ريحو نفسيتي .......اهملت ريلي والسبب ...اهلة

[ملاك 88]

بسم الله الرحمان الرحيم..
حلوين اتمنى ماتهملون رسالتي عطوني افكار عطوني حل علموني فهموني شو اسوي والله ماعرف شو صار لي ...
انا لما كنت صغيرة عمري 9سنوات وااااااااايد مهتمة بشكلي وبنظافتي وبكشختي ولازم كل شي يديد اشتري امشي على الموضة وماكنت احرم عمري من اي شي ..وامي الله يحفظها دووووووم كانت تخاف علي وتقول محد مطفرها غيري.وكبرت وزادت الكشخة والموضة.وكنت اغلى الملابس اشتري واحسنهم وحتى ملابسي مال المدرسة لازم افصل 8 كنادير واغلى شنط واغلى دفاتر واطقم ف كل شي ..
والله الله الشاهد معنى كنت محترمة واااااااايد وخلوقة وطيبة لدرجة ماتصورونها وكنت اساعد البنات في كل شي مادي ومعنوي ..ومشت الايام ودارت لين صارعمري 18سنة ....19سنة وكل اهلي يحتقروني ويطالعوني بنظرات غيرة وانا اعرف هم يحبوني مووووت ويموتون علي والله يترجوني ارقد بيوتهم في الاجازات ..وكل وحدة تتمنة تكون صديقتي .بس من وراي يرمسون عني اني متكبرة ودلوعة ومغرورة ..واشياااااء كثيييييييييييييرة وكنت اطنش ما اهتم لاني واثقة من نفسي ..وصارعمري 21سنة ...22...سنة الخطاطيب ماقصرو ورى بعض بس ماصار نصيب لين صارعمري 23سنة تزوجت .....
اللحين بخبركم سااااااااااااااالفتي واتمنى اساعدوني
ايام الخطوبة كانت احلى ايام صبعا الكل يعرف هذا شي ومريتو بهذا الجوالرومانسي ..
وانا من النوع احب انوع في كل شي ملابس شعري شكلي والله خليت خطيبي يتخبل ..وكنت رقيقة دلوعة رومانسية احترمة واهتم فية ف كل شي.خليتة بيبي في اديني كنت ادلع دلع عجيييييب كل شي انا اختارلة ملابسة ونعلانة وقمصانة حتى لما نسير المطاعم انا دووووم ادفع واشتري لة اغلى الماركات وكل ماينزل جديد موبايل ع طول اخذلة لي ولة ..واااايد مدلعتنة ..وحفلة الملجة تخيلو ماخليتة يدفع شي كلة على احسابي القاعة وفستاني وتوزيعات ومكياجي ....الخ بس هو دفع لي المهر ...
وتزوجت وهوراضي علي وانا راضيه علية ..والكل حاسد ريلي عشان انا زوجتة .مريحتنة ف كل شي عشت معا في بيت اهلة ماطالبتة يحطني في بيت بروحي عاااااااادي عندي لان ماكنت اعرف شو الزواج اصلا كان بنسبة لي لعب طلعات روحات مشتريات مغامرات ..
انا كنت بيت اهلي طبعا معززة ..
كنت اعتبر ابوة ريلي وامة هم مثل ابوي وامي وخواتة نفس شي احبهم عمري ماضريتهم دوووووووم اساعدهم واسوي الي بخاطرهم واشتري لهم كل شي .وهم الله اعلم جدامي يحبوني من وراي ماعرف ..
مرت الايام لين صارت مشكلة كبيييييرة من خواتة ..تحطمت طحطم كل شي كرهت نفسي اهملت عمري كرهت كل شي والله سنةوانا ارقد على دموعي سنة تعذبت وكل يوم اصيح انا اصلي دموعي تنزل وانا يالسة مب حاسه في عمري الدموع تنزل وغمى علي والدكتورة تقول نفسيتي تعبانه لازم اسير عند دكتور نفسي رفضت عشت حياتي بروحي وكرهت اهل ريلي. تركتهم ولا ضريتهم تعبت من كل شي وريلي ماله ذنب هم السبب حطموني خلوني اهمل حياتي والله عندي كل شي ماقاصرني شي الحمدالله ع النعمة الحمد على كل حال ..
بس خبروني شواسوي ابغي ابد حياتي ابغي اسعد زوجي ابغي اهتم بعمري معنى كل الدلع اعرفة وامشي ع الموضة وغراضي كلها يديدة مب جايستنها بس ماعرف شوصار لي ماعرف ليش احس مقصرة بواااااااااااااااايد بحق زوجي ادعولي الله ياخذ حقي منهم ادعولي ارجع نفس قبل علموني عطوني افكار رومنسيه شجعوني الله يجازيكم الخييييييير ..

