الغزل والدلال بين الزوجين له ايجابيات ....ولكن هل له سلبيات؟؟؟!

[الدمعة الحنون]

السلام عليكم
قبل ما نبتدي في الموضوع
حبيت أنقل لكم هالقصةالجميلة القصيرة
اليكم هذا الحوار
(( أحمد وعبير طيور الحب صار لهم متزوجين يومين فقط بعد خطوبة استمرت سنة ونص ))
عبير بثاني يوم الصباحية في المطبخ تسوي الفطور
أحمد : عبوره وشمدخلنش المطبخ ياعمري انتين عروووس تعالي تعالي بس ( ويمسكها من ايدها )
عبير : حمود حبيبي بسرعه روح الصالة لاتبهدلني ويطيح علي الغوري يحرقني
أحمد : ( يضحك ) من صدقش انتين الحين بتسوي فطور
( أحمد والله خايف من هالفطور ما اطلع من الحمام اليوم ويضحك من داخله )
عبير : ( تبتسم ) بلا بياخه ترى تعلمت الطبخ لعيونك والحين ماتبغاني اطبخ
أحمد : ياروحي ياعبوره اكيد بيكون احلى فطور ذفته في حياتي من هاالأيادي ( ياخذ ايدها ويبوسها )
عبير : ( نزلت راسها مستحيه ) خلاااص يلا روح ما بطول الحين باجي طوالي
أحمد : ( يضحك ) انزين انزين صرتي طماطية ههههههههههه
عبير : ( تدف احمد برا المطبخ واهي تضحك وتقفل الباب )
بعد مرور 6 شهور
عبير : ( صحت من النوم وراحت لأحمد ) حمود قوم وديني المستشفى
أحمد : ( يقوم مختلع من النوم ) هااا وشفيش حبيبتي
عبير : مادري راسي يعورني وحاسه بدوخه تعبانه وايد
أحمد : يؤؤؤؤ قومي قومي البسي عباتش بسرعه
( بعد مافحصت الدكتورة عبير وطلعت نتيجة التحليل )
الدكتورة : مبروك يا أحمد بيه المدام حامل
أحمد : هااا دقيقه باروح ارشح وجهي بالماي وباجي
عبير : ( تضحك ) تعال وشفيك تقولك اني حامل
أحمد : ادري بس مو مصدق عفر حليو هالشعور وفرحان حدي دقيقه بتصل على أمي واختي وأمش باقول ليهم
عبير : ( تضحك على أحمد ) حبيبي استنى نروح مع بعض ليهم وقول انت اني ماباقول ترى استحي
أحمد : ولايهمش ياغناتي باحط الخبر في جريدة المبوبة لعيونش هههههههههههه
عبير : ( ماتت ضحك )
بعد مرور 9 شهور
(وااااا واااااا واااااا !!! كووولوووويييش... عبير ولدت وجابت علي )
بعد مرور شهرين
أحمد : ( صحى من النوم بيروح الدوام ) حبيبتي وين الفطور يلا بسرعه تأخرت
عبير : أحمد ماتشوفني ويا علاوي احاول انومه مو راضي ينام وانت تقول فطور والله انك فاضي
أحمد : جيبيه هالكسلان انا بانومه وانتين قومي سوي الفطور ( تعال تعال بابا وشفيك متعب الماما ماتخليها تنام )
عبير : ( معصبه ) أحمد ويش فيك ليش ترفعه من المنام الحين تطير نومته اوووف هاته هاته
أحمد : ( يطالع في عبير واهو مستغرب ) يلا حبيبتي فمان الله انا رايح الدوام
عبير : انزين سكر الباب شوي شوي عشان ماتخلع علاوي
أحمد : ( يتنهد ) انشاء الله .. باي
( أحمد يسولف مع صديقه محسن في الدوام )
محسن : ويش فيك شكلك متضايق
أحمد : مادري بس عبير صار اهتمامها كل في علاوي ومهملتني
محسن : لا ياخوك عشان ولدكم بعدوه صغير واول العنقود اكيد مخترشه فيه اذا كبر بتغير الوضع
أحمد مختلع ) هااا اذا كبر !!! كم يعني اذا راح المدرسة
محسن : ( يضحك ) لا لا يعني لما يصير عمره سنة تقريبا
أحمد : ( يتنهد ) الله كريم
( رجع احمد من الدوام ودخل البيت )
( أحمد اتجه للغرفه وشاف عبير نايمه مع علاوي )
أحمد : ( عبير تغيرت ماصارت تستقبلني عند الباب مثل قبل ولا صارت تدلعني <<< يتنهد )
( أحمد متضايق لأن عبير ماصارت تهتم فيه وصار اهتمامها كل مع علي الصغير ومرت الأيام والسنين صار عند أحمد (زينب و جواد )

