ابغي مساعدتكم

[المحاميــة]

السلام عليكم ...

شخباركم ك.. عساكم بصحه زينه ...

ابيغي مساعدتكم ...


انا طالبه وموظفه بنفس الوقت صار لي سنتين بالجامعه ادرس قانون ... واداوم من سته اشهر ...
يعني عمري 20 سنه


قصتي قصه ....

يوم كنا في فترة تدريب فالدوام ... تعرفت ع وحده وصرنا ربع وتعرفنا نحن اثنين ع وحده ثانيه ..
صرنا 3 مع بعض وااايد ....
دوم نطلع مع بعض... آخر يوم من التدريب بشهر 3 تقريباً عطونا يوم إجازه فقرننا نطلع الصبح نروح بوظبي نتمشى كانت فكرتي ... وافقوا طلعنا الصبح وحده من البنات مزوجه والثانيه توها مخطوبه ...

المهم نتمشى نحن اصلن ما ندل بوظبي ... فالبنت المزوجه عندها اخوي بالرضاعه في بوظبي اتصلت فيه عسب يدلينا ...

انا كنت اسوق ...
تمشينا ....وتغدينا ... عقبها انا كنت مصره إلا أروح العب ... مستحيل ما عندهم مكان الألعاب ألكترونية..

اتصلت فيه وقالت له معنا وحده فخاطرها تروح تلعب ... وهي يدليها الدري وهي تدليني ...

عقبها سكر ....

وبعدها بفتره اتصل تم يسولف معها ...
انا وربيعتي الثانيه نسولف ونضحك .... بعد ماشفتها سكتت وانا اتحسب انها سكرت الخط ...وهي تسولف معنا بس آخ ع الخط يسمع سوالفنا ....

انا بصراحه احب اضحك ... واحب اضحك ربعي واهلي ,,,, له انا ما في احلى عن الفرحه ...

طبعا وصلنا وربعي يلسو وانا قمت ألعب ... ولعبت ربيعتي المزوجه ... وهو اتصل ونحن باللعبه قالت له بلعب عقب بتصل فيك ...

المهم ... عقبها إذن الظهر ورحنا نصلي.... وقبل ما انطلع قالت لي ربيعتي ... هو يسأل عنج والله غريبه اول مره .. يسأل عن وحده انا ما عبرت لها ... طلعنا ونحن سايرين صوب السياره قبلها قالت لي هو بي عسب يشوفج قلت لها شو هالرمسه الشباب كلهم نفس الشيء ....
طلعنا من مركز ألعاب رايحين صوب السياره راحت هي تسلم عليه.... صدق يه ...
عسب يشوفني .... انا فرحت ويسلت اضحك .... بالياره مع ربيعتي الثانيه ...
فالدرب الرده لدبي ... ربيعتي ترمسني وتقول لي فلان بيخطبج ... شو ردج انا استغربت وسكت وقالت لي ربيعتي الثانيه ... صدق الولد شارنج .... ويبغيج ....

انا رفضت له انه ما يداوم .... ومره رحت بيت ربيعتي انا وربيعي وشفته هناك وكنت أعرف انه هناك ....

بس دوم ياخذ اخباري من ربيعتي ... انا فرحانه في شخص مهتم فيه ...

وسافر من شهرين عسب يروح يأمن حياته ويرجع ...
بس قبل ما يسافر ترك لي رساله بالمسنجر استغربت منها ...

كاتب فيها ادري بتقولين من وين ياب ايميلي .. صح انا عرف ايميلج واعرف رقمج بس ما حبيت ارمسج انا مب شرات الشبااب انا احبج ... وابغيج .. ومستحيل انساااج ... انا مسافر حطي بالج ع نفسك انا ما عندي غيرج... انا مسافر برجع شهر 1 بي بخطبج ...

ع فكره هو ما عنده احد قبل خمس سنين اهلها توفوا بحادث ... وهو عايش بروحه وملتزم ويلقي محاضرات ....وكل جمعه مخصص بس يروح يزور اهله بالمقبره ... الله يرحمهم ..



انا انعجبت فيه حييييييييييييييييل .... ما اقدر اصبر لين شهر 1 احس انه وااايد ...
اقول فخاطري ليش يوم انه يحبني ... ليش ما يتصل وهو يعرف رقمي ... بس اقول اكيد يحبني ويبغي يدخل من الباب هب من الدريشه ....

