل ذلك من محبتي له,,, كبر في نظري اكثر,, ولانه في بيئة كلها مشايخ وقضاة ودعاة,,
بصراحة انا افتقد هذي البيئة واحب الصالحين واتمنى من ربي ان يقربني منهم..تطورت العلاقة الراقية واالحب فريد نقي



وعدني انه يتزوجني,,, ووعدته اني انتظرة,, وباقي انتظرة


مرت ايامنا مع بعض حلووووووووووة ونفس عالية,, وجميله اني كل يوم اقوم الاقيه موجود بحياتي



فجأة,,, ظهرت مشكله ان والده عرف بالسالفة ان يكلم وحدة الا هي انا ...

صار يراقب جواله

ولانه واثق فيه اعطاه الصلاحيه ومااجبره على شي

بعدها درت امه.. اتصلت علي هددتني وقالت لي كلام يوجع بس... سامحتها لانه امه


ومعذورة

فكرت ابعد بس ماقدرت حبي له كبييييييييييييييييييييييييييييييييييييير مره


حبي له عمر وفي احد ممكن يفرط بعمره



تحملت عشانه


بعدها صارو اهله يكلمونه ويأنبونه مره لانه يكلم بنت..

صبر صبر

بعدين قالي اسمعي بقولك وحاولي تتقنعي انا اهلي حاسبوني

وامي مايرضيها اكلمك زي ماترضى احد يكلم بنتها

الموقف صعب

قالت له ياتزوجها او تتركها

قال انا الحين مو مستعد باقي اكمل دراستي

وانتي عارفة

قالي خلاص كل شي قسمة ونصيب.. يوم قالها حسيت بغصة وتمنيت الموت ولا اسمعها

قلت له والحب وانا كيف اعيش بدونك

قال لازم من الالم بس لمصلحتك عشان مااكون حجر عثرة وان شاء الله تلاقين احسن مني

انا امي مو راضيه وبتركك عشان ربي ثم امي.. واسآسآ في عوائق واجدة بينا عشان نتزوج


بكيت عنده وترجيته.. قلت له حنا كنا نعين بعض على طاعة ربي.. والله عالم بنوايانا

حرام حكم القصاص من غير ذنب

صار كل يوم يقنعني ارضى ويصبرني

وانا عجزت اقاوم الامر مو هين علي ابد

لا اكل ولا اشرب احس بنهاية العالم.. الشي الوحيد الي يفرحني راااااااح وخلاني لحالي

كيف بس بعيش؟؟؟؟؟؟؟؟؟



تكفون ادعولي ان ربي يغير مافي نفسه هو واهله ويلين الصعاب بينا زي ماآلان ربي الحديد لدواد..سألتكم بالله تدعون لي يمكن احد وحدة منكن مستجابه الدعوة ويفرج ربي همي بدعوتها وتكسب اجر الدنيا والاخرة طلبتكم

ماعندي استعداد يخليني ماعندي..زتعودت على وجودة اتمنى افقد ذاكرتي ولا اعيش وش اسوي بس


خفففو عني وقولو لي وش الحل عشان يرجع

 

[إنسانة مكسورة]

تاريخ الميلا1401
مكان الميلاد ؟السعودية
الحاله " مخطوبه – مطلقه – عازبه " ؟عازبه
الدرجه العلميه ؟جامعيه

درجة الإلتزام بالدين ؟احمد الله
هل انتي مداومه على الصلاة في وقتها ؟ايه الحمد الله

المستوى المادي للأسره ؟مستور
الترتيب بين افراد الأسره ؟1
عدد الأخوه والأخوات ؟9
علاقة الوالدين ببعضهم ؟ الحمد الله
علاقة صاحبة المشكله ببقية الأسره ؟ممتازه
هل يوجد زوج ام و زوجة اب ؟لا
علاقتك مع زملاء المدرسه / العمل ؟ممتازه

هل تعاني من امراض عضويه او نفسيه ؟لا والحمد الله
الحاله النفسيـه حاليا ً عند كتابة الإستشاره دمــــــــــار نفسي قاتل

مدة المشكله منذ بدايتها حتى الآن ؟اسابيع
نقاط ضعفك طيبة وماعندي ثقة بنفسي
نقاط قــوتك ؟مجازفة وعنيدة ودقيقة



​

 

[المشـ صمت ـاعـر]

والله تعبت وانا اقرأ مشكلتك ......

