احس حياتي كل يوم عن يوم تدمر وحتى نفسيتي تعبانه

[شموخ هلاليه]

بسم الله الرحمن الرحيم

انا شاااركت في المنتدى وكلي امل اني اجد الحل لمشكلتي ..

انا توني متزوجه صار لي شهر و15 يوم ..

زوجي هو اكبر ولد وابوه متوفي ..

بس المشكله .. انا ساكنه مع اهله على اساس هو رجال البيت ..وماقدر ابعده عن اهله

امه تغاااار مني من ثاني اسبوع من زواج .. وبدت تسويلي حركات حسستني انا غلطت عليها في حاجه والله قعدت احاول افسر حركاتها اقول وش سويت لها ليش تعاملني بطريقه احس تكرهني .. وانا ماسويت لها شي وانا اعاملها مثل امي وكل يوم احب راسها واصبح عليها ودايم الوجه البشوش في وجها ..

بعدها صارت تدخل بيني وبين زوجي تخيلووو حتى عن الفراش تعرف وش يصير .. المشكله ولدها مطيع لها ويعلمها بكل حااجه ولايرد طلبها ومرات يتغير علي وتعطيه اومر اسويها ..


انا مب عارفه شسوي زوجي طيب ومابي اخسره احس حياتنا صارت تتردا اكثر من قبل ...

كل شوي تتصل فيه حتى لحظات رومنسيه تقطعها بينا كل شوي اتصال واكثر اتصالاتها تسوي انها زعلانه مني اني ماطلعت لها وهو يهاوشني اطلع لامه ..
وانا كرهت اطلع من غرفتي بعد مشاكلها صرت اخاف منها .. لانها ادور علي الزله ..

والحين هي لشافتني وبناتها موجودين حتى نظره ماطالعني كني مو موجوده كله تسولف معاهم وهم نفس الشي
وانا مره طلبت خدامه تساعدني وكان ظهري يعورني هاووشت الخدامه وراحت لزوجي وانا كنت اتسمع لهم,, قعدت تهاوشه تقول تتدلع وبعدها قعدت تبكي عنده تقول انه انا ماجي اسلم وكله قاعده في غرفتي وانه انا مابيها!! وتقول لو مابيني وبين اهلها الاحترام كان خليتها تذلف بيت اهلها من زمااان ..
وكله تحاول تزعله علي
والحين احس نفسيته تغيرت ماصار يحبني مثل قبل حتى ابتسامته لي تغيرت كله من امه ..
تخيلوو كل الوقت تتصل مو مخليتنا على راحتنا كلما تتصل تقول يلا تعال صاله عندي ولا يلا ودني واذا عرفت احنا تمشينا تطلع له بسالفه تعال ضروري ولا جيب من سوبر ماركت غرض ضروري .. ملييييييت .. انا في العزوبيه كنت مرتاااحه من المشاااكل ..
واللي يقهرني في زوجي يعلم امه بكل شي حتى عن الفراش .وهي مدخله بحياتنا كثير وهي مستغلته على طيبته وطاعته لها تصدر اوامر يقولها لي عشان انفذها وهو ماله شخصيه . وانا كلمته ووعدني واحس مامشا على وعده يقعد مع امه ساعات كثيره ..اكثر من يقعد معي ..
انا مب عاارفه شسووي جيتها بطيب مانفع ....!!
احس حياتي كل يوم عن يوم تدمر وحتى نفسيتي تعبانه .. قد شفتو عروس من ثاني اسبوع من زواجها نفسيتها تعبانه من مشاكل امه ..

ساااااااااااااعدوووني ارجووووكم ابي اعيش حياتي ابي استانس ومابي امه ادمر حياتي وتتحكم فينا وتفرقنا عشان الغيره ..

حسبي الله ونعم الوكيل ...

 

[كاكاو بالعسل]

الله يعينك اختي ...نصيحة تحملي امه ..اناعارفة انك طيبة معها كوني أكثرطيبة..تقريي لها حاولي تحسسينها انك بنتها مو زوجة ولدها مثلا اهديها اي شيء لوبسيط اذا طلعتوا مثلا قولي اشتهبت لك هالشغلة ..أشكي لها همك مثلا اطلبي نصيحتهاباي شي وقولي لها تعجبني افكارك اوتربيتك لعيالك اوتضحيتك علشانهم ......حاولي تكسبينها بأي طريقة لوجه الله اولا ولاجل زوجك ثانيا ...
وشجعي زوجك على برها....وعليك بالدعاء ثم الدعاء ثم الدعاء
الله يحبب فيك خلقة

ادعي لي بالاولاد الصالحين خلقا وخُلقا

 

[تآئه بين آحلامي]

شششششوفي
عادي حبيبتي عامليها بإحترام وسلمي عليها جبيلها هدايه
هي راح يحن قلبها عليك​

 

[nice mom]

الله يعينك ويصبرك عليها ويسخرلك زوجك اصبري ماتضيق الا تفرج طيب اطلبي بيت لك لحااللك ابعدي عنها وفي نفس الوقت خلك ذكيه واكسبي زوجك يعني اذا جاء يهاوشك عشانها قولي حاضر وامرك هذي امي على عيني وراسي ومن هالكلام وامدحيها قدامه واشتري لها هدايا وهو معااك يعني لاتجيبين طااريها الا بكل خيررررر عشااان يعرف ان امه هي اللي تختلق المشاكل وانت ماالك ذنب

 

[شموخ هلاليه]

كاكاو بالعسل .. الله يرزقك ويكتب لك با الاولاد الصالحين خلقا وخُلقا الله يحقق لك كل الي في بالك .. الله يووفقك ياارب ويسعدك في حياااتك ويرزقك بالذريه صالحه ..

