((إمام مسجد يسمع صوت إبنه وهو ساجد ((سبحان الله العظيم‎

[دلوعة سيمو]

حبيباتي البلقسيسيات انا حطيت القصه هنا لكثره مشاهدي هذا القسم ماشاء الله..




كم أعجبتني هذه القصة كثيرا وأكثرت فيِ بالغ الاثر فأحببت نقلها لإخوتي::

بسم الله الرحمن الرحيم:


دارت أحداث هذه القصة في عطلة الحج قبل سنتين في منطقة الشعيبه وهي منطقه ساحليه بريه
على شواطىء البحر الأحمر
تقع جنوب جده على طريق الليث,, وتعتبر منطقة تخييم < طلعات > للشباب والعوائل في إجازة الشتاء


المهم كنا 5 من الشباب وصلنا الصباح و نصبنا خيمتنا على شاطئ البحر وكالعادة ذبحنا الذبيحة ووو الخ
أنا بصراحة وأعوذ بالله كنت الوحيد بينهم ما أصلي نهائيا يعني وقتها كان عمري 21 ولا أركعها
مع أن أبوي إمام مسجد و كنت أطيعه في كل شي يقوله ويامربه ألا الصلاة
وفي حياتي ماسمعتة يدعي على ماكان يقول غير الله يهديك ويصلحك بس
كان يقومني للصلاة أروح اخذ فره بالسياره وارجع بعد ما يخلصون
لأنه هو أول واحد يدخل المسجد وأخر واحد يطلع منه
عشان كذا مراح يفقدني
يعني كنت عاصي لدرجه مو طبيعيه,,,,


المهم بعد ما تغدينا جهزوا الشباب عدتهم يبغون ينزلون البحر يروحون رحلة غوص
وطبعا كان لازم واحد يجلس في الخيمة جلست أنا لأني موقد كذا في الغوص
جلست لوحدي في الخيمة وكان جنبنا شباب أذن واحد منهم وطلعت برى
شفتهم يتجهزون للصلاة قلت تجنبا للإحراج خلني انزل للبحر
اخذ لي شوط سباحه,,


المهم لبست ونزلت للبحر .. مشيت مشيت الين جيت في منطقه حلوه للسباحه موعميقه مره ولا قريبه
سبحت وسبحت وسبحت ومنطقة الشعيبة معروفه بالأجراف
تعرفون الأجراف أكيد,,


المهم تعبت شوي وقلت خلني أنام على ظهري وأهمل جسمي على أساس أريح شوي وارجع
سويت الحركة و جلست أطفو شوي وووفجأه حسيت أن واحد سحبني لتحت ونزلت تحت المويه
حاولت أوقف على ارض البحر وادف نفسي فوق على بالي أن المسافة مترين تقريبا
اثاريني وأنا أسبح بعدت ونزلت في جرف وأنا ما ادري وطبيت في منطقه عمقها 5 أمتار تقريبا


حاولت اطلع حاولت وحاولت مااقدرت حسيت كان فيه شخص فوقي وماسكتي مع راسي ويدفني لتحت
احاول بكل الطرق اللي تعلمتها في النادي ماقدرت اطلع
كنت في حاله ياشباب لا احسد عليها
كنت متلخبط واخبص في المويه حسيت أني ولاشي,
حسيت وقتها أني اضعف من الذباب


من منكم في يوم حس انه عاجز عن نفسه؟
بدأ النفس يضيع النفس مني بديت احس بالدم يحتقن في راسي
بالعربي بدأت احس بالموووووت,,,,,


بديت أتذكر أبوي وأمي وإخواني وأقاربي وأصحابي وعيال الحارة والعامل في البقاله
وكـــــل شخص مر علي بحياتي تذكرت كل شيء سويته وكلها في ثواني معدووده,,
وبعدها تذكرت نفسي,,,!!!