 

[ملاك 88]

والله حطمتوني زيادة تدخلون ولا تردون علي ع الافل بدعاااااااااااااء لي الله يرزقكم الفردوس امين

 

[نونه الحنونة]

ربي يبعد عنك العين و الحسااد و الله كثير بناات مثلك ..

ما لهم و ما عليهم .. ماال و جماال و أخلاق و أحتراام للغير و كل شي .. بس الي حولهم ..

أعووووذ بالله .. صدقتي و الله ..

انشااء الله ترجعين أحسن من قبل و تبدين حيااة حلوة مع زوجك من جديد ..

و هذاا رابط موضوع أختي حلم الرومنسية فيه أشيااء كثير و لياالي حلوة ..

http://www.niswh.com/vb/showthread.php?t=183654

و أنصحك بعد أنك تروحين لطبيب نفسي .. لأن الحل في النفسية أولاا و أخيراا و أنتي من كلامك مومقصرة بعمرك .. فااهمة ,, ما تحتااجين حد يوضح لك و يفهمك ..صح ؟!!

 

[خريجة الحياة]

الله يفرج همك ويحقق اللي في باااااااااااااااالك ياااارب
بس ملوكه عمري مافهمت مشكلتك ؟ سووووري

 

[النـايـفه]

اذا المشكله اهله افضل لك اطلبي بيت لحالك والله الاستقلاليه غييييييير

 

[روز..]

الله يبعد عنك الغم والحزن اكثري من قرائت القران

 

[حياتي؟؟]

حبيبتي ان شا الله مابيفيدك غييييييير الاستغفار والصدقه وقراءه سورة البقره يوميا .......... وبعدهااااااا استخيييييري في محاورة زوووووووجك على الانتقال لحالكم بيبيت مو مع اهله بصراحه انا ضد الحرمه اللي تسكن مع اهل الزوج ووووين الخصوصيه صرررررررررررررررررررراحه مررررررررة صعبه ........ حاوريه وشووووووفي والله يفرج همك ......... وادعيلي يا اختتتتتتتتي على على وجه زووووووووووووووواج .........

 

[احاسيس حائرة]

الله يسهل امورك ..

 

[فراشة شوق]

انا مادري اش سوو اهل زوجك
بس اعرف شي مهم لازم تعرفيه
هم بشر والغلط منهم وارد مهما كان حجمه وحتى الظلم بين البشر وارد
لكن عشان تعيشي لازم تعرفي ان ماحد بيخسر مع الهم الا انتي
والكل بيعيش حياته والافضل حتى لو على حساب غيره
تجاهلي الموضوع وتناسيه ويعينك على النسيان ان لك رب اسمه العادل
زوجك زوجك زوجك اهم شي في حياتك خلي اهتمامك انك ترضين نفسك من خلاله لاتقولين قصرت مع زوجي قولي قصرت مع نفسي
استسلمت للجرح وحمت نفسي المتعه
ابدي معه بيوم جميل ابتسامه طول الوقت تذكري احلى لحظات عشتيها معه وابتسمي
اذا جا ابتسمي وقولي وصل الحبيب في نفسك مو لازم يسمعها
خلي يومك كله مرح وراحه
وباليل لاتجهزي ليله رومنسيه شموع وغير لالا
جهزي ليله رومنسيه بالكلام والحركات سوي كل اللي يحبه مو عشانه عشانك انتي تشوفيه مبسوط وتحسي بالنجاح وتحسي انك سويتي شي يسعدكم الاثنين
استمري بالرومنسيه في الفراش تصحي مبسوطه وهو مبسوط
ولا شعوريا تصيرين تبعدي الاحزان حتى ماتخسري لحظات السعاده
والله يعينك ويسهل امرك

 

[عرش قلبه]

