كيفكم يا بنات.. ادري طولت عليكم وزي مانتوا شايفين الموضوع اغلق لكثرة الردود الله يديكم العافيه وانا هنا ان شاء الله ببداء معاكم صفحه جديده اتمنى تساعدوني فيها زي عادتكم .. وقبل كل شي الحمدلله اللي سخركم لي وخلاني استفيد من آرائكم وانا اليوم محتاجتلكم اكثر من أي يوم مضى .. اليوم جاتني مصيبه وحطت على راسي كأنه ناقصني وجع قلب .. حتى اخويا اللي بالرياض اللي كنت متأمله فيه خير بداء يقلب علي
كلمته امس على موضوع التقرير الطبي وقالي من جدك انتي اقول العني الشيطان .. وانا اصريت ووضحتله قصدي من فكرة التقرير قالي فكي عنك الهيافه اول ما تطلبي تقرير بيفتحوا فيها تحقيق وتكبر الهرجه والا ما ينجر فيها .. رميتها كذا قلت خليه ينجر فيها انا ما تبليت عليه .. قالي انتي من عيلة امك لعيلة ابوكي قلبي لا تحزن لازم تحطي بصمتك وتسوي فضيحه في كل عيله قومي حطي راسك ونامي شكلك مواصله من امس وبدأتي تهلوسي ققهرني وسكت ..
واليوم المغرب قابل زوجي اتفق معاه انه يقابله من الصبح بس ما اعطاني خبر الا لما رجع .. وطلعلي بقرارات ماعرف كيف عقله طاوعه فيها .. انا كنت عند جارتنا من بعد العشا دق علي وقالي متى راجعه قلت كمان شويتين قالي طيب حاولي تعجلي انا جاني النوم وماني نايم الا لما اتكلم معاكي في كم شغله وحاب احط معاكي النقاط عالحروف .. قلبي انشغل ورجعت البيت على طوول .. ودخلت غرفته وجهه جامد بس يحاول يسوي نفسه طبيعي .. وجلس يفتحلي مقدمات مالها اول من آخر وعلى ايش انتي ناويه قلت مدري قالي يعني ايش ماتدري قلت مدري باخذ فتره افكر فيها .. قالي دحين تعطيني كلمه وحده حابه ترجعيله ولا لاء .. قلت اذا رجعتله ايش يضمني انه ماراح يعيدها .. قالي انتي احترمي نفسك وانا اضمنلك انه ما راح يعيدها ! .. قلتله نعم ! ايش يعني احترم نفسي قال هاذي فكري فيها بينك وبين نفسك .. والله عيوني من حالها غرغرت وقلتله طيب على امرك وجيت اطلع من الغرفه .. قالي فين رايحه قلتله رايحه افكر زي ما اقترحت .. قالي انا ماخلصت كلامي معاكي تعالي هنا .. وجلست جنبه مالي نفس اطالع فيه .. وبداء يخفف من صوته ويتمالك اعصابه بعدها فتح معايا مواضيع قووويه ماقدرت احط عيني بعينه ماني عارفه كيف ارد .. اول شي قالي ان الرجال يطلب الزواج اول شي عشان الجنس وانه اذا اخذ من شريكته اللي يبغاه بعدها يفكر يا انها تستحق انه يعطيها ولا لاء هذا بقدر ما هي تعطيه .. وانا مع كلامي من زوجك اقولك هي على بلاطه زوجك غبي وانتي اغبى منه .. واليوم لو ما انه حلفني اسمعه وما ازعل ما كان بقيت فيه عظمه سليمه .. ومن دحين اقولك اذا رجعتيله اعتبري نفسك تتعاملي مع جدار ولا تتوديله بأي طريقه هذا طلبه .. والله اتفاجأت ماعرفت ايش اقول قلتله ماني عارفه ايش تقصد يعني انا ماني مريحته ؟ انا مالي شغله الا اني اقربه مني والبس واجدد في حياتنا وبحاول ارضيه بكل الطرق وهو اللي يتحجج .. قالي هاذي ارادته بكيفه هو اذا يبغى الشي يطلبه انحرجت وسكت مالي وجه ادخل اخويا بكذا موضوع بس انصدمت ايش اللي زوجي رايح يفتح معاه موضوع عشان يطلب منه هذا الطلب مررره مالها داعي ..