بديت اسأل نفسي: صليت؟لا, صمت؟لا, حجيت؟لا, تصدقت؟لالالالالالالالالالالالالا
أنت في طريقك لربك خلاص مفارق لدنياك مفارق لأصحابك كيف تبي تقابل ربك؟؟؟؟


وفجأة سمعت صوت أبوي وهو يناديني باسمي ويقول قوم صلي
تكرر الصوت بأذني ثلاث مرات بعدها سمعت صوته وهو يأذن
حسيت انه قريب بيجي يطلعني صرت أنادي عليه وأصيح
باسمه والمويه تدخل في فمي
أصيح وأصيح مامن مجيب..
حسيت بالملوحة المويه في أعماق جسمي
وبدا النفس يتقطع,,


أيقنت بالهلاك,,حاولت انطق بالشهادة.. نطقت أشهـ.. أشهـ..
ولا اقدر أكملها كأن فيه يد قابضه على حلقي تمنعني من نطقها حسيت أن روحي خلاص بتطلع,,
وتوقفت عن الحركه,,
وهذ آخر شي كنت أتذكره,,


صحيت في الخيمه وكان عندي عسكري من خفر السواحل والشباب اللي جنبنا,,
أول ما صحيت قالي العسكري حمد لله على السلامة ومشي
سالت اللي عندي قلت منهو ذا ومتى جاء وكيف قالوا ما ندري
جانا فجأه وطلعك وزي ما تشوف مشي فجأه!!!!


سألتهم قلت شفتوني وانا في المويه قالوا مع أننا كنا على الشاطي لأكن قسم بالله ماشفناك
ما درينا عنك الايوم جاء العسكري وطلعك من البحر,,
مع العلم أن مركز خفر السواحل يبعد عن خيمتنا تقريبا حوالي 20 كيلو متر طريق بري


يعني يبيله تقريبا ثلث ساعة عشان يوصل لنا أذا جاه بلاغ....
وحادث الغرق صارت في دقائق معدوده
واللي جنبنا وهم اقرب ناس مني وقتها يحلفون انهم ما شافوني
كيف شافني العسكري وجاني؟؟؟وربي اللي خلقني ليومكم ذا ما اعرف كيف وصل لي..!!


ودق جوالي مسكته ألا وهو أبوي بدت الأمور تتلخبط عندي بدا التشويش قبل شوي سمعت صوته والحين يتصل؟؟


رديت عليه كفيك وش أخبارك سألني قالي أنت بخير وكررها كذا مره
طبعا ما ابي اعلمه عشان مايقلق سايست الأمور وقفلت..
قفلت من عنده و قمت صليت ركعتين في حياتي ماصليت مثلها


ركعيتين جلست اصليهم في نص ساعه
ركعتين صليتها من قلب صادق
وبكيت فيهم الين انبح صوتي
في نفس اليوم يوم رجعوا الشباب قلتلهم أنا ماشي ورجعت للبيت
اول مارجعت كان ابوي موجود


اول ما فتحت الباب الا وهو في وجهي قال تعال ابيك
جيت معاه قال امنتك بالله وش صار معاك اليوم العصر؟؟
تفاجأت واندهشت وتبلعمت ما قدرت اتكلم...
حسيت كأن عنده خبر!!
كرر السؤال مرتين...
المهم حكيت له بالتفصيل الممل


قالي والله اني سامعك تناديني وانا ساجد السجود الثاني في آخر ركعه وكانك في مصيبه
مابعدها مصيبه
انت تناديني بصياح واحس قلبي يبي يتقطع وانا اسمع صوتك وما دريت عن نفسي الا وانا ادعيلك بأعلى صوتي
والناس تسمع,,


وفجاه حسيت كأن واحد كب علي مويه بااااارده,
طلعت من المسجد بعد الصلاه واتصلت عليك على طول والحمد لله رديت
علي وحسيت اني ارتحت اكثر,,
لكن ياولدي الصلاة انت مفرط فيها وعلى بالك
الدنيا بتدوم لك ماتدري أن ربك يقدر يقلب حالك في ثواني
وهذا شي بسيط من اللي يقدر ربك يسويه فيك,,
لكن ربي كاتب لك عمر جديد......