ما اعرف شو المشكله بس الواضح انها كبيره
بس الغلط اللي سويتييه انج طيحتي الميانه بينج وبين اهله
كان خليتي معاملتج وياهم رسمييه يعني ع القد احترام متبادل وبس
فقط لا غير ..
انتي من صميم نفسج تعرفيين انج اهملتي زوجج وهالشي بدآآيه
بما انج وعيتي لنفسج حاولي تنسيين اهله وتنسيين كل اللي صارلج
لان ماشي راح يفييدج الا النسياان او انج تحقرينهم ورجعي لزوجج مثل ماكنتي
لانج لو استمريتي على هالحال ريلج ماراح يتحمل وايد مثل ماتعرفيين الريال
يحب الدلع والدلال وخص انج انتي معودتنه على هالشي من ايام الملجه
فصعب انه يفقد هالشي بكل بساطه ولو مالقااه عندج بيحصله برا

عندج انا معرسه صارلي تقريبا 4 سنوات فالبدايه كنت جي شراتج
مع اهل زوجي بحكم اني ساكنه وياهم وياكثر المشاكل اللي يتني منهم
وتمييت كله مكتأبه ومكشره في ويه زوجي وحسيت زوجي مضايق من هالوضع
لانه تعود مني الدلع والدلال والكشخه .. قمت وقلت في خاطري زوجي شو ذنبه
وليش انا اخسر زوجي على اشيااء تافهه رديت مثل قبل واحسن وعلاقتي ويا اهله
خليتها سطحيه ونادر ما ايلس وياهم كله يالسه في قسمي ^_^
والحمد لله زوجي راضي عني ويحبني اكثر عن قبل

 

[3AROOOOSA]

حبيبتي ..اللي تمرين فيه كلنا مرينا فييه ..دلع ف بيت اهلنا ..وكلام وغيره ف بيت اهل الزووج ..

بس هذا مب معناته اتغير ع زوجي..؟؟

ريلج بيتضايق ..!!
وين الانساانه اللي كانت تدلعني ..!!!

وين بسمتها لي ع طووول ..!!

وين اللي كانت تشااركني ف حيااتي ف كل شي ..!!:schmoll:

صدقيني انتي بس فكري فييه هوو ..!!

انتي تحطمتي من خواته ..!! هو شو ذنبه انج تهمليينه ..!!!:tears:

العكس هالشي بيفرح خواته لانهم حاسدينكم ..يعني بيستانسوون انج مب معبره ريلج وكله متضاايقه ..!!!

فكري ف كلامي زيين الدنيا كل ابووها يومين ..!! ومب لازم نخسرهم عشاان خاطر ناااس مايستاهلوون ..!!!


ودايما كل مايكوون ريلج يالس عندج ف الغرفه تأمليه ..وقولي ف خاطرج ..!!

هو اليوم جدامي..بعيد الشر مايندرى لو طلع من البيت شو يصير له .!!!:tears:

بعيييييييييييد الشر عنه وعن ازواج المسلماات بس انا بغييت اعطييج مثال ..!!

يعني رووحي سيده واحظنيه والوي عليه وحطي رااسج ف حظنه يمكن ترتاحين ..

وماعليييييييييج من حد ابداا ..!!

ردي الدلووعه اللي تهتم ف عمرها ..اللي كل متخبل عليها ..

خلي سورة البقره شغاله ع طووول ف غرفتج ..
دوم ادعي لج ولريلج ..

فكري انج تنتقلين من بيتكم اذا هالشي بييريحج ..

واللله يخلي لج ريلج وطمنييينا عنج فديتج

 

[sweet student]

خليها مناسفه شريفه خل نقول

قومي تعدلي وتكشخي وعيشي حياتك:icon30:

واللي يكرهونك اطحني حب حب على قلوبهم

بالتوفيق

 

[ام الطيار]

اختي نصيحة مني مول لاتسويلهم سالفة وخلي معاملتج وياهم رسمية انا جالسة معاهم من ست سنوات وكله مشاكل في مشاكل وكنت اشتكي لزوجي في البداية لكني حسيت اني باخسره والحين تعلمت مول ماقوله عن سوالفهم واشتريت راحتي
قولي بينج وبين نفسج منو هم عشان انتي تفكرين فيهم وتكتأبين عشانهم لا ارجوكي فكري في صحتكي اولا وفي زوجج ثانيا وعيشي حياتج والبسي واكشخي واطلعي ولا كانهم موجودين والله ان شاء الله بيرزقج بالذرية الصالحة