الله يفرجها عليكِ الغاليه وتأكدي ان كل شي مكتوب عند رب العالمين

ومهما طلعنا ونزلنا وحبينا وعانينا وافترقنا كل شي مكتووووووووب

فديتك خفي ع نفسك شوي وادعي ربك واستغفريه واللي ربك كاتبه بيصير

وما تدرين يمكن اللي صار خيره لك والخيرة فيما اختاره الله ...

خلي إيمانك واملك بالله قوي .. ورددي دائماً الله يقدم اللي فيه الخير لي ...

وإلجأي لـ قراءة سورة البقره وربي فيها رااحه عجيييييبه عن تجربه ....

وهونيها وتهووون يالغاليه ..... والله حاسه فيك ............

 

[إنسانة مكسورة]

شكرآ ياصمت المشاعر فرحتنيي بردك بصراحة كنت ابغا اي احد يشاركني همي

جزاك الله خير...بس تكفين ادعي للأختك ان ربي يفرج همها ويجمعني فيه نفسيتي عيت تتقبل بعادة الله يعيني
والحمدلله على كل حــــــــال

 

[ليل الشتا]

حبيبتي ..

أريد منك أن تلتفتي لنفسك .. بدايتها صعبة أن تتركي من تعلقتي به ..

ولكن بالصبر والقوة والعزم ستسطيعي حتما..

إستغفري الله ففيه جلاء للهموم .. ولكن العجيب في الامر بأنه فضّل تركك ربما لأن اثقلوه باللوم لكونهم عائلة دعاه وأحس بأنه مختلف عنهم ..

للعلم قد يراجع نفسه بعد فترة أتركيه الآن يفكر .. وبإذن الله وبتوفيق الله وبالدعاء يغير الله من حال إلى حال ..

فقط ثقي برب الناس .. فهو اعلم بما ينفعك وكله خير لك ..

 

[المشـ صمت ـاعـر]

ليل الشتا كلامها عين الصوااااب

اتركيه وادعي ربك يكتب لك اللي فيه الخير واستغفري كثييييييير

والله قادر يغير حال بعد حال

وما تدرين وش ربي كاتبه لك ، تفائلي خير

الله يسعدك ويزيح همك وضيقك ويوفقك بكل خطوه

كلنا وله همومه ومشاكله ونحمد الله ع كل حال

>_<

 

[إنسانة مكسورة]

ليل الشتاء .. صعب حياتي اقولها لك بصراحة,, معاناه احس فيها نهاية حياتي

كيف تعلقت به عمر وفجأة .. فضل يتنازل عني معن كان يقول والله العظيم مااخليك ابدآ

فرحتيني يوم قلتي يمكن يراجع نفسه,,, يارب يارب ادعي معي تكفين طلبتك.. ومشكورة يالغالية

 

[إنسانة مكسورة]

مشكورة ياصمت,,, تكفين اذا سجدتي تذكريني بدعوة.. بسجودك وقولي يارب رد عليها غائبها كما رددت موسى لامه

ولك بالمثل

 

[ليل الشتا]

أرجوك ثم أرجوك .. أن لا تنتظريه ستتعبي كثيرا ..
وإنما أتركي الامر كما هو .. وأتركي لنفسك فرصة لتعيشي لنفسك أقولها من واقع ..

تقربي من الله ليس لأجل أن يعود وإنما لأجلك انتي ..

إن فعلتي الرسائل الخاصة أستطيع التواصل معك ..

أبحثي عن موضوع في قسم البنات عن موضوع نسيان الحبيب إلى الابد.. فيه كلام ومشاعر فياضة وقوة رائعة ..

أقرأي سورة الفتح .. والشرح والضحى وتيقني بأن الله رحيم بعبادة .. أكثري من الدعاء وسأدعوا الله لك بأن يفرج همك عاجلا غير آجلا

 

[إنسانة مكسورة]

ليل... الكلام سهل...لكن معاناتي غيرت ملامحي وجهي ........متأسفة على ضعفي

وياليت اتواصل معك على الخاص..وفعلآ انا اتقرب الى الله لاجل ان يعود..استغفرالله

مصابه باحباط واكتئاب عظيم الله المستعان

 

[المشـ صمت ـاعـر]

وانا بعد محتاجه دعم منكم خواتي >_<

ساكته والأرض ضايقه فيني ومشكلتي قريب من اختي إنسانه

بس الحمد لله صابره ولو ان دموعي تخونني احيانن ..

