ساعدوني!!أخت زوجي ستصبح ضرتي؟!!!

[دمعة سحاب2]

السلام عليكم

لدي صديقة تعرفت على منتدانا الحبيب واستفادت منه جدا ولكن لم تتمكن من التسجيل لاسباب إلكترونية!
لديها مشكلة وترجو ان تتفاعلوا معها وتشيروا عليها يااصحاب الخبرات والتجارب.

تقول ام عبدالله:
انا متزوجة من 4 سنوات ولدي طفلان وزوجي(طلع شماااااااالي وبين الغربي والشرقي) لديه ولد 6سنوات وبنت 8سنوات من زوجة سابقة ويسكنون معنا:sadwalk: المشكلة ليست هنا برغم انه تجينا منهم مشاكل بسبب امهم المطلقة لكن انا احاول احتسب الاجر فيهم واعلمهم ما استطيع ان اعلمهم عليهم من اخلاق صحيحة.
المشكله ان زوجي لديه اخت مطلقة لديها ولدان تسكن لوحدها بشقة وهو مرتبط بها جدا جدا لانذهب برحلة الا هي معنا ولا مكان الا هي معنا واولادها حتى لو كان على حساب اطفالي!! لان سيارتنا صغيرة ويريد ان اضع اطفالي والخادمة عند اختي عشان تركب هي واولادها معنا!!! شفتوا كيف؟؟ولما رفضت اتهمني بالكبر والحقد وان قلبي اسود!:tears:
وانا لم انتبه لتصرفات اخته الا بالاخييييير طالعه على نياتي ولاكنت اظن انها تشيل علي وانا لاادري؟

وفي اثناء احد الرحلات البرية وطبعا اخته معنا حصل خلاف بسيط في الرأي بيننا انا وزوجي ولكنه كان عادي لم ينفعل الا بعد تدخل اخته التي قالت:خلاص الزوجة مايصلح ترد على زوجها ولاتجادله الوحدة لازم تفهم زوجها وتحترم رأيه ووووووووو

فثار زوجي جدا وغلط علي بكلام جارح وشتمني امامها:هي اصلا كذا ماتفهم وووووو:tears:

وذهب مع اخته يتمشيان في البر لوحدهما مشيا على الاقدام وانا اتجرع الالم
وفي اثناء الجلسة قلت له:لاتنس ان تذهب بي لصديقتي اذا رجعنا لاني مواعدتها(طبعا هو عنده خبر مسبق ووافق)
فتدخلت اخته قائلة: يوديك لصديقتك وهو لسه جايبكم من البر ؟!! قلت: انا مواعدتها!
قالت: وبيتك وزوجك وعياك؟؟؟؟؟؟؟؟؟
انا تفاجأت بكلامها هذا وكأنها تريد ان تجعله يمنعني من الذهاب لكنه صمت ولم يتكلم:thumbdown: قلت اصلا هو سوف يذهب لن يجلس بالبيت!
وفعلا اصلا ذهب لها ليكمل السهرة معاها !! وبعدها بيوم اتصلت عليها وقلت لها بهدوووووء ومقدماااات ودية: انا اقدر نصيحتك لي لما كنا بالبر ولكن كان المفروض ماتنصحينني امام زوجي لانك سببتي مشكلة بيننا امامك؟! وغضبت جدا وثااارت وقالت خلاص ماراح اطلع معاكم اذا كنت اسبب لك مشاكل واصلا انت ماتبغينني اروح معاك انا واولادي وووووووووووزوجك اصلا يشتكي لي منك ويقول انك دائما تسببي مشاكل له ووووو
بصراحة انصدمت بكل شيء بردة فعلها وبحديثها كله وشعرت انها كانت تنتظر مدخل عشان تنفجر بي !:busted_red:
وهدأتها وطيبت خاطرها بقولي انا اعتبرك اختي لذلك صارحتك وكلمتك ولافي قلبي حاجة عليك
والان انا خايفة تخبر اخوها (زوجي) وتكبرها براسه وتصيييير مشكلة؟
لاني تفاجأت انه ايضا يقول امس : انه راح يأخذ بيت ويسكني بدور واخته بدور ورفضت طبعا فاتهمني بالغيرة والمريضه بالغيرة ماذا افعل اسعفووووووني؟:sadwalk:حائرة جدا

أم عبود

 

[دمعة سحاب2]

ست دخلوا ولا ردوا!!!!؟؟؟؟

ع الاقل دعوة مشاركة وجدانية

 

[درة العروس]

