جبت لك افكار بس طبعا كلهن نقلتهن لك عشان تستفيدين منهن..
000تلقيت دعوة لأكون ام زائرة في روضة بنتي يوم الأربعاءوفكرت وش اسوي 000 طبعا كانت وحدتهم الإسبوع هذا وحدة صحتي وسلامتي والإسبوع اللي قبل وحدة الرمل 00فسويت لهم برنامج يشمل الوحدتين وبدأت بوحدة الرمل 000
سويت لهم عمل فني بالرمل عباره عن بلونه واعبيها بالرمل وازينها حتى تصير مثل الدمية
وهذي صورتها
وعملت لكل طفله وحده حبيت افرحهم بها لأن البنيات يحبون الدمى 000وهذي صوره جماعية للكل
اول ما دخلت عليهم سلمت عليهم وعرفتهم بنفسي وتعرفت عليهم وحده وحده وقلت لهم عشانهم اخذوا وحدة الرمل اني سويت لهم عمل فني بالرمل 00
طبعا اخذت اغراض العمل هذا وسويته عندهم تطبيق عملي حتى يعرفون وشلون سويته 00
واعطيتها بنتي خليتها تسلمها لمعلمتها قلت هذي ذكرى من بنتي للفصل
بعدها قصيت عليهم 00قصة عن النظافة وانها طريق للسلامة طبعا بأسلوب مبسط وبكتاب مصور 00وتفاعلو معي البنات بشكل ماتتصورونه 000حتى ان معلمتهم جلست تسكت فيهم حتى اقدر اكمل القصة 00
وهذي القصة اللي قصيتها عليهم 00
بعد القصة طلبت منهم انهم يغسلون يدينهم لأننا حنسوي طبق صغير على قدهم 000 فطلعوا على مجموعه مجموعه وغسلوا ورجعوا
ولو تلاحظون انا سويت ترتيب البرنامج كذا عن قصد لأننا بعد القصة اللي كانت تحكي عن طفل مهمل وعنيد وغير نظيف وعاقبة اهماله ووساخته وانه صار مريض وضعيف 00
فبعد القصة قلت لهم اننا بنسوي اكل الحين بس قبل الأكل وش نعمل فهم استنتجوا لي بعض الإستنتاجات من بينها اننا نغسل ايدينا 00
بعد ما اكتملوا 00 فرشت لهم سفره ووزعت عليهم خبز توست مقطعته بالكأس00 وجزر شرائح00وخيار مكعبات 00وزيتون شرائح 00ولبنه 00 وملاعق لدهن الخبز باللبنة 00 واعواد اسنان حتى يشيلوا الجزر والخيار والزيتون 00
وطبعا خليت المعلمات يشتركوا معنا 00 حتى يحسوا بالألفة
وهذي بعض صور الطبق الصغير 00هذي اللي سويتها انا اول
وهذي بعض اعمال البنات 00
وهذي صورة جماعية للبنات مع عملهم 000
بعد ما اكلنا كلنا 000طلعوا يغسلون 000 بعدها لعبنا لعبة الإكتشافات باللمس 00 بس ماصورتها للأسف
وطريقتها 000
جبت كيس غير شفاف وجمعت فيه اغراض بسيطه من البيت 00امشي واحط في هالكيس 00
وكل بنت تدخل يدها في الكيس من غير ماتشوف وتمسك لها غرض وتعرف وش ذا الغرض من خلال اللمس وتقول اسمه بعدين تطلعه ونشوف صح عليها ولا لأ 00اذا صح تمسكه معها 00واذا غلط تتركه في الكيس 00
ونشوف اكثر وحده جمعت اغراض 00بس البنات ماشاء الله كثيرات 00فخليتهم يكتشفون على مره وحده بس
بعد اللعبة وزعت عليهم الهدايا 00طبعا خليت بنتي هي اللي توزع على صديقاتها 00
والهدايا كانت عبارة عن التلوين بالرمل 00 وادوات الطبيب 00 حتى اربطها باللي اعطيتهم وعشان وحدتهم الرمل 00والصحة والسلامة
طبعا ماصورت الهدايا بعد لأن كل وحده لها ذوقها الخاص ولو تكون الهدايا مرتبطة بوحدتهم يكون احسن 00وهذ رأأي الشخصي وكل وحده واختيارها وذوقها