 

[ليل الشتا]

أخواتي الغاليات ..

بس ودي أسال كل وحده منكم أحداث اللي صار لكم كم لها من الوقت؟؟؟؟ يعني متى فارقتوهم ؟؟

أدري أن الكلام سهل لكن يعلم الله أني ما أقول كلام من فراغ .. هذه خلاصة تجارب .. متأكدة بعدها فترة بيمر الموضوع بردا وسلاما ..

أدري الذكريات متعبة جدا ..

وادري حبكم وتعلقكم فاق الحد ..
وأدري أنكم صادقات في مشاعركم..

وادري أن بالقرآن راح تتخطوا خطوة كبيرة بحياتكم .. وبتطمئن قلوبكم الطاهرة الطيبة ..

ولي عودة

 

[ليل الشتا]

فرج الله كربك صمت المشاعر ..
سبحان الله اليوم ناوية ادخل مشكلتك المعروضة هنا في القسم ..

لأني بالامس دخلت متأخرة ولم أستطع الرد لإنشغالي

 

[المشـ صمت ـاعـر]

التعلق والعاطفه اتعبوني حيل
وادري اني غلطانه والمفروض ما اتعلق بـ وهم لأن الحب وهم وهم
بس الله يسامح قلبي ويسامح اللي كان السبب ......

ليل الشتا من اسابيع بدأت المشكله
وافترقنا تقريباً هـ اليومين ......

ما ابي اتكلم ف العام لأسباب خاصه >_<

انسانه حبيبتي معذوووره يا قلبي

 

[وسوم ـه]

طيب بسالك سؤال وكوني صاادقه بااجابه مع نفسك


لو تقدم لك احد تتركي الخطيب عشانه ولا تنظريه










اعرف وش يدور براسك اكيد بتقولي عصفور باليد ولآ .....


أذن

مافي شي اسمه حب وتعلق

هاذي نزوه وخدعك معسول الكـلآم والاهتمأأم وكله بتلقيناها عند زوجك باذن الله

وياقلبي اكبر غلط تتقربين من ربناا عشان يرجع لك

وخلاص من عافك مو تعفيه

لا دوسيه

هو قدر يدوس الحب بسبب ضغوط من امه

وانتي خلاص صلحي علاقتك مع الله عز وجل

وتذكرررري دائما

من ترك شيئا لله عوضه الله خيرا منه

اسال الله العلي العظيم في علاه

ان يشرح صدرك لطاعته وينير طريقك للايمان

ويرزقك الزوج الصالح الدين عااجــلآ غير آجلآ يااارب العالمين

 

[جروح الروح]

حاسه فيج


كنت اموت واحيا بمن احببته بمراهقتي وعندما تركني تحت وطأة الظروف الكاذبه
التفت الى نفسي وجمعت جراحي ونسيته

صحيح الالم كان كبير بس عشت ونسيت وتزوجت وعيلت وصرت ام مثالية -- اهتم لابنائي واعيش حياتي
واضحك عندما اتذكر مراهقتي


لايصير اكبر همك ياقلبي -- محد يمنعه عنك الا تفكيره
اتركيه وعيشي احلى عيشه من غيره

 

[إنسانة مكسورة]

تقدم احد وماوافقت وعلمته اني انتظرة,,,

لاني احبه وماابغا غيره؟..اشوفه غير عن كل الرجال...خلاص وش اسوي,, تعلقت وغرقت

 

[رياح الود]

الزمي الدعاء ففيه راحة..
كيف يكون صالحا متدينا ثم يرتكب خطا بان يحادث فتاة..
تذكري دائما ان الانسان مسير وليس مخير فهذا يخفف عنكي قليلا..

 

[إنسانة مكسورة]

شكرآ رياح الود..

على النصيحىة

لكن الانسان مسير ومخير

فهو مسير نحو اقدار ربي وقضائه ولكنه...ايضآ مخير بين اختيار الصواب او الباطل

وهو ايضآ يمرض بخير اختياره ويموت بغير اختيارة..وامور يختارها تحت مشيئة الله والله اعلم

دعواتك لي

 

[Ms.RoZa]

لازلتي تحت تأثير الصفعه وحسب .. !

حبيبتي انتي .. قلتي بنفسك إنك تعودتي عليه .. اذا مايحدث معك الآن طبيعي .. وطبيعي جدآ
اصلا لو ماحصل معاك كذا .. صدقيني ساعتها بتكونين عديمة احساس ..

فراق اي شي تألفينه .. شخص قريب اومكان تحبينه او حيوان اليف ربيتيه بنفسك .. سيتسبب بالألم
لإنك افتقدتي شي كان جزء منك .. فكيف اذا كان الأمـر عاطفي ويمس القلب مباشره

يا اختي الحبيبه انتي الان في عـز الأزمه لإنه قريبه جدآ .. لكن ماحصل معك ليس بالشي العظيم
كل الناس تمر فيه لعلمك .. كــــــــــــل الناس .. !!

انتي خسرتي حبييبك وهي علاقه محرمه ع فكره حتى لو كنتو مجتمعين ع طاعة الله !!
لكن غيرك خسر زوجه وبيته واطفاله سوآ .. ويمر الوقت ويتعدل وضعــه ويعيش حياته
لإن الحياة ماتوقف على أحد مين من كان ..

ما ادري كم من الوقت قضيتيه معاه لكن اجزم انها مده طويله جدآ
وهذا ماتسبب لك بهالصدمه وخيبة الأمل

لكني اثق بإن كل هذه ستكون ذكرى لاتساوي شيء .. مهما بلغ حبك له ..

ساخبرك امرآ .. انتي حاليا تحتاجين ملئ الفرآغ الروحي الذي خلفه هذا الرجل من بعده
تحتاجين ملئه بشيء موثوق مضمون لاينكرك بعد ذالك ولايتخلى عنك ابدآ ..

عزيزتي علآقتك بربك ليست كما يجب وإلا لما قلتي ان هذا الرجال هو الشي الوحيد الذي يسعدك بالحياة
ولـ آمنتي بإن ماحصل معاك ماهو الا قضاء وقدر ..
ولـ آيقنتي بإن كل غير الله .. فــــــــــآن .. وليس مضمون

فقط تذكري هذا وارتاحي ..
ثم ان هذا الرجل تخلى عنك وخذلك ..
بالرغم من وعوده إلا انه اخرج وجهه الآخر عندما مل من العلآقه
اعلم عدم تقبلك لكلامي .. لكن ماجبت غير الواقع والي صعب كثير اجاملك فيه .. !
بس تصرف الرجال ماله ااااااااي تفسير اخر ممكن يقنع

المهم هو ان تتذكري خذلانه لك .. وموقفه السلبي معك ..
وإن كان من مواقف سلبيه اخرى تذكريها جيدا .. وانسى غير ذالك

نعم ثبتيها بذاكرتك كلما اتاك الحنين إليه ..
ستكون كما الإجابه على اشتياقك .. اذا امرتك نفسك بالحنين والعوده .. قولي لها لكنه خذلني وتخلى عني وفعل بي كذا وكذا .. !
وإن كنتي تقدرين نفسك حق قدرها وتخافين ربك في نفسك .. ستردعين عنه

حبيبتي اني اعلم تمام العلم ان الامر ليس بسهل واحس بكل حسراتك والامك ومقدره موقفك ..
لذالك ثقي بكلامي وما اخبرتك به فإنا لم اذكر لك الا خلاصة تجارب وقصص ..

الحل /

- املئي فراغك الروحي بحب القرآن وصلاة اخر الليل والبكااااااااء والشكوى لربك بكل شي .. كل شي .. سيفرح ربك بك وسيلطف بحالك ويقربك له .. وما أجمل من قرب ربك ياحبيبتي ؟ ستنسين بعده قرب الدنيا ومن فيها

- أمسكي المسبحه واجعليها لاتفارق يدك استغفري الله باليوم ما استطعتي ولا يتوقف لسانك عن الذكر والتسبيح والحوقله وترديد (لاإله الا انت سبحااانك اني كنت من الظالمين) ..

تدرين ليش تسوين كذا ؟
لإن الله قال بالحرف الواحد { وماكان الله بمعذبهم وهم يستغفرون } ..

الله يطمن قلبك بالإيمان وطاعة الرحمن