كاكاو بالعسل ..انا عاملتها بطيب وحطيتها في عيني وقدرتها ,, حتى وحده انصحتني قالت اتركي عنك الطيبه راح يستغلون طيبتك وانا اعاملها بالاحسان مقابل الاساءه منها .. وهي يمكن تشوف طيبتي انه مالي شخصيه وانها تقدر تسيطر علي وتمشي حياتي على كيفها ..
طيبتي مانفعتني .. نفسيتي تعبت منها حتى لدرجه اتمنى اقعد في بيت اهلي اسبوع ع الاقل ارتاح نفسيا ..

 

[شموخ هلاليه]

تائه بين احلامي لو تعرفين ان هديتها كانت اغلى من هديه امي انا خذيت لـ امي ساعه بالفين ريال وهي هديتها مجوهرات ذهب باربعه الاف ريال ,, بس للاسف المفروض اهدي الغالي للغالي

 

[شموخ هلاليه]

nice mom ماقدر اطلب بيت هو رجال البيت وولي امرهم وهم مايستغنون عنه ..
وهو معااك يعني لاتجيبين طااريها الا بكل خيررررر عشااان يعرف ان امه هي اللي تختلق المشاكل وانت ماالك ذنب << انا اتفق معك في هاااذي وان شاءالله راح اسوووي مثل ماقلتي

 

[الشتاء الدافئ]

معليش لا تزعلين مني لكن الله يعلم اني اعتبرك اخت لي في الله اتمنى لها السعاده ..
لما تقدم لك زوجك وخطبك كنتي تعرفين انه المسئول عن اهله؟
كنت تعرفين انك بتعيشين مع امه واخوانه وخواته؟
كنت تعرفين انك ماراح تستقلين في بيت خاص لك الا بعد عمر طويل لامه؟
معقوله ماحسبتي حساب هالاشياء قبل الموافقه عليه؟
ولاتقولين ماتوقعت امه بتغير عليه لاننا كنا ولازلنا نسمع عن غيرة الامهات
واللي ماسمع شاف قصص في التلفزيون تحاكي الواقع ...فاذن المفروض من كل انسان يتحمل نتيجة اختياراته ....
وهذا الرجل والعيشه معه ومع اهله وافقتي عليها فلازم تتحملين نتيجة اختيارك
وانا هنا ماالومك او اقول غلطتي لما وافقتي عليه انا اقول اصبري وتحملي وتصرفي صح عشان تعيشين بسعاده انا اقول زوجك ماله ذنب يعيش تعيس بينك وبين امه مايدري يرضي مين فيكم تتوقعين هو مبسوط وامه تقطع عليه لحظات سعاده هو متلهف عليها اكثر منك لكن مابيده الا الصبر هذي امه ومايقدر يزعلها وهي الله يهديها ماعندها حكمه ومافكرت في سعادة ولدها لانها مسكينه خايفه تاخذينه منها وغير كذا ثقافة جيلها مختلفه واللي تربت عليه غير اللي تشوفه اليوم ...
المطلوب منك الصبر ثم الصبر ثم استخدام ذكائك لاحتواء زوجك فهل مدة شهر ونصف في رأيك كافيه ليفضلك على امه ..؟ وفي نفس الوقت لاتكوني طيبه لدرجة الغباء فهناك قاعده عامه ان من وطى نفسه للناس داسوه ..
انتي حددي هدفك هل تريدين الاستمرار في حياتك الزوجيه؟ هل تريدين كسب قلب زوجك ومحبته ؟ اذن اتعبي شوي في البدايه وبترتاحين بعدين ..اكسبي نقاط مع زوجك تصير مخزون لك في المستقبل ...
انتي الان عروس وحساسه وتكبرين الامور اكثر من حجمها ..خلك ريلاكس ولاتدققين وخلك غامضه مع اهل زوجك وكلامك قليل
وفي نفس الوقت لا تجيبين سيرة ام زوجك الا بكل خير امام زوجك واذا جا لها طاري وبكذا بيسمع الغلط من جهة امه فقط ..
ولا تنسين انه متضايق من التدخلات وانتي كوني حازمه معه في مسأله اسراركم الخاصه وحازمه مو معناها بالهواش لا بالدمووووع ...ابكي بدلع وقولي لاني استحي وانت تكشف خصوصياتي والظاهر اني بارفض يصير بيننا شي عشان ماتنقله ..
خليه يشوف منك الدلع والبراءه والنعومه لايحس انك نقاقه او متذمره بيمل منك
ولا تضيعين هالايام الحلوه واهتمي بنفسك واكشخي وتعطري ودائما كوني في عينه في اجمل صوره.....
ولا تتركين اذكار الصباح والمساء والدعاء في كل وقت ان الله يوفقك في زواجك ويسخر لك زوجك واهله ويعيشك في سعاده...

 

[رقله 100%]

حبيبتي لو بكتب وبقول بيطول الكلام
لكن حبيت تقرين موضوع كاتبته انا
في قسم الزوج والزواج عنوانه
عندك حماه غاثتك تعالي هنا الحل واتمناء تستفيدي