تجربة زواجي الثانية بالنسبة لزوجي ولي...
تعذبت كثير في زواجي الأول لدرجة اني ما خليت زوجي يدخل عليّ..فكرهني في عيشتي عشان هالأسباب..وبما أني تزوجت وعمري 15 سنة قررت ما أتزوج بعد طلاقي بأربع سنوات..زوجي الأول كان متسلط واكبر مني..هربت لأهلي اللي ما عمرهم تدخلوا ف حياتي بحكم أن ولد عمي ما بيهينني...
عشت بعدها سبع سنوات حققت كثير من انجازاتي في عملي بعد ما كملت تعليمي..لكن المشكلة خطبني ولد خالتي اللي سمعت من اهله عذابه مع زوجته الاولى مع أن زوجته كانت تشتكي منه ومن أهله...بس أختي موجودة ببيتهم وما علقت على اي شيء...
وافقت لأني أعتقدت إنه بيكون محافظ على الحياة اللي يفتقدها...
وبعد زواجي بأسبوع لاحظت تغير معاملة أهله لي (أمه وأخواته)مع انها خالتي شقيقة أمي...
أختي أبو الهول نطقت أخيراً وقالت هم ما يحبون أحد يشاركهم في ولدهم والله يعينك على اللي بيجيك...
طبعاً رفض زوجي يكون لي على الأقل شقة..وترجاني أقبل بوضعه عشان ماله إلا أخ واحد أكبر منه (زوج أختي)..
اعتقدت أن كره اهله لي ما بيأثر عليّ وعلى حياتي..لأن أهم شيء حبي لزوجي وحبه لي وقناعتنا في بعض..
لكن أهله ما سمحوا لنا نعيش بسلام...
زوجي صار يسمع لهم..نفس اسلوبه مع الاولى(هذا كلام أختي والأدهى والأمر أن خالتي هي اللي أمرته يطلقها لأنها ما تبغاها وتكره اخواته والطلعه لها وزوجي ما كذب خبر وطلق زوجته)..
يتدخلون في ادق التفاصيل وزوجي يسمح لهم وحتى المستشفى ما نروح إلا بأذن أمه وإذا سمحت لنا توضح لزوجي أنه ما شي على كيفه بدون حسيب ولا رقيب...ولااااااااازم يدفع الثمن وهو إنه ياخذ أي أحد من البيت ويسوي له تحليل كامله أو أي شيء في المستشفى...
ما نروح لا للسوق ولا نتمشى ولا أطلع لوحده من صاحباتي ولا انام لوقت متأخر في الاجازات...وإذا طالبت بحقوقي البسيطه طاحت الدنيا على راسي...حتى زوجي مقتنع بقناعه واحده ويكرر لي كلمة إن أمه وخواته مساكين ما حد يحبهم لو يتزوج أي وحده في الدنيا...والحل في نظره زي ما قالت أمه:يبقى بدون زواج...
حملت وانجبت ولد وتدخلوا حتى في اسمه وغيروه وزوجي يقول أنا مقتنع في أي شيء تأمرني فيه أمي...
تظلمني وتنقل لزوجي ولأخوه(ذراعها اليمين)كلام كله كذب..حتى مزحي مع بنات أختي يسوون عليه مشكله..حتى الأكل والمطبخ عليه مشاكل..ما فيه شيء ماعليه مشكله..
وتشتكي مني لكل الناس لدرجة اللي يشوفوني يقولون أتقي الله فيها هذي صايمه مصليه وبناتها مالهم أب(متوفي) بكره تنرد لك في عيالك..والتعليقات هذي في كل مكان...
وبحكم ثقتي في نفسي وجرأتي في الحديث (عشان عملي"معلمة") يقولون الناس يجي منها شكلها قوية عين...
إلى جانب أن أي أحد ما يعرفني من جيرانهم يشوفني يمدحني تزعل وتقول حلوه بس أنها مطلقة؟؟؟
إهانات وتجريح وأهلي ما يبووون يتدخلون..يقولون لو تحلف كذب صدقناها هذي حرمه كبيرة....
تعبت..من تحريضهم زوجي مد يده عليّ..
أحس أني كرهته حيييييييييييل...
وما عاد لي نفس أعيش معاه لأنه سلبي للغايه...
حتى إذا تجنبتهم يسووون مشكله ويقولون لزوجي زوجتك شايفة نفسها علينا تكرهنا ومتكبرة لا عاد تزورونا(نسافر عشان عملنا ونرجع في الويك اند)يعني كل اسبوع مشكله غير..
ودي انقذ حياتي عشان ولدي وابدأ بدايه جديده قرأت كثير في المنتدى لكن أحس اني ملخبطه ساعدوني الله يوفقكم كيف أبدأ؟؟؟