أشعة الصبغه الله يرزق من ترد علي بالذريه الصالحة

[ملعقة سكر]

مرحبا اخواتـــــــي .....
حبيت استشيركم بموضوعي طبعا انا متزوجه لي سنه ونصف اكلت حبوب منع الحمل ستة اشهر وبعده ستة اشهر عزل والان لي سته اشهر ماحصل حمل صرفت لي الدكتورة كلوميد وتابعت التبويض وقالت التبويض ممتاز واخذت ابرة تفجير وتحاليل زوجي سليم لكن ربي ماكتب حمل
الشهر اللي بعده طلبت الدكتورة اسوي اشعة الصبغة انا رفضت بحكم اني توي باديه بالعلاج وسمعت انه ماتسويه الوحدة وهي ماسبق له الحمل
لان الصبغة تنعمل للي سبق وولدت وصار عنده انسداد

واستعملت الكلوميد مره ثانيه طبعا بمتابعة الدكتورة

لكن وش تنصحوني من ناحية اشعة الصبغة اسويها والا اصبر
خصوص اني ماسبق لي الحمل
وابي تجارب الاخوات عن اشعة الصبغة

الله يسعد من ترد علي ويرزقها الذرية الصالحه

انتظر ردودكم ولو بدعوة صادقه او رفع للموضوع

 

[راجيه التوبه]

يؤؤؤؤؤ والله انك مثلي
نفسي اسمع اجابه تريحني مادري ليش صرت اهوجس بالموضوع هذا بالذات
الله يرزقنا وياك يارب ولايكسر لنا خاطر يارب العالمين​

 

[آيــــــــــات]

الله يريح بالكن ياربـ ويرزقكن الذريه الصالحه عاجلا غير آجلا يا جواد يا كريم..

ما عندي علم للأسف ..،

 

[تعبت اعاني]

لاتخافين انا عملت اشعة الصبغة قبل مااحمل اساساً وحملت الحمدلله بنفس الشهر اللي سويتها فيه وسويتها كمان قبل حملي الثاني لاني ماحملت وخفت من الالتصاقات لاني كنت والده قيصري وحملت بعد شهرين من عملها

 

[نونه المتفائله]

حبيبتي أنا ماأنصحك تاكلين كلوميد هالشهر إنتي لسى توك تاركه حبوب المنع ومسويه بعده عزل

طبيعي جدا إنك تتأخرين شوي في الحمل
الحمدلله حبيبتي إذاكنت الدوره عندك منتظمه والإباضه زينه ليش تستعجلين
فنصيحتي لك لا تلعبي بنفسك نصيحه لوجه الله أختي إنك تداومي على ملعقة عسل طبيعي في الصباح على الريق وان شاء الله ماتكملين شهرين إلا وأنت حامل

أناياحبيبتي لي سبع سنوات متزوجه وماخليت شي ماسويته أكلت كلوميد سنه كامله وأخذت إبر منشطه لمدة ثلاث شهور وسويت تلقيح صناعي ثلاث مرات مع إني ولله الحمد طيبه ومافيني شيء
وبعد كمان سويت أشعة الصبغه والحمد لله مافيني شيء

وسبحان الله الله ماكتبلي الحمل لحكمه يعلمها هو سبحانه ولاراد لحكمه

أحب أقولك حبيبتي لاااااتستعجلين وتوكلي على ربك وأكثري من الدعاء وأستخيري قبل ماتسوين أي شي ولاتفكرين بالحمل أبد عشان نفسيتك تصير زينه:blush-anim-cl:

أسأل الله سبحانه وتعالى أن يرزقني وإياك وكل من أرادت من أخواتي المسلمات بالذريه الصالحه عاجلا غير آجل إنه هو الرزاق الكريم

دعواتكم لي بالفرج العاجل

 

[ملعقة سكر]

مشكورة اختي راجية التوبه وآيــــــــــات وتعبت اعاني ونونه المتفائله
الله لا يحرمكم دعواتي لكم

 

[ملعقة سكر]

معقوله يابناااااات مافي احد عنده علم عن الصبغة غير الاربع اللي ردوا
الله يسعدهم ويفرج عنهم ولايرد لهم طلب

 

[دمعه بلمعه]

اناسويتة والحمدالله كل شي سليم اذمستعجلةعلي الحامل سويةيمكن يكون الانبيب مسكرة عندك

 

[hms.alhnen]

