أطلبه شبكة ودبلة ولا اسكت !!

[اشتــاق]

مســـاء الخير ..


أهلين خواتي .. هذا اول موضوع لي :39:


تعريف بسيط عني ..


انا متملكة من فترة شهر .. وزواجي بعد شهرين تقريبا .. "الله يسهل"


واكلم خطيبي .. واستحي منه كثير ..


وانا من النوع اللي مااعرف اطلب .. حتى عند اهلي .. لو كان ناقصني شي مااطلب .. صارو يعطوني بدون مااطلب منهم .. لانهم عارفيني ..

المهم مالكم بالطويله :20:

خطيبي ماجاب شبكة ولا دبلة .. ولا عمره طراها لي .. وكل اللي حولي يحرجوني .. جاب لك !! وليه ماعليك دبله ومن هالكلام ..

وانا مااقدر اقول له بتجيب شبكه ولا كيف

حتى ماادري يوم الزواج اشتري انا شبكه او بيجيب ماادري

علموني فيه ناس عادي مايجيبون شبكه .. ولا مفروض افتح معه الموضوع على اني احس انها صعبة مره :blushing:

واشياء كثيره مااناقشه فيها ولا افرض رايي ..

الاسلوب هذا يقولون ماينفع مع الزوج .. بس انا كذا وش اسوي

ابي رايكم ونصيحتكم..


ويعطيكم العافية :in_love:

ودعواتكم
​

 

[كبريائي روايه]

اهلين حبيبتي .. اشتاق .. شوفي هو اكيد ماتقدرين تطلبين منه وبعدين مسكين يمكن حتى ميزانيته ماتكفي يعني
انا بالنسبه لي متزوجه من سنتين جاب لي شبكه بس دبله لا وكانو الناس نفس الشي يسألوني وانحرج بس صعبه تقولين له
وقبل العرس بشوي يوم شفته ماجاب شريت لي دبله حليوه ناعمه
بس ماعليك يوم ذكرى زواجنا كملنا سنه خليته يجيب لي خاتم ألماس ايقاله بدال الدبله
يعني ان شاء الله بعد العرس تتفاهمون بس مو اهم شي اذا جاب لك كل شي بعدين اذا تزوجتيه تقدرين عليه
عندنا بالقصيمي مثلف يقول ((تمسكن لمين تتمكن))
يعني يعني صيري طيبه وهاديه لحد ماتقدرين عليه بس عاد مو بالاسراف
وسلامتك معليش طولت عليك
اتمنى اني افدتك

 

[الجده الصغيره]

على حسب طبيعة اهله...لاتقولين شي...ان كان بيجيب بيجيب من نفسه..

 

[*ملكة الحب*]

لاتقولين شي
كثير عوائل ماعندهم شبكه ولا دبله

 

[اشتــاق]

كبريائي رواية


حياااااك حبيبتي ..


اوكي الدبلة مو مشكلة .. بس الشبكة احس ضروري .. يعني يوم الزواج اجلس كذا بدون شي ..
ابي اعرف بيجيب ولا ادبر نفسي ..
واستحي اسأله احس عيب .. وهو ماقد جاب طاري ..
والله حيره ..
شاكره لك .. وان شاء الله اقدر اتمسكن لين اتمكن خخخخ




الجده الصغيرة & وملكة الحب ..

صحيح يرجع لعاداتهم .. بس ودي ارسي على بر عشان ادبر نفسي ..