 

[فتاه]

ياااااااربي أهل الزوج مادرى ليش يحبون المشاكل والغيره!!!!!!!!!!!
أنا ما اشوف اهلي يكرهون زوجه اخوي بالعكس امى تفضلهم عليناااااااا احنا بناتهاااااااا وتحبهم ويوم رحت بيت زوجي اشوف الحقد بعيونهم مادرى ليششششششششششش صدمه اذا تتعودين علي وتشوفين شئ ثاني والله حاسه فيج وانا مثلج اعااااااااااني والمشكله ما شافوا منى الا كل خير وانا بالبدايه تميت اقول حق زوجي كل شئ ونتهااوش بس الحين ليش اعكر مزاجي علي ناس ما تسوووي وهي ما تحب لي الخير ولاااااااا حتى ولدي عمره 3 شهور ما يسألون عنه ولا كانه عندى ولد اذا نزلت لهم بغيت شغله ولا يسألونى عنه والمشكله انا مو مقصره عليهم بشئ هذا القهرررر والحين طنشيييييييييييييييييييييييييييييي واهم شئ زوجج وحياتج انتي

 

[ألماسة آسيه]

ما قصروا الاخوات بالنصايح وازيد انا
وانصحك بقول الله تعالى
{وَاسْتَعِينُواْ بِالصَّبْرِ وَالصَّلاَةِ وَإِنَّهَا لَكَبِيرَةٌ إِلاَّ عَلَى الْخَاشِعِينَ }
فالصلاة والصبر لهما اثر كبير على االنفس

 

[لمسة حنين]

لا تهتمي كثيرا في اهل زوجك من هم علشان توجعي راسك علشانهم انتي في بيتهم علشان ولدهم مب علشانهم هم لو ما ولدهم ما خذينج ما كنتي في بيتهم اعرفي انتي دخلتي هذا البيت علشان ريليج مب علشان اهله وفيه كثير مثلج عانوا من اهل الزوج وانا من ضمنهم في بدايه حياتي الزوجيه وبس يوم طلعت بيت بروحي بعد هم يسوون مشاكل وبذات خواته ولكن كنت ما عليه منهم اهم شي عندي زوجي مدلعتنه ولا ايب طاري اهله واحيانا نكون في بيتهم ويعاملوني معامله مب زينه ولا ارد عليهم باي شي بالعكس كنت اشتري لامه هدايه في كل مناسبه واروح وايه وياهم وهذا الشي رضي ريلي وخلاه يحبني اكثر لانه هو يشوف اهله هم يغلطوا وانا لا
ولوتميتي علي هذه الحاله راح تخصري ريلج ردي مثل اول واحسن من اول واعرفي شي واحد وبذات عن خوات الزوج يوم يعرفوا نقطه ضعفج بيتمن وراءها يضايقنج وانتي ليش تبيني لهم ضيقتج ما عليج منهم كسبي ريلج اهم شي وثاني شي امه حاولي بكل استطاعتك تردي مثل اول دلعي عمرج وريلج

 

[مون لايت]

اذا المشكله اهله افضل لك اطلبي بيت لحالك والله الاستقلاليه غييييييير

الله يرزقنا وياج بيوت مستقله عنهم
امين ,,,,,,,

 

[أميرة الالماس]

ينقل الى الاستشارات

 

[nla]

باختصار ،،، لا يوجد ما يبرر اهمال الزوج والتقصير معه لاسباب خارجية كالتي قلتي

فان ذلك مدعاة لتفاقم المشكلة ووقوفك في الطرف وزوجك في الطرف الاخر بدلا من اي يكون الى جنبك

 

[ملاك 88]

اذا المشكله اهله افضل لك اطلبي بيت لحالك والله الاستقلاليه غييييييير

والله صااااااادقة كل واحد عندة بيت يرتاح اعرف هاشي ..بس المشكلة ابوة مب راضي نطلع لان امة محد عندها روحها لان هو الولد الوحيد ..ودوم يقول اذا حق ولدة اذا طلعت انا مب راضي عليك ..اهم شي رضى الوالدين ..