عرفت أن اللي أنقذني من الموقف كان برحمة الله اول شي ثم دعوة ابوي لي,,
وهذه لمسه بسيطة من لمسات الموت لكي يرينا الخالق عز وجل أن الإنسان مهما بلغت قوته وبطشه


يصبح اضعف مخلوق أمام بطش الله وجبروته عز وجل
ومن يومها ماغابت عن بالي الصلاة ولله الحمد
ويا شباب عليكم بطاعة الخالق وطاعة الوالدين
صدقوني من بر والديه مراح يخيب ابد,,


برهم أساس سعادتك في
الدنيا وتوفيقك وحمايتك من
الشرور بعد طاعة الله عز وجل
منقول للفائده
دمتم بود​

 

[الاماسة]

قصة فيها من العبرة والعظة الكثير فعلا الصلاة اهم شى في الحياة

 

[أم دانة الحلوة]

الصرااااااااااااحة موضوع جدا خطير ..
كنت راح بكي .. تسلم انا ملك على النقل ونقل موفق ..
دومتي بود ..

 

[ياربي انصرني]

سبحان الله دعاء ابوه انقذه من الهلاك لان ابوه صالح احسبه ذلك والله حسيبه كونه امام مسجد00

والله ان صلاح الاباء يكون حفظ للابناء وجميعنا قرانا قصة الخضر مع الغلامين اللذان كان ابوهما صالحا ومنصلاح ابيهم حفظ الله الكنز الذي كان تحت الجدار000

وهاتين القصتين تعطينا درس ان لا نقنط من صلاح الابناء والدعاء هو القوه التي نحفظ بها انفسنا وابنائنا

 

[دلوعة سيمو]

الاماسه:: نورت الصفحه وشكرا لمرورك العطر..
أم دانه الحلوه:: تسلمي ياغاليه وشكرا ع المرور والله يجعلنا من الصالحين..

 

[دلوعة سيمو]

يارب انصرني فعلا كلامك صحيح صلاح الآباء يؤثر على الأبناء .. حتى لو كان عاصي راح يأثر فيه ويتوب .. ويجب علينا ان ندعي لهم بالهدايه والصلاح.. والآباء قدوه..

 

[blue]

لا اله الا الله
​

 

[شموخ مجد]

::قصة جميل ومعناه اجمل::


::بااارك الله فيك::

 

[ليالينا3]