بعدين صورتهم وسلمت عليهم وطلعت
ملاحظة 00 طبعا بنتي هي اللي تشيل وتحط معي ونشيطه لأخر حد وهذا يعطيها ثقه اكبر في نفسها 000لما كنت اقص عليهم القصة كنت اسألهم بعض الأسئلة 00مثلا هل انتم تطيعون والديكم 00 تهتمون بنظافتكم 00واقولهم ان بنتي ماشاء الله عليها تسمع كلامي وتطيعني وتحب النظافة 00ومن هالكلام
عاد لو شوفتوها بعد ذا الكلام كانت جالسه عادي ولما سمعتني اتكلم عنها ارتكزت ولا احد قدها 00 وهذا يعزز الجوانب الإجابية عندها 000 فلا تهملون هالنقطة
*****************************
فكره أخرة
الخطه كانت كالتالي
انا جيتهم كان عندهم وحدة العائله وجلست اقص عليهم قصة عن العائله قعدت أألف عليهم وكنت احرص اني ابين لهم ترابط الاسره ومع الجد والجده وكنت جايبه معي اللاب توب وعرضت عليهم انشودة ماما وبابا حبوني وانشودة جدي جدي وجدتي وانشودة بنيتي فيديو كليب واناشيد حباب وقطاري ,وانشودة الحروف هذي اخليها لهم فواصل وانا احضر الالعاب والاشياء اللي جايبتها عشان اشغلهم ولايحوسون علي وترا هذي نقطه مهمه
وكانت بنتي تعرف للكمبيوتر فخليتها هي اللي تعرض لهم الاناشيد والكلبات اثناء شغلي وكنت حاطتها لها بمجلد لوحده
بعدها سويت انا وياهم بيتزا سهله وبسيطه وفيها حركه
او ل شي حضرتها موادها الاوليه بالبيت و تحضيرها ماياخذ وقت
اخذت كيس توست وقطعت اطرافه بحيث انه كان بشكل دائري كل وحده دائره لوحدها
بعدين جبت زيتون اسود وفلفل بارد احمر قطعته على شكل قوس وفلفل اصفر على شكل مثلث وجبنة بيتزا وجبت مغلفات كتشب حلواني اللي تجي مع الوجبات المهم خليته يدهنون الدائرة بالكتشب بملاعق بلاستيك بعدين حطوا الزيتون على شكل عيون والفلفل الاصفر المثلث انف والقوس فم وجبنة البيتزا حطوها شعر طبعا كنت موزعه عليهم قبل صحون بلاستيك وملاعق يشتغلون بها
وكل وحده معطتها منديل معقم تمسح به يديها قبل لاتشتغل
ويوم خلصوا وزعت لهم عصير وخليتهم ياكلون اللي سووه بصراحه انبسطو كثير
وكنت اطبق معهم خطوة خطوه ولا اطلع من الخطوة حتى اتأكد انهم خلصوها
بعدها لما خلصنا طلبت منهم ينظفون الطاوله ويمسحون ايديهم
بعدين دخلنا بفترة اللعب جبت معي مسدسين ماء اللي تعبينها وعبيتها
بعدين ولعت شمعتين وخليتهم يطلعون ثنتين ثنتين يطفون الشمعه بالماء
واستانسوا عليها وكنت كل وحده اعطيها مهله 10ثواني عشان مايروح الوقت
بعدها كنت جايبه معي اله البوب كورن(الفشار )صغيرة تلقينها عند ساكو وجايبه معي اكوابها وصلحت الفشار قدامهم وانبسطوا ووزعت عليهم
بعدها قعدت انشد لهم اناشيد قديمه حافظتها وانا صغيره وصايره جديده عليهم اول مرة يسمعونها حتى المعلمات طلبوا مني اني اكتبها لهم
وكنت جايبه معي عجينة الداز عشان نصلح بها تحف او حصالات بس ما اسعفنا الوقت طلعوا مبكرين لان كان عندهم حفل انهاء المنهج
ووزعت عليهم الهدايا وكان من ضمن الهدايا شريط تعليم القران للمرحلة الابتدائية
وبس حبيت افيدكم
زي ما استفدت منكم
اختكم
(الرزان)
