أنا صاحبة موضوع أول مره زوجي بيسفرني...تعالوا اقولكم وش صااار!!!!

[سوسو بنت فوفو]

السلام عليكم وش اخباركم حبايبي اشتقت لكم كثييييير

رجعت لكم اقولكم اخبار ي بعد الموضوع اللي كتبته تلبيه لرغبة العضوات اللي طلبوا مني
اكتب لهم

http://www.niswh.com/vb/showthread.php?t=323753

قبل موعدنا بأسبوعين تقريبا حجز زوجي لدبي من الاربعاء ونرجع الاحد..
ورتبت كل شي انا لي شهر اهتمام بالجسم والبشره والشعر والله وكأني عروووس تستعد ليوم زواجها ههههههههههههه:39:
ورحت شريت لي اللبس اللي احتاجه وفصلت لي عبايه حلوه ومرتبه وساااااااتره ولله الحمد
مع طرحتها..
وشريت كل مايلزم للرحله من شنطه كشخه وجزمه الله يكرمكم وشنطة سفر جديده
مع ان عندي شنط بس ودي كل شي جديد ..
وشريت منظفات وعطور وزيوت عطريه من البدي شوب وزهور الريف ومحلات العطور لي ولأبو الشباب عريس الاخ على غفله خخخخ:31:
وشريت له ثوب نوم جديد وبيجامه حلوه غير قمصان النوم وملابس لي ..ورتبت كل شي من الى
وسويت لنا جدول للرحله كل يوم من الصبح الين الليل وين نروح والاماكن الحلوه اللي بنروح لها...
باقي على رحلتنا 14 يوم...فجأه .......



















مرضت وجاني تعب غريب اول مره يجيني آلآآآآآآآم فظيعه تجيني في كل جسمي
ووهن غريب في عظامي وشي ووالله مااعرف اوصفه ياربي لك الحمد :8:...:c016:
مااحب اشكي لاحد غير لربي بس عشان اقولكم وش اللي صار معي..
رحت لناس زرتهم ولقيت عندهم مجموعة حريم
وبعد مارجعت جاني هذا التعب الله اعلم من ايش بس مااحب اظلم احد....
رحت سويت كل التحاليل والفحوصات حتى شكوا بمرض خطير في كل التحاليل اللهم لك الحمد سليمه ماعدا اشياء بسيطه ..وباقي لي تحليل والله ماشفته مابي اوسوس...خايفه
بس صرت ارقي نفسي كل بعد صلاه وانفث على ماء واشرب وفي الليل ادهن بزيت مقري عليه ...شفت شي عمري ماشفته يارب لاتضيع لي اجر..
كرهت كل شي بس خامله ومنسدحه على السرير وفي الليل مااقدر انام من الألم
وماارتاح إلين اطلع السطح في عز الظهر وأمشي على البلاط حافيه ماادري ليه اللهم لك الحمد..
نسيت الرحله وكرهت كل شي......قمت أوسوس بالموت ولمين أخلي عيالي...
وقلت لزوجي خلاص الغي الرحله ماعاد لي خلق لشي يارب بس يعطيني عافيه ويخليني لعيالي اللي شفته ماهو هين الحمد لله على كل حااال ..سبحان الله الانسان مايسوى شي بدون العافيه وتصغر الدنيا بعيونه ويشوفها ولا شي ..

نصيحتي ...لكل وحده معافاه

سليمه .........تشكر ربها الف مره في اليوم وتحمده على نعمة الصحه والعافيه وتتصدق وتعرف انها في نعمه عظيمه ماتعرفها الين تفقدها لا سمح الله
ولا تستخدمها الا في طاعة الله ورضاه...تبتعد عن كل مايغضب ربها عليها من سماع للأغاني والغيبه وكل الآثام لأنك تعصين الله بنعمه ممكن ياخذها منك في لحظه وبدون سابق انذار
الله يغفر لنا ويعفو عنا كلنا ذنوب عسى الله ان يتوب علينا....ولا تنسين الأذكار وانك تحصني نفسك كل ماتطلعين واستودعي الله نفسك وصحتك وعافيتك وخواتيم اعمالك من لا تضيع ودائعه...الناس ماعاد تذكر الله خاصة ان كان مايحبونك أو بينك وبينهم شي بس الواحد يتوكل على الله ويتحصن وربي بيحفظه ان شاءالله..



زي ماقلت لكم قبل كرهت كل شي وقلت لزوجي خلاص انسى موضوع السفر مااقدر امشي من غرفتي الى الصاله بقدر اسافر ؟؟
زوجي رفض وقال مافيك الا العافيه وان شاء الله مايجي يوم السفر الا انتي طيبه بس انت شدي حيلك وقاومي المرض ..ماشاء الله عليه متفائل دائما الله يزيده
مو زيي نفسيتي تتعب بسرعه ...
المهم بعد ماشفت الفحوصات سليمه قررت اداوم على الرقيه مع اني اغصب نفسي ماادري ليه كنت اقرا سورة البقره كل يوم اوزعها على فروض الصلاه حتى اقدر اكملها والحمد لله قدرت ارقي نفسي كل يوم واخلي شغالتي تسوي لي مساج مع الزيت المقري ريحني كثييير يارب لك الحمد والشكر والله لو اشكر ربي من اليوم الى يوم الدين ماارد فضله علي
يوم عن يوم تحسنت صحتي شوي وطلع في جسمي حبه كبيييييره توجع مره بعد الرقيه في يدي وطلع حبه ثانيه في رقبتي ونزل على افرازاااات كثيره خوفتني ماادري وش سببها بس كنت اتنظف واسوي غسول المره واتروش كل يوم بماء مقري عليه وسدر .. قلت يمكن هذا تأثير الرقيه والله اعلم..
وقبل موعدالسفر بيوم قلت لزوجي مره ثانيه مااقدر اروح اجلها ماني نشيطه لدرجة اني اسافر ..رفض وقال انا دافع كل شي حتى حق حجز الفندق سافروا تصحوا..استغربت اصراره واخواتي بعد زنوا علي سافري غيري جو يمكن تتحسن نفسيتك....
المهم استخرت الله كم مره بعدها ارتحت وقلت لزوجي توكلنا على الله ..