مشكورين
​

 

[6flah]

أساليه عادي يمكن المسكين جاهل بها الامور وخليها كانها سؤال واجابه لاتطلبينه وشوفي وضعه اذا يقدر بس مايعرف لا والله اطلبي واخذي حقك كم مره بتزوجين انتي وترا بعض الرجال ماينفع معهم الطيبه وهذا ابسط حقوقك

 

[ابتسامه مهجوره]

شوفي انتي اسئليه عادي قولي احنا طبعنا ضروري الشبكه وصراحه لازم ماعمري سمعت عروس بدون شبكه بعدين كل متخسر عليك ودفع لك وشرالك يرتفع قدرك عنده ويحس بغلاك اما اذا دفع بدون شبكه عادي مهوب حاس فيك بعدين البنات كل وحده تتفااخر بشبكتها ونا اقولك اسئليه مافيها شي والله انها ضروريه تبين قيمتك عنده وعند الناس

 

[حنانوو]

لمحي له انك بتروحي لشبكة قريبه عندك تملكت ولاصاحبتك يمكن يسالك
ترى فيه ناس يعطونك المهر بالشبكه وهيك والبنت تختار
وفيه ناس يعطيها مهر وطبعا شبكه ودبله وساعه
وفيه ناس بس مهر وشبكه ودبله
وفيه ناس بس مهر وبيوم الزواج يعني صباحيتها عطاها طقم كبير
انتي شوفي اهل زوجك من اي ناس
حاولي تتكلمين معاه بس تلميح موتوجهين هالشي
وكم مهرك

 

[ايمومي]

معليش حبيبتي بس من حقك يعطيك شبكة ودبلة
ممكن إذا تغاضينا عن الدبلة الشبكة لا

أنتي لمحي له مثلا قولي رحت لمحل ذهب ووراني شبكات حلـــــوة
أو شفتيهم بالنت عاد أنتي وإسلوبك
موفقة يالغلا

 

[صفرانه]

انا مع كلام امومي

 

[ورد من الألماس]

حبيبتي ألـف ألـف مبـروووكـ ..~
والبشكة من حقكـ لآزم تلمحييين له عنهآ ..
قولي له ان امي قآلت بنروح اليوم نختآر الشبكة وانا قلت لهآ لا تستعجلين يمكن انتوا مقررين تجيبونهآ ..
وانتي عآد هنآ شوفي وش ردة فعله , أكيد بيعلق ع كلآمكـ =)
موفقه ان شاء الله ..~

 

[صمت الزهور]

اممممممممم !!

طيب انأ عندي فكره جهنميه ,, بدال الحيره و القلق اللي انتي فيه

وش رايك اذا كلمك او كلمتيه تسألينه شو رايك لون شبكتي اخذه اصفر او ابيض ؟؟؟ واذا كان ناوي يجيب لك بيقول لا تشترين انا بجيب و ااذا كان مو ناوي حلو انك عرفتي عشان يمديك تدبري نفسك
وصراحه صعبه تقولين له عطني اعذريه ماتدرين عن ظروف الرجال .. و الله يسعدك يارب و يسخر لك

 

[نور1199]

في ناس عوايدهم كذا يدفع مهر كبير وهى تجيب لنفسها منو الذهب والشبكة

اما اذا دفع مهر قليل اقصد من 30 الف ونازل لا هوا يجيب الشبكة

لازم ياحبيبتي تتعودي تطلبي
انا الوم نفسي قبل لا الومك لاني زيك بلظبط

 

[محبة مكة]

قولي للناس اللي يقولو لك
المهم اننا نكون سعداء وايش فايدة الدبلة

 

[وحيده في دنياي]

عادي قولي له
واذا تستحين خلي احد من اهلك يكلمه
امك .. ابوك
ياحبيبتي هذا لازم لو شي ناعم مو مهم فخم
المهم انه جاب لك

 

[الحنونة 1]

حاولي بالتلميح وإن مافاد أطلبي عادي

 

[اشتــاق]

ياحبي لكم بنات ..

كلكم اتفقتوو على اني اقول له ..

والله اني احاول .. بس صعبة المح .. على ان مهري طبيعي مو كثير بزيادة عشان اشتري فيه شبكة .. مافيه الا ابوي الله يخليه يشتري لي ولا ودي اعنيه ..


الله يقدرني ويخلي لساني ينطق


الله يسعدكم بنات وحده وحده
​