وكل ما اسوي شيء اخته بالرضاعه تقول لي فلان ما يحب جي لا سوين ؟؟؟؟


انا ما فيه صبر لين شهر 1 ؟؟؟

احين كل ما انخطب ارفض اقول فلان يبغيني وابغيه ... قبل اسبوع خطبني ولد خالي ... حلمت فيه قال لي انا سافرت عسب أكون حياتنا لا تخليني ... رفضت ولد خالي ...

شو رايكم انتظره .. هو يحبني ولا .....

يوم أسال اخته تقول لي اول مره اشوفه مهتم بوحده كثرج ؟؟؟؟


ارجوكم ساعدوني :icon1366::icon1366:


اسمحولي طولت عليكم

 

[مييم]

وعليكم السلام والرحمه

بصراحه مادري شقول بس اخاف تضيعين فرصة حياتك وانتي منتظرته واخرتها لابيجي ولاشي

وش رايك تقولين لاخته انا اليوم جايني عريس واهلي موافقين عليه ومحتاره اخاف انتظر اخوك

وبعدين مايجيني 0000 ع الاقل تجسين النبض

 

[المحاميــة]

تسلمين الغاليه راح اجرب هالطريقه

 

[أ . عطاء الأمين "وريقات خريفية سابقا"]

اهلا

علاج حيرتك امرين

الاول : استخيري
كل يوم ..صلي ركعتين وقولي :
دعاء الاستخارة

( اللهم استخيرك بعلمك واستقدرك بقدرتك واسألك من فضلك العظيم فإنك تقدر ولا اقدر وتعلم ولا اعلم وانت علام الغيوب
اللهم ان كنت تعلم ان ’’ اذكري الامر ’’ خير لي في ديني
ودنياي وعاقبة امري فقدره لي ويسره لي ثم بارك لي فيه
وان كنت تعلم أن ’’ اذكري الامر ’’ شر لي في ديني ودنياي وعاقبة امري فااصرفه عني واصرفني عنه وقدِّر لي الخير حيث كان ثم ارضيني به )

ثم الخطوة الثانية : اتخذي قرار بعد ماتشوفي احساسك

اعتقد المجازفة بهادي المواضيع صعبة
يعني مو معقول تنتظريه وتلاقيه بعد فترة اتزوج وحدة غيرك من هناك او اي مكان
بتكوني ضيعتي فرص ...
وايضا لا نستطيع ان نقول لكك انتظريه .. لانه قد لا يأتي
وايضا لا نستطيع ان نقول تزوجي اي شخص يخطبك
وانتِ تحبي شخص اخر ... ويود ان يخطبك .. اذا لم تحبيه ولم تصلي لهالمرحلة الافضل لكِ ان تتزوجي
وان كنتِ قادر على النسيان الافضل لكِ ان تتزوجي ... صاحب الدين والخلق
لأن من يخاف الله اذا احبك اكرمك واذا لم يحبك لم يظلمكِ بإذنه تعالى

ولذلك..

مؤكد من ترضون دينه وخلقه فزوجوه
يعني اذا لقيتي شخص صعب ينرفض عشان اخلاقه وانتي مقتنعة فيه
بس الي شعرتي بنقصه الحب او بداية رومانسية كالتي مضت مع الشاب واخته...
فالنهايات قد تكون لاتكون جميلة ...
لاتنظري للبداية ولكن انظري للشخص نفسه ان كان على خلق ودين ومقتنعه به
فقد يأتي الحب مع الايام ..ان بحثنا عنه وسعينا لأن يكون بيننا بالدعاء ثم امور اخرى

لا تطالعي بالماضي والاحلام خلفك .. اتوكلي على الله
لأن هناك احلام اخرى قد تتحقق مع من هو صاحب دين وخلق والاهم ان تكوني مقتنعه فيه ..


الاستخارة تنهي الحيرة
وبإذن الله تبارك في الامر اياً كان هو!