والحمد لله الذي بنعمته تتم الصالحات ربي من علي من عنده وسافرت مع زوجي اول سفره لي خارج الوطن وتوجهنا الى دبي دار الحي ...والعجيب يااخواتي ان تعبي كله راح بالتدريج من اول ماوصلت شوي تعبت بعدين خلاص جاني نشاط من ربي حمدته وشكرته عليه مع اني يوم رجعت تعبت اليومين الأولى بس هالحين أحسن يارب لك الحمد كنا وين وصرنا وين ...والى الآن مستمره على الرقيه لأن أحس بآلاااام أحيانا آخرها البارح عسى الله أن يشفيني ويشفي كل مريض
ويلبسنا لباس الصحه والعافيه...
قولواآمييييييين ولا تنسوني من دعائكم أخواتي والله محتاجه دعائكم جدا.....

حبيت أقولكم قصتي حتى تستفيدون منها إنالانسان مايلتهي في الدنيا ذي عن آخرته ويعرف انه في نعمه عظيمه ممكن تزول عنه في لحظه بدون مايحس ..
ودائما كرروا هذا الدعاء...
اللهم إني أعوذ بك من زوال نعمتك وتغير عافيتك وفجاءة نقمتك وجميع سخطك..
وهذا بعد...
اللهم اني أعوذ بك من جهد البلاء ودرك الشقاء وشماتة الأعداء وسوء القضاء..



عاد انتظروني اكلمكم عن رحلتي الرائعه الى دبي.....بعد التعب اللي شفته ...

 

[وردة الحنون]

ربي يشفيك ويعافيك
العين حق مث ماقال لنا المصطفى صلى الله علية وسلم
أخذي أثر من النساء اللي اجتمعتي معهم
واغتسلي فيه
اعزميهم على جمعة ولمه وقت العصر قهوه وشاي
واخذي من أثرهم الفناجيل وكاسات الماي والشاي ونوى التمر والفصفص وو
ونقعيهن بماي واغتسلي فيه ثلاث مرات كل يوم مره
وباذن الله ماتشوفين الا العافية
ربي يخليج لاحبابج

 

[دانه البحر!]

سبحانه الله


الحمد الله على سلامتك


الله يسعدك يوفقك صادقه بكل شي قلتيه


مشكوره حبيبتي على طرحك لموضوعك وقصتك


موفقه

يارب

 

[همسة ليال]

الحمدالله على عافيتك و على رجعتك من السفر

 

[حلو القصيد]

الله يشفيك والحمد الله على نعمة الصحه

 

[حلااميرة الزوق]

ربى يشفيكى ويسعد ايامك

 

[همس اليل الهادي]

الله يشفيك ويعافيك

 

[ماني من ناس]

علي
اجر ان شاء الله
والله يشفيك العين حق​

 

[جوري الشمالي]

الصحه والعافيه نعمه

 

[رازيا]

الف لا باس عليك
والحمد لله على سلامتك

 

[ام جنى12]

الله يشفيك ويخليك لعين ترجيك والعين حق

 

[$ليالي$]

الله يشفيك ياقلبي ويخليك لعيالك

 

[ااااااحبكم كلكم]

الحمد لله على سلامتك
ويشيفك يارب


باانتظارك******​

 

[عيونه دنيتي]

الحمد لله على سلامتكم والله يشفيك ويعافيك

 

[الأميره الناعسه]

ياأختي اكيد تسولفين عن زوجك وعنك وعن سفرتكم عند الحريم وههههههههههههذي اكبر مشكله عندنا يالحريم فيه من اللي بالمجلس زوجها معضبها وفيه المحرومه ياختي الرسول وصى على قضاء الحوائج بالكتمان ومايبنطق عن الهوى

 

[سوسو بنت فوفو]

كل اللي ردوا علي الف شكر لكم وجزاكم الله خير على دعائكم هذا اللي ابي..
اما اختي الأميره الناعسه اللي تقول اكيد اني اسولف لهم عن السفر وعن زوجي لا والله يااختي مافتحت فمي
وانا مجربه العين من زمان عشان كذا دائما كتومه مااقول شي الا اذا عرفوا بالصدفه بعد..
بس عاد مكتوب ماعنه مهروب ..الله يشفيني ويشفي كل مريض..

 

[مـلاك الصغيرة]

الله يشفيك

 

[arradia]

الحمد لله على سلامتك
والله لا يحرم كل واحد من صحته وعافيته

 

[حبــ الوطن]

:26:الحمد لله على سلامتكم والله يشفيك ويعافيك

 

[قاروره مكسوره2]

الحمد لله على السلامه وكويس سافرتي وغيرتي جو اصلا حتى النفسيه سبحان الله تحسن وتتغير مع السفر بس شوفي حبيبتي ادا يمديكي تسوي جمعه لنفس الحريم اللي كانوا مجتمعين هذيك المره وخدي اثرهم من فصوص التمر وبقايا القهوه ومسحي بفوطه مبلله عند باب الشارع مكان الدعسه اكرمك الله واتحممي بالمويه ولاتستهيني ربما اصابك شي من العين لاسمح الله ونصيحه لكل وحده في نعمه وخير لاتجلس تسولف للناس عن الخير اللي هي عايشه فيه وسلامتك