مشكوره عيونى على النقل
بس حبيت اعلق على الموضوع
وقولك يادلوعه ان قصتى مع صلاتى ماتفرق عنه
من 14 سنه
طلعنا امريكا مع الاهل سياحه لمده شهر
ابوى محافظ على الصلاه وحافظ القرآن الكريم
وامام لمسجدنا اذا غاب الامام
كنا اذا طلعنا من الصبح الين المغرب ونرجع في الليل الفلا
نصلى الظهر والعصر واحيانا المغرب برا
وابوى وقت الصلاه دخل يعنى دخل مافيه تاجيل
مره كنا في ملاهى دزنى لاند
ودخل وقت صلاه الظهر قال ابوى يالله توضو
وين بنصلى ؟؟؟يابوى قال هنا
قدام الناس ؟؟فشله؟؟
مارد علي وصفينا نصلى ((طبعا على جنب فوق نجامه))
متفشله اغلب الى يمرون يناظرون ويرحون
وانا مدري وش قلت في صلاتى
لانى ماكنت محافظه عليه ولا عرفت قيمته صح
المهم
في يوم من الايام وقبل رجوعنا للسعوديه
بيومين توفى خال ابوى وهو مرررررررررره عزيز عليه
جلسنا يومها في البيت
رحت انا واختى الى تصغرنى 5 سنوات نتسبح في مسبح الفلا
وما قد سبحت فيه لان ما قد جانا فرصه نجلس في البيت
طلعنا قالت امى صليتي العصر قلت ايه
وانا لا العصر ولا الظهر الله يغفرلي
ورحت لجهت العميق
وعلى بالي انه متر ونص مهو مبين اتاريه 4 امتار
واطب في المويه ولا اعرف للسباحه طريق بس لاقافه
وانتظر انى اخرج مافيه امل احرك يمين يسار على الاقل اظهر شوى اخذ نفس
علقت في الوسط
افتح عيونى مستحيل واحس انى ثقيله احساس وشعور والله والله ماينوصف لو اكتب فيه لين بكره
واقسم بالله ان مر على شريط حياتى مثل ما ذكر الاخ فعلا انا مصدقته في كلامه انتو تقولون فيه وقت اصلا وهى يمكن تكون اجزاء من الثانيه بس حسيت انها طوووووووووووووووووووويله
كل شي تذكرته ماسويته واخرتها قلت بموت ماصليت
بموت ما صليت
ليتنى صليت والله ما اكذب عليكم في شعورى وقتها كيف
اختى انكرتنى ما طلعت من المويه راحت لبوى تقول
ابوى فلانه دخلت المسبح ولا طلعت
وكان الوالد وقتها يكلم في التلفون عشان يقدم حجزنا
يقول بس سمعت كلمه ما طلعت توقعتك موتى
ويجي ركض وانا استسلمت فترت يدينى بس عيونى جاحضه
واشوف خيال ابوى وابغى اتحرك وكنت قريبه من حافه المسبح ويسحبنى من يدي
وعينك ماتشوف النور
اخذ نفس بقوه واطلعه بقوه واكررها منى مصدقه انى اتنفس
وما اسمع اهلى زين اذنيه ماليانه ماء
واطالع فيهم اقول مامت مامت
امى واختى الكبيره خايفين وابوى من خوفه جالس يخانقنى ليه تسبحين مكان الكبار
وانا اطالع واضحك
لين استوعبت الى حصلي
ومن يومها بأذن الله انى محافظه على صلاتى
ياااااااااااااااااااااه
ذكرتينى
مشكوره حبيبتى
مع العلم لمن قريت موضوعك بكيت مدري ليه



​

 

[*همسة*]

باارك الله فييك

والحمدلله على هداايتك ليالينا

 

[رقم1]

سبحان الل ذكرني بآيه بسورة الكهف قال أعز من قائل ( وكان ابوهما صالحا )

 

[*SARA*]

سبحان الله العظيم
ربي قادر سبحانه
ومشكورة ع القصة

 

[رقم1]

سبحان الل ذكرني بآيه بسورة الكهف قال أعز من قائل ( وكان ابوهما صالحا ) ادعو ياخواتي الله يهدي ابوي احس ان كل لي صير لنا من عمايله من سبة ظلمه لنفسه لنا اللهم اهدي ابي هدايه وتوبه وعفو ورحمه قبل الممات ورحمنا يارب برحمتك يامن قلت وقولك الحق ( ولاتز وازرة وزر اخرا )

 

[mo0o0o0on14]

رب اجعلني مقيم الصلاة ومن ذريتي ربنا وتقبل دعاء وجزاك الله خير على النقل

 

[محبة كتاب الله]

الله يجزاك خير

 

[دلوعة سيمو]

بلو وشموخ المجد بارك الله فيكم ع المرور..
ليالينا3.. الحمدلله على السلامه وهذا خير لك وشكرا على المشاركه الحلوه صراحه اسعدتيني يعطيك العافيه..

 

[دلوعة سيمو]

ساره شكرا ع المرور يعطيك العافيه..
رقم1.. جزاك الله خير ع اللفته الحلوه..والله يهدي ابوك ويجعله من القائمين والذاكرين الله كثيرا..
مووون14 ومحبة الكتاب .. وجزاكم الله خير..
مووون14..

 

[دلوعة سيمو]

همسة.. وجزاك الله خير وشكرا ع المرور..