اسألي احساسك وليس عواطفك
ابحثي عن الراحة النفسية لما قررت ان تقومين به

وتحمي نتيجة قراراتك ... فلا تلومي اخته او هو اي شخص ان انتظرتي ولم يتم شيء ’’ بعيد الشر ’’


الله يوفقك يارب

 

[نظــ جديدة ــرة]

موفقة يا أختي

الأخوات كفو و وفو

ان شاءالله نسمع منكـ الاخبار الحلوه

موفقة مرة ثانية

 

[المحاميــة]

هلا فيكم ...
تسلمون ...

انا فكرت عدل وخذت قراري....

انا ما اعرف يمكن يجي ويكمن مايجي...

قبلها سالت اخته وقلت لها تراني انخطبت قالت لي (( صلي صلاة الاستخارة )) وخلي اهلج يسألون عنه .. بالنسبة له اخوي يبغيج بس هو مسافر من 3 شهور فالدوره ما نعرف عنه شيء... لو هو صدق يحبج بسوي شيء عسب ياخذج ... توكلي ع الله وصلي صلاة الأستخاره بلي خطبج ...


انا هم غلطت غلطه كبيره ... صدقته يوم قال انه راح يخطبني .. انا توى عمري 20 سنه ... بعدني ... الله كاتب حياتي مع من راح اعيشها ...

واللي قررته انسى هذا الانسان إلي اصلن ما كان له بدايه بحياتي ...


ادعوا الله يهديني ...

تسلمون ع النصيحه

 

[الماسه بيضاء]

الله يوفقك وييسرلك أمورك

 

[المحاميــة]

ارجوكم شو الحل ؟؟؟

بدايه المشكله في هذا الرابط ...
http://www.niswh.com/vb/t163669.html


بس احين تكتمل المشكله ... انا قبل قلت له اخته اني انخطبت انا افكر ....

اليوم اتصل فيها يسلم عليها ... وقال لها انا برجع بعد شهر اخلص الموضوووع وبخطب
..ويسال عني (( قالت له انها انخطبت))
وقال لها انا وين ... شو انا حيوان .... انا احبها ... انا حارم نفسي من اشياء كثيرة عشان اجمع مهرها ... ليش انا نحيس ....

قلتا قضاء الله اهلي يتوقون بالحادث... وهذي إلي حبيته بعد تروح مني .... ليش ....

انا ما برجع ببقى برع ... دام إلي احبها بتروح عند غيري ....
اتصلت اخته فيه تخبرني ...

انا قلت لها انا فرحانه زين انه ما نساتي .. صح انا انخطبت بس انا مانسيته ولي خطبني اهلي يسألون عنه ...

قلت لها زين احسن خله يحزن شوي ... قالت لي ليش حرام انتي دوم تجرحينه ... وهو يحبج ... قلت لها يا فلانه انا مستحيل افكر بغيره ...

بس هم محتاره انتظره ولا ؟؟؟



تكفون شو الحل .... انا احس انه يحبني وشارني ... انتوا شو تقولون ؟؟؟ ابغي مساعدتكم ...

 

[همس الاوتار]

حرام عليك يا اختي دومته يحبك وشاريك انتظريه وبعدين تتزوجين واحد يحبك ويعرف قدرك ولا واحد ما تعرفينه يمكن يحبك ويمكن لا وهو اكيد لو تخليتي عن خطيبك بيقدرلك الموقف ومارح ينساه ابد ورح يعرف انك تحبينه ورح يحبك اكثر وقبل كل شي شوفي من اخلاقه افضل وخلي اهلك يسالو عنهم والرسول صلى الله عليه وسلم قال من ترضون دينه وخلقه فزوجوه وهذا اهم شي
واستخيري من دعا الله ما خاب
الله يقدملك الي فيه الخير يارب

 

[كاترين جوجو]

انتظريه احسن دام يحبك ولاتكثرين من هالحركات
لان ممكن تتغير نظرته لك
والله يكتبلك الخير معه ولامع غيره

 

[قهوه تركية]

مسا الخيرات
برأيي أنه اذا جاكي اللي ترضي دينه وأخلاقه اقبلي فيه
ويا حبيبتي ما في شي اسمه حب ,, صدقيني ,, لا قبل الزواج ولا حتى بعد ,,
قبل الزواج اسمه اعجاب أما بعد الزواج فالحياة روتييييييينييييييه جدن والعلاقه تبنى على فيديني أفيدك
لوشوماصار بينكم من حب ..