اختي الغاليه..........الله يعينك بس فكري شوي هذي اخته ومطلقه يعني تحتسبون الاجر فيها ..وبعدين على كلامك انه زوجك مره متعلق باخته فاذا تبين رايي حاولي تكسبينها بصفك بس بدون ضعف لدرجة انها تسيطر عليك وعلى عيلتك بس اكسبيها بذكاء ......يعني لامانع انه منفتره لفتره تجيبين لها هديه بسيطه....تذكرينها بالخير عند زوجك...تحاولي تطلعين معها انتي وياها بس بدون زوجك يعني يحطكم بسوق او مطعم مع عيالك........يعني الخلاصه خلي علاقتك معها كصديقه وليس كاخت زوج بس صديقه بحدود.....يعني لاتتكلمين معها عن امورك الشخصيه مع زوجك او عن مشاكلكم ابدا........لما تكونون مجتمعين مع زوجك حاولي يكون كلامك مع زوجك لطيف وهادي ولاتناقشين زوجك قدامها ابد باي شي يعني لاتقولين مثلا ها ايش سويت بموضوع طلعتي عند صاحباتي ....اي شي لو بسييييييط ناقشيه مع زوجك لحالكم بالبيت....لاتحسسي اخت زوجك انك متضايقه منها او من عيالها واحتسبي الاجر معها هي وعيالها.....وبالنسبه لراي زوجك انه ياخذ بيت وكل وحده لها دور .....اذا تبين رايي فهذي اخته وشكله مالها اخوان ثانيين غير زوجك بهذي الحاله زوجك معه حق ...هو صحيح القرب الزايد يجيب المشاكل بس بحالتك زوجك فكر بشكل منطقي ..واذا حصل هالامر فانتي بذكائك تقدري تتحكمي بالامور وتخلي الوضع عادي ......يعني كل وحده ببيتها مع عيالها ....الله ييسر لك امرك.............

 

[الهنا كله]

الله يصبرك
طيب هو ما عنده أهل ..... أم أب أخ خال عم
يعني ماعندها غير أخوها اللي هو زوجك !!!!!!!!!!!!!!

وبعدين طنشيها وكوني انتي الطيبه الحنونه عشان تكسبي زوجك

 

[e-style]

أدعي لج من قلبي يا أختي
في هالوقت حاولي تخففين المشاكل مع زوجج و لا تخلين له اي فرصة انه يشتكي منج لأي مخلوق لا اخته و لا غيرها و في نفس الوقت دلعي أخته بالهدايا و غيرها و لا تتأففين من وجودها حتى لو كنتي متضايقة
بس انتي بعد فكري في الموضوع من ناحية ثانية البنت وحيدة لا رجل و لا سند يوم ما انتي تحطين راسج و ترقدين يم ريلج هي ترقد على وسادة خالية عيالج كل يوم يصبحون على وجه أبوهم و عيالها ما عندهم أحد ممكن هذا يولد عند ريلج احساس بالمسؤولية تجاهها
و انتي حاولي تكسبي الاثنين لأن ما عندج حل ثاني هذي اخته لحمه و دمه طبيعي ما راح يفضلج عليها

 

[حبة باتشي]

هلا اختي... الصراحه انا انقهرت..كيف انتي مستحمله.... صحييح المشكله في اخت زوجك الله يهديها... لكن المفروض ماتكلمينها لانها اكييد مقتنعه فاللي تسويه انه صح... المفروض تفهمين زوجك وتكونين معاه على كلمه وحده قدامها وقدام الكل...وتفهمينه انه هي فاضيه وعامله قاضيه..هههههه .........وتفهمينه انه اذا في شي في باله ما ينشر الغسيل قدام اي حد حتى لو كانت اخته لانه في النهايه هاذي حياتك انتي وهو بسسسس... ولازم تكونين صارمه وياه لكن في نفس الوقت اتحسسينه انك محترمه اخته و ابدا لا تحسسينه انك حاقده عليها...

 

[ميوسه]

عزيزتي


ببسسطاه شخصيتك ضعيفه



قوي شخصيتك



وخاصة معاه ومع اي احد يغلطك عليك


في هالدنيا ان لم تكن ذئبا اكلتك الذئاب


تعلمي من المنتدى عن شخصية زوجك ونوعها حتى تعرفي تتعاملي معها بهالمواقف وبحياتكم الخاصه والعامه


موفقه

 

[لمسة انوثة]

الله يفرج همك ان الله مع الصابرين

 

[أنــا بــس]

لا يا اختي هي ما هي ضعيفه بل قويه و واثقه من نفسها و لكن يقولون " لحيه احشمها و لحيه احشم نفسك عنها"

وهذي وحده معقده و تبي تصب غيظها عليك يا اختي

و ممكن تشوف انها احسن منك و ومع ذلك هي المطلقه وانتي ما تزالين متزوجه
هي لم يستحملها زوجها وانتي على قلبه مثل العسل...