وقالي على كم موقف زوجي حكاه عليها ومتضايق منها مدري كيف اتجرأ وقالها كيف ما استحى من اخويا انه يشكك فيا وكيف اخويا ساكتله .. مواقف كثيــره منها الشي اللي اعرفه واتخيلت اننا اتجاوزناه ومنها اشياء صعقت لما سمعتها ما كأنها تخصني .. مواقف كثيره ومنها الموقف اللي ذكرته يوم ماضربني ولما قالي انا زي الحمار تقوليلي دلعيني وادلعك .. ويقول لأخويا كل ما سمعت عنه خبر الاقيها لبست واتشيكت وتحاول تسوي جو بالبيت عشان بينها وبين نفسها تقنع نفسها انها مبسووطه معي ؟! اتخيلوا بس انا اتجننت وقلتله بدل ما يسويلي فيها نبيه وما تفوته فايته خليه يحلل نفسيته بالأول .. وذكرلي كم موقف بس واحد منهم من جد صعقني ماعمره فتحه معايا لا بالقصد ولا بالغلط .. وقت زواج ولد خالتي امي كلمت زوجي وقالتله نستناك لا تتأخر واكيد وصلتلكم الكروت وانا والله زعلت من ماما وقلتلها لا عاد تكلميه في موضوعه وقالتلي طول مانتي مكبره الموضع بيكبر في باله .. اعتبريه زواج زي أي زواج عادي عشان يشوفك ماهتميتي ويتخطاه .. وهو قدامها قلها ابشري ياعمه ومبروك عليكم ومن هذا الكلام ومن يوم ما ركبنا السياره قالي ان شاء الله مفكره انك حتروحي الزواج قلتله مافكرت بشي اصلا نسيت انه فيه زواج قالي لا بالله .. سكت ورجع قالي ليش ما وريتيني الكرت قلتله اصلا ماجبته معايا البيت ورميته عند اهلي .. قالي مالك حق ترميه هاذي عزيمه بإسمي وانا الوحيد اللي اقرر اذا كان الكرت له قيمه ولا ينكب بالزباله .. قلتله انا حبيت اشيل خاطرك مدري انك بتزعل بس اذا لك نفس تروح روح عادي العزيمه مفتوحه .. قالي دحين جايه تقنعيني انك رميتي الكرت عشان خاطري ولا عشان قلبك انحرق انه بيتزوج ؟ زعلت وعصبت تعصيب مو صاحي وحلفتله انه ماهمني ولا فكرت فيه بس كنت عارفه انه حيعصب لما يسمع سيرته وقلت اقصر الشر ورجع قلب الموضوع على ماما .. وقالي ايش قصدها تحرجني قدام الكل وتاخذ مني وعد من ورا قلبي .. هذا الموضوع كان بعد ولادتي بكم اسبوع .. وقبل الزواج بكم يوم انا خلصت الأربعين جا قالي عندي دوره في الشرقيه وقال لأمي وقت ما اخذني انه مشتاق لي وقالها اذا مافيها كلفه عليكم بنخلي الصغيره عندكم كم يوم بس نرجع من الدوره .. ولما رحنا الشرقيه طول الوقت معي بالفندق لا راح ولاجا وفي الليل نطلع نتمشى واقوله ماعندك دوره ودوام قالي الشباب مغطين عني وفجأه قالي ايش رايك نكسبها ونسافر دبي قريبه من هنا وافقته على طوول .. بعدين استغربت وسألته ليش جبت الجوازات قالي كنت مسويها مفاجئه عشان خلصتي الأربعين وفعلا رحنا وانبسطنا 5 ايام ولا اروع .. الفتره هذيك كلها اللي في الشرقيه ماصار بيننا شي انا ماحسيته مشتهيني واستحيت اني اضغط عليه ولما كنا بدبي فجأه طول اليوم وهو يلملحلي ان الليله ليله ثانيه ومتى نرجع الفندق ومتى نهبب .. وكانت اول مره لي معاه بعد الولاده وتعرفوا مع الألم والخياطه والله ماقدرت اكمل ووقتها ما افتكر انه صار شي بالعكس هداني وسلم على راسي وهو اللي قال الشغله يبغالها صبر وبالتدريج هذا اللي افتكره .. اتخيلوا بعد كل هاذي السنين يقول انا سفرتها يوم زواجه على دبي عشان تنساه ولا تنحرج ولا انحرج من حضور زواجه ولما جيت اقرب منها بالليل صارت تصرخ وتبكي وتقولي معليش بعد عني ماني قادره ؟؟!!