<<<< يؤ يؤ مو كأنهم أسامي أولادي المهم ماعلينا نكمل

أحمد فكر وفكر وتعب من التفكير وقال بما انه مقتدر جاب لعبير شغالة عشان تساعدها في شغل البيت والأولاد وتهتم فيه وللأسف هاذي عبير على حالها .. أحمد يبحث عن عبير الأولى والى الآن لم يجدها
أين عبير الدلوعه التي كانت مليئة بالمرح والدلال والغنج ؟؟؟ أين عبير القديمة ؟؟
أحمد الى الآن لم يجد اجابة بهذه الأسئلة
مارأيكم اتوقع ان أحمد المفروض يكلم عبير ويتفاهم وياها انها تغيرت وانه متضايق من هذا التغير ؟؟؟
ويش رايكم عبير عودت أحمد على روتين معين انها تهتم فيه وتدلعه وبعدين تغيرت عليه !!!
هل نقول بأن الغزل والتدليل له سلبيات في مثل حالة احمد وعبير لأن عبير عودت احمد على روتين معين وبعد ذلك تغير كل شي ...
موضوع ومشكلة ومشاركتكم وآرائكم هي الحكم
انتظركم
تحيااااتي ..
​

 

[غيمة فوشية]

انا اشوف الدلال الزايد مالة داعي للزوج عشان مايتعود بعدين يحس بالفرق ولكن الزوجة لازم تحاول تعطي كل واحد حقة بسسسسسسسسسسس لاتنسى نفسها في الزحمة

 

[الدمعة الحنون]

حلو الكلام يا غيمة فوشيا...وين باقي البلقسيات انتظر تفاعلكم

 

[ملكة دلوعة]

انا اشوف ان تدليع الزوج سلاح في يد المراة لازم ما تتخلى عنه مهما انجبت من اطفال علشان تستخدمه وقت اللزوم بس طبعا يكون في حدود واهم شي ما تتخلى عن اهتمامها بنفسها لانه مصدر ثقتها بفسها وانا اشوف ان الدنيا اخذ وعطا يعني زي ما تبغينه يدلعكي انت لازم تدلعينه بس في حدود حتى لايشعر بالحرمان من تدليعك له وفي نفس الوقت ما تخلينه هو شغلك الشاغل لان بعض الحريم تفهم ان تدليع الزوج يكون اربع وعشرين ساعة وهذا غلط والله اعلم

 

[التوفي الدلوعه]

سلام كيفكم انا توني قريت الموضوع واحب اقول احلى شي تسويه المراءه اهتمامه بزوجها لانه بيحس ان مالك الدنيا وما فيها بس المصيبه انها تتغير عليه يعني راح تقدر تنضم وضعها برعاية اطفالها ووقت لزوجها يعني تعود الاطفال على شي يريحها ويريح زوجا ومشكورين

 

[بنوتة.]

الزوج محتاج الاهتمام اكثر بس لا تكثرين علشان لايشوف نفسة يعني خير الامور الوسط

 

[الدمعة الحنون]

والله يا بنات ان احب المراءه نفسها سوف تجد نفسها تعطي زوجها وكل اللي حولها دون حساب