فأكيد هي ايضا سوف تغلظ قلب زوجك عليك و تبرز عيوبك حتى تبرز انها افضل منك ولكن حظها سئ في الزواج لا اكثر - على حسابك و حساب سعادتك طبعا-

انا اختي عندها نفس الشي... في كل اجازه تاتي اليهم اخت زوجها لقضاء الاجازه من المنطقه التي تعيش بها مع والدتها

دونما اخذ اذن منها او حتى التاكد ما اذا كانت سوف تذهب الى اهلها هذه الاجازه - اختي لا نراها الا بالسنه مره ولا يهمها هالاخت-
حتى انه امام زوجها تتحدث لاختي بان الرجال يفضلون المرأه الكشيخه و المتبرجه و صاحبة الصوت الناعم والخافت

اختي قويه ولكنها نظرتها بنظره " تقصد بها اسكتي بس و وفري كلامك لنفسك" ولكن رد زوج اختي انه زوجتي -يعني اختي انا- لا ارى ان كونها تحب اللبس السبورت يعيبها بالعكس هذا لبس المنزل و لكل مقام مقال... وانا لا احب المرأه التي تكثر من التبرج لانها تغطي شيء اخر بها تخجل منه اكيد

فلذلك يجب ان تتفقي مع زوجك على شيء واحد
دائما يؤيد رأي اخته اذا انتقدتها بشيء و يبرد قلبها و لكن لا يجعل ذلك حقيقه يفكر بها على انه فعلا عيب بك...
لان اختك تعقد مقارنه بيني وبينها و من حقها زينة االبنات و تطلقت ومافيها عيب.. انا ابيها تاخذ راحتها بس لا تخلي الشيطان يلعب بينا انا احبها و اخاف على زعلها .. بس انت اهم عندي فخلك مرتاح اني مو شايله شي ابد بقلبي عليها بس انت امدحها عشان تهدأ ان فعلا مافيها شي ناقص حتى لو تطلقت
وبس بالتوفيق

 

[أدمنت دنياكـ]

رايي كلمي زوجك وقولي له انك كلمتي اخته وايش صار بينكم من شان ما تصير لها فرصه انها تتدخل هي فيك

بعدين يا اختي لا تكلمينها بالتليفون خليك معا رسميه من بعيد لبعيد اذا صارت كذا

 

[الاميره..]

حبيبتي زوجك شمالي يعني ببساطه مايطيق المرأه الضعيفه
يعني كووني قوويه ..اذا انتي ضعفتي وماقدرتي تاخذي حقك قدامه بأسلوب ذكي وقوة شخصيه
ماراح يقدرك ........
هو شايف ان اخته قويه وتستحق التقدير ... وانتي الضعيفه تحملي ..
فأنتبهي لهذه النقطه حبيبتي .. طبعا بداية كوني واثقه من نفسك واتركي نظرات المسكنه وانها ظلمتني وانا ماسويت شيء ... عطيها بالمختصر المفيد وبنظرة ثقه عينك بعينها حتى لو هو موجود .. يعني خليك اكثر احترام منها بس علميها اسلوب اللباقه بطريقه تخلي زوجك يلاحظ مدى ثتك بنفسك .. وانكِ محترمتها فقط احترام لزوجك
طبعا قبل كل هذا لازوم يكون هنااك مصارحه بينك وبين زوجك ويكون اسلوبك معاه شوي قوي وذووق .. بلاش انك تستمري تتمسكني عنده لانك كذا تفهميه العكس "ارحمني وخذ حقي "
طبعا هي واضح انها تغار وحالتها النفسيه سيئه لأنها فاقده زوج يساندهه ويعينها ع تربية ابناءها .. لكن مو معنى كذا تضطهدك كل شيء وله حد

اتمنالك التووفيق ياقلبي

 

[جورية 99]

شوفي حبيبتي :

اولا :ابدئي صفحة جديدة في حياتك وتبدائين بلاستغفار طول يومك وانت جالسة وانت تطبخي وانت تمشي فاهمتني

وخلي زوجك يلاحظ انه في شي متغير .

ثانيا:حبيبتي ليه تعتذرين وهي الغلطانة وانت على حق (ترى شخصيتك ضعيفه لازم تقوينها وبالحق مو بالباطل ) اصلا بمجرد اتصالك عليها بينتي ليها ضعفك . وزوجك يوم سكت عارف ان اخته( تصيد بالموية العكرة) وانتظرك تدافعين عن نفسك وتاخذي حقك بادب معاها (مثلا قولي حبيبي من امس موافق لي بس اذا فيها كلفة علية بلاش . صدقيني راح يخجل يروح اي مكان وهو قايل لك لا )او اذا زوجك مرة مايبغاك تردي عليها ويلاحظ انها زعلت كان قلت ( بمزح حنا اليوم فالينها ونبغى نرجع البيت وحنا تعبانين عشان نحس اننا خرجنا خرجة وناسة بصدق) يعني كانك تتكلمين على لسان زوجك وتتطلعين له العذر الي يقنع اخته (لان شخصيتة ضعيفة معاها بس لايدري انك حاسة كذا )
ثالثا:غريبة زوجها الي مطلقها مخلي العيال كلهم عايشين معاها . على العموم حاولي لما تتكلمي مثلا بالتلفون مع صديقتك او اي وحدة من قرايبك انك تجيبين سيرة اي وحدة فيها من صفات اخته الي واضحة وسيئة جدا وتبدائين قدامه تتكلمين عن صفاتها السيئه وانها ماتخاف ربها وربي ماراح يسيبها وبيردها بعيالها لان الي زي زوجك لاتجيبين سيرة اهله بسوء ابدا لاكن ممكن بطريقة غير مباشرة منك وبعفوية تامة يعني مو قصدك تلمحي عن اخته.
رابعا: حاولي تتثقفي من ناحية تعرفي حقوقك وواجباتك وطوري شوي من اسلوب كلامك مع الجميع وهذا الشيء مايجي الا بكثرة القراءة وهنا المنتدى مليان قصص تثقف الوحدة غصب مو تاخذين بس القصة الي عاجبك عنوانها لالا اقرائي وانت تبغي تتعلمي كل انواع المشاكل وحلولها وانواع الرجال والحريم .
وانشاء الله اني افيدك ما اضرك . ونسمع عنك اخبار حوة

 

[اتعبني حبيبي]

الله يعينك عليها حبيبتي
وانت ماقدامك الا انك تكسبيها في صفك هذا هو الحل الوحيد ومافيه غيره قدامها,,,
تحاول تشتري هدايا لها ولعيالها العاب ملابس وووو... وهذا كله موعشان سواد عيونها لا
علشان زوجها ياخوفي بكره تزوج اخوها على كلامك ان كلامها يأثر فيه على طول
لازم تكسبها في صفها بأي طريقه
موفقه حبيبتي..

 

[سميت نفسي]

الله يفرج همك ويسعد قلبك ويره لك ردا جميلا

 

[محرومه من زوجي]

حبيبتي دراء للمفاسد لا تخرجي معها دام زوجك يروح يتمشى معها ويخليك
وتسبب مشاكل
ضعي حدا لذلك
اذا بغى يخرج اخته اوكي فيهم اجر بس انتي لا تطلعين معهم
ويخرجك انتي الحالك,,
وحاولي ماتتصادمي معها وعلاقتك فيها تكون رسميه,,

 

[AUDI]

الله يعينك , وحاولي ترجعينها لزوجها او جيبي لها عريس !!! هذي مالها حل الا كذا ....

 

[الأميرة ابتهال]

الله يكون في عونك عليها
بما انها قوية صيري اقوى منها
ولا تضعفي امام زوجك ابدا .. كوني واثقة مما تقولين وان تكوني امرأة قيادية وليس " سليطة لسان "
بيني امام زوجك دائما انك تحبينها وان خاطرك مكسور علشانها وانك راحمتها وعيالها
لأن الزوج اذا انتقل له كلام يبدأ يقارن بين المواقف فخلي رايتك بيضاء
وحاولي بأسلوب حسن ان تقنعيه ان يبحث لها عن زوج يؤنس وحدتها

ثم اذا قالت لزوجك ما حدث فأخبريه مباشرة بما قالت انه يشكي منك امامها

 

[نور كندا]

حتى لو سكنتو بنفس العمارة خليكى بحالك وخلى علاقتك معها رسمية اما زوجك فان احب ان يزهب اليها كل يوم فليزهب لاتناقشيه ومهما فعل لها لاتساليه ولاتكلميه لانه على مايبدو يحبها اما انت فلكى حياتك ولك اولادك ومشاغلك خلي زياراتك لها قليلة وكلامك معها عن اشياء سخيفة كالاكل والشرب لاتدخلى فى مواضيع عائلية او شخصية مهما حاولت جرجرتك بالكلام والله يسعدك

 

[مهايه]

الله يعينج عليها بس اذا اصر تسكنون مع بعض فهمي زوجك اذا حصلت مشاكل ترا هو السبب

 

[هواها شرقي]

ياااااااااربي الله يعينك بس نصيححححححححه لا تسكتين لها راح تتماادى اكثر خلي لك شخصيه قدامها وقدام زوجك ...والله يكفيكي شرها