بنات والله احس راسي شيب معقول هذا تفكيره والله والله هو اللي قام من نفسه وجلس يكلمني وفهمته انه الم الخياطه .. طيب لو فعلا هذا تفكيره ليش ما قالي عاللي بنفسه مع انه ما شاء الله عليه مو ناقصه لا لسان ولا وقاحه قايلي كلام اكبر من هذا بمية مره
بنات والله احس راسي شيب معقول هذا تفكيره والله والله هو اللي قام من نفسه وجلس يكلمني وفهمته انه الم الخياطه .. طيب لو فعلا هذا تفكيره ليش ما قالي عاللي بنفسه مع انه ما شاء الله عليه مو ناقصه لا لسان ولا وقاحه قايلي كلام اكبر من هذا بمية مره
ياناس اتخيلوا اني اسمع كل هذا الكلام من اخويا والله اتمنيت الأرض تنشق وتبلعني .. وقالي ان زوجي متضايق من ولد خالتي وكل مره يستفزه بنظراته وانه صار يخاف على بنتي منه .. وكيف انه يبوس بنتي ويتحداه ومواقف كثيره واني دايما ادافع عنه ولما يجيب سيرته اغير الموضوع عشان ما اتحمل اني اغلط عليه .. واخويا اول مافتح معاه موضوع المسج زوجي صرفها قال ما قصدت بالمسج ولد خالتها قصدت كلام الناس اللي كبروا راسها يعني كأنها مو واضحه
واخويا مرره معصب مني يقولي اصلا الغلط مو عليكي الغلط علينا اللي اعتبرناكي آدميه وزوجناكي .. بس انا بحط حد لهاذي المهزله بكره وقبل لا اسافر بحط الإثنين بغرفه وحده واشوف ايش يطلع منهم
والله اني بكيت واترجيته انه ما يسويها زوجي واعرفه مجنون مدري ايش حيقول ولا كيف حيتصرف .. وولد خالتي حينشرها بالعيله اعرف تفكيره غبي اكيد بيفكر اني بفكر فيه وراسه يكبر لأنه سبب مشاكلنا .. قلتله اذا بتطلق حابه اتطلق بهدووء ما ابغى شوشره وفضايح مارد علي
فكرت اني اكلم بابا واخليه يمنعه وبنفس الوقت خايفه اخويا يزعل مني لأنه نبهني ما اجيب سيره لأحد انه قابل زوجي مدري على ايش ناوي .. ياريتني ما دخلته
ايش تنصحوني اسوي؟ والله خايفه جايني احساس انها حتصير مصيبه
ايش تنصحوني اسوي؟ والله خايفه جايني احساس انها حتصير مصيبه
وماني عارفه كيف كان المفروض اتعامل مع موضوع ولد خالتي .. اذا دافعت عنه قال تحبيه واذا طنشت وغيرت الموضوع قال تفكري فيه واذا حلفتله اني ما احب غيره يقولي انكتمي بلا نفاق .. عارفه اسلوبي غلط بس كل شي جربته ومافاد .. الله يعدي هذا اليوم على خير والله انه اثقل يوم في حياتي مدري ايش حيصير