حبيبتي عادي ليش خايفة توكلي على الله وسويها هي اشعة زيها زي الاشعة العادية اللهم تحقنك الدكتورة بمادة ملونة عن طريق المهبل مثل الالترا ساوند وبعدين تتابع بالاشعة عادي وتشوف الانابيب و إذا فيه انسداد بسيط بإذن الله يروح وبس مافي شي ثاني يصير وبالنسبة للالم مثل مغص الدورة بس بسيط مرة وماينذكر
توكلي على الله عزيزتي واعمليها انا سمعت حريم كثير يتكلموا عنها وخفت مثلك بس لما جربتها الحمدلله والشكر كانت بسيطة مرررررررررررة

الله يرزقك الذرية الصالحة عاجلا غير اجل انت واختي وجميع المتأخرات يارب ياكريم ​

 

[ملعقة سكر]

وينكم ياأخوات ابي ارتاح وش رايكم ساعدوني

 

[مييسو]

اذا عندك انسداد ما راح يعرفونه الا بالاشعة هذي ...... توكلي على الله وسويها ... اختي سوتها ومابعد جابت ولا طفل ..

اللهم اني اسألك بأسمائك الحسنى وصفاتك العلى ان ترزق جميع المحرومات الذرية الصالحة انك على كل شئ قدير :c016::c016:

 

[ام عبدالرحمن@]

حبيبتي والله ماعندي خلفيه بس خذي من نصيحت البنات والله يوفقك ويرزقك بالذريه الصالحه عاجلا غير اجلا

 

[ملعقة سكر]

مشكورة اختي مييسو وام عبدالرحمن على المرور والرد

 

[ام لوووومي]

للرررررررررررررررررررررررررررررررررررفع

 

[الفيروز الازرق]

والله انا 8 سنين متزوجه وتعبت من العلاج وباقي هالشي ما سويته اشعه الصبغه الي مخوفتني ومتردده اسويها اقول يمكن الله يكرمني بطفل وما احتاجها ادعولي هالشهر آخر شهر من التعب والمحاتاه وربي يرزقني ويرزقكم

 

[ملكـه بطبعي]

انا لي سبع سنين ماحملت وثاني سنه من زواجي بعد الكلوميد والمنشطات قالت الدكتوره احسن سوي اشعه الصبغه عشان نعرف اذا الانابيب فيهاا شي وسويتهاا وطلع الحمد لله سليمه بس لحد الان ماصار حمل ع قولت الاخت لسى ماحملناا لسبب يعلمه الله وحده واناا صراحه انصحك تنستنين شوي وماتسوينهاا لانك توك باديه في العلاج مالك مده يعني خليهاا اخر حل لان دائم الدكتورات مايرحموناا يتعبون اجسامناا فلسى بدري ع الاشعه هذا من واقع تجربتي ابدي في العلاج حبه حبه وانشاءالله ربي يرزقك في القريب العاجل اتنمى اكون افدتك دعواتك لي

 

[ربي ملاذي]

الله يعينك

 

[ام لوووومي]

للرررررررررررررررررررررررررفع

 

[mlakoo]

هلا اختي والله انصحك

لاتضيعين عليك الوقت روحي وسوي لان لي فات الفوت ماينفع الصوت

انا صارتلي 4 سنوات متزوجه وماحملت كنت ماخذه الامووور بساطه مابي استعجل بالحمل ويوم جفت صج طولت بديت اتوتر وخذت كلوميد كم سنه مااستفدت منه الا زيادة الوزن والانتفاخ
وبعدها قالي الدكتور ليش ماتسويين كشف بالصبغه ؟ خفت وتميت اجل اشهر وبعدها سلمت نفسي والحمدلله اني اكتشفت ان الانابيب مسدوووده الانبوبين ومانفتحوا من ضغط المااي وقت الكشف

وبعدها سالت عن عمليه فتح الانابيب المسدوده وترددت اسويها لان خلاص مافيني صبر ابي احمل بسرعه

وخذت موعد لاطفال الانابيب للشهر الجاي ان شاااء الله

فنصيحه لاتضيعين الوكت والمفروووض الدكتور اللي انتي تروحين له اول شيء يسويه يكشف ع الانبوب مب يبتدي بالكلوميد وباقي المنشطات لان حرررام تضيعين الوكت وخسراة الفلووس......

الله يرزقني ويرزقج ان شاااء الله ويرزق كل محتاج
​

 

[دلوعهvip]

هلا ياقلبي


انا مثلك الحين صار لي متزوجه سنه ونصف

وسويتها اشعه الصبغه تقريبا من 4 اشهر

ولا سبق لي الحمل

وعادي دكتورتي تقوول مافيها خووف على الي ماحملت

وسويتها ولاتخافين ولا شي وقتها خمس دقايق الالم ويخف


وربي يرزقك

ودعواتك لي بالحمل