المصروووف

[رافعة حاجبها]

السلام عليكم
كيفكم بنات
ابغى اكتب موضوعي من دون مقدمات
انا زوجي حالته الماديه تمام الحمد لله
عندنا عماره ساكنين فيها
ومأجر اربع شقق وموظف
ومايقصر ع البيت
بس المصرووف منكد عيشتي
كان يعطيني 300ريال مصروف لي انا من جوال ولبس وكل شي تشتهيه نفسي من ذا الكنز
قلت بقترح شي لعله في مصلحه لي وليتني ما اقترحته
كان شوي مضغوط وحتى صار يقصر ع البيت شوي قلت اعطيني 1500الف وخمس ميه
لي وللبيت بالشهر من اكل وشرب وملابس وكل شي <<<<جت تكحلها عمتها
وبالفعل ماقال لأ
بس الحين وضعه تعدل وابي اتراجع عن هالقرات مدري كيف لاني دخلت بجمعيه ب250واستلمتها وباقي ما خلصت يعني لو بتراجع ونرجع ع 300مايبقالي الا50ماتكفي رصيد بالشهر
والحين الكل يعرف سالفة الراتبين
قلت له تعطيني منها قال طيب بعطيك 500?
انصدمت
قلت له بدلع لا 1000
وقعد يضحك
والحين طلع لي بمشروع يقول بيفك مطعم ومطبخ
من الراتبين وبيزود عليها شوي
المهم الحين بيجيه فلوس ومبلغ محترم
قلت فرجت اتنعنعش شوي ونسوي تغييرات بالبيت
او ع الاقل اشتري ملابس جديده
ولا هو يقول لا ما بعطيكي منها بتحرك فيها شوي بالعقارات
واذا جاني بيعات اعطيك نسبه وانتي بكيفك
الزبده انه يحبني ويموووت فيني متأكده من هالشي
بس عند الفلوس مافي حبيب
اذا نزلنا السوق يكرهني عيشتي
وصرت ما انزل السوق عشانه يطفشني
اخلصي
هذا ماله داعي هذا ماتحتاجينه هذا غالي ووووو?
هو حريص زياده عن اللزوم حتى اقاربه يقولون عنه بخيل
وفي شغله عند اهله يحب يبين لهم انه قوي وانه رجال ومدري كيف وحتى احيانا يهينني قدامهم وانقهر ويقلل من قيمتي ويتكلم اني مقصره فيه وكذا ?

الحل
الله يسعدكم ساعدوني
انا عصبيه اتنرفز بسرعه احياناً
اتكلم بطريقه تقهرني ?
ماودي اكون كذا
ودي اكون هاديه واناقش بعقلانيه
ما افي امل انقهر من نفسي ?

 

[مشااعل]

شوفي نمطه راح يساعدك كيف تطلبين منه
ومن ناحية الاهل لاتموني وتتكلمي معهم كثي عشان يحترمك قدامهم

 

[همســـة حــب]

وعليكم السلام ورحمة الله وبركاته

بصراحة رجعت أقرى موضوعك أكثر من مرة أتأكد من المبلغ اللي كتبتيه

300!

وش تسوي بهالزمن وبهالغلا

بصراحة والله إنك مدلعة رجالك لأبعد حد

الحين اللي ع قد حالهم ما اتوقع احد منهم مصروفها أقل من ثلاث مية

موب اللي ربي منعم عليه ماشاء الله إجارات وحالة ممتازة

أنا مدري كيف رضيتي فيها من البداية لكن خلاص اللي صار صار

شوفي مصاريف البيت قولي لزوجك خلاص أنا ما أقدر عليها أحسها أشغلتني عن نفسي وكشختي

وهالشغلة للرجال مو للحريم ومدحي فيه شوي إنه يعرف أكثر منك بمقاضي البيت وكذا

يعني وصلي له فكرة إن ميولي للكشخة والدلع مو لمقاضي وخرابيط

وبالنسبة للمصروف كلميه إن الدنيا غالية والثلاث ما تجيب بلوزة وحدة مو مصروف شهر

وش اللي ما تحبي تتسوقين معه خليه ينزل معك للسوق ويحاسب خليه يشوف الغلا كيف

وديه لاسواق غالية واخذي ارخص الموجود خليه يشوف بعينه عشان يقتنع

واذا رفض يزيد المصروف خلاص قوليله ما ابي مصروف بس كل شي أطلبه تجيبه

خلك حازمة وانتي تطلبين وضحي إنك جادة والدعوة مو دلع وفسقة

انا لو مكانك ما رضيت بأقل من الف

وسالفة الراتبين مو وقتها الحين

يعني عندك خيارين تفتحين موضوع المصروف والا الراتبين لا تنقلبين فجأة عليه ثم ما تحصلين شي

ممكن تفتحين موضوع الراتبين" وتأجلين سالفة المصروف لبعد فترة"وإن البيت ناقصة أشياء وهذي فرصة تشترون الناقص

وإن البركة بتحضر بفلوسه اذا هو بدى بأهله وفرحهم ووريه الخرابات اللي بالبيت والأثاث لأنه حريص ع الفلوس لازم يشوف ويقتنع

بصراحة اختي اسمحي لي والله جتني ضحكة يوم قريت إنك طلبتي من زوجك الف من الراتبين

ع بالك مسوية إنجاز!

كان قلتي واحد من الراتبين لي وللأولاد مو الف ما راح يحصل لك بس تكون شرهتك كبيرة عشان لو فكر يعطيك خمس مية بس من الراتبين يستحقر نفسه

الرجال لازم تعطينه الموت عشان يرضى بالحمى هو شافك يرضيك القليل ومبسوط ع هالوضع


اما بالنسبة لسالفة إنه يطقطق عليك عند أهله عندي إحساس إنه يحبك مثل ما قلتي ويستانس ع شكلك وأنتي متنرفزة لا أكثر ولا اقل

لكن هذا ما يمنع انك تكلمينه بعدين اذا رجعتو البيت وباسلوب ان الوضع مضايقك وما ترضين بالإهانة

واذا كنت مقصرة بلغني لحالي وانا اعدل الوضع اما تروح تفضحنا عند الناس ما ارضاها ابد

 

[نور1406]

عزيزتي الزوج يعصب اذا طلبت فلوس عشان تزعلين ولا تطالبين مره ثانيه يعني يسويها عمدا بس انت لا تتنازلين لازم تعودينه واذا لاحظ انك مصره حتى لو ظليتي فتره طويله اهو بيتنازل يعني اللي بيكسب هو اللي